ଥାଙ୍କସ୍ ଟ୍ରମ୍ପ : ଭାରତ ଅପେକ୍ଷା ଚୀନ, ପାକିସ୍ତାନ, ବାଂଲାଦେଶ ଉପରେ ଅଧିକ ଟାରିଫ୍

ନୂଆଦିଲ୍ଲୀ,୦୩|୦୨ : ମାନିଗଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ । ଭାରତ ସହ ଟ୍ରେଡ୍ ଡିଲରେ ଲଗାଇଲେ ମୋହର । ଏବେଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ କାରବାର ଅଟକିବନି । କାରଣ ଟାରିଫ୍ କୁ କମାଇଛି ୟୁଏସଏ । ପୂର୍ବରୁ ନେଉଥିଲା୨୫ପ୍ରତିଶତ ଟାରିଫ୍ । ଏବେ ଏହା୧୮ପ୍ରତିଶତକୁ ଖସିଯାଇଛି । ଫଳରେ ଭାରତର ରପ୍ତାନୀ ବଢିବ । ତେବେ ଭାରତ ଉପରେ ଲାଗିଥିବା ଟାରିଫ ଦକ୍ଷିଣ ଏସିଆର ଅନ୍ୟ ଶକ୍ତିଶାଳୀ ଦେଶ ତୁଳନାରେ ବହୁତ କମ୍ ।

ସମ୍ପର୍କର ନୂଆ ଅଧ୍ୟାୟ

ସମ୍ପର୍କର ନୂଆ ଅଧ୍ୟାୟ । ଦୁଇ ଶକ୍ତିଶାଳୀ ଗଣତନ୍ତ୍ର ମଧ୍ୟରେ ବଡ ଡିଲ୍ ।ଭାରତ-ଆମେରିକା ମଧ୍ୟରେ ହୋଇଛି ଟ୍ରେଡ୍ ଡିଲ୍ । ଆମେରିକା ଦ୍ୱାରା ଲଗାଯାଇଥିବା ଟାରିଫ ମଧ୍ୟ ହ୍ରାସ ହୋଇଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହା ଘୋଷଣା କରିଛନ୍ତି । ଏହା ଅନୁସାରେ ୟୁଏସ ପାରସ୍ପରିକ ଶୁଳ୍କକୁ ୨୫%ରୁ ୧୮%କୁ ହ୍ରାସ କରିବ । ଏନେଇ ସୋସିଆଲ ମିଡିଆରେ ଲେଖିଛନ୍ତି ୟୁଏସ ପ୍ରେସିଡେଣ୍ଟ୍ । ସେ କହିଛନ୍ତି ଯେ, ଭାରତୀୟ ପ୍ରଧାନମନ୍ତ୍ରୀ ମୋଦୀଙ୍କ ସହ କଥା ହେବା ଏକ ସମ୍ମାନର କଥା । ସେ ମୋର ସବୁଠାରୁ ଘନିଷ୍ଠ ବନ୍ଧୁମାନଙ୍କ ମଧ୍ୟରୁ ଜଣେ ଏବଂ ତାଙ୍କ ଦେଶର ଜଣେ ଶକ୍ତିଶାଳୀ ଓ ସମ୍ମାନିତ ନେତା । ଆମେ ବାଣିଜ୍ୟ ଏବଂ ରୁଷ ଓ ୟୁକ୍ରେନ ସହିତ ଯୁଦ୍ଧ ସମାପ୍ତ କରିବା ସମେତ ବିଭିନ୍ନ ବିଷୟ ଉପରେ ଆଲୋଚନା କରିଛୁ । ଭାରତ ରୁଷରୁ ତେଲ କିଣିବା ବନ୍ଦ କରିଦେଇଛି । ଆମେରିକା ଏବଂ ସମ୍ଭବତଃ ଭେନେଜୁଏଲାରୁ ଅଧିକ କିଣିବାକୁ ରାଜି ହୋଇଛି । ଏହା ୟୁକ୍ରେନରେ ଚାଲିଥିବା ଯୁଦ୍ଧର ଅନ୍ତ କରିବାରେ ସାହାଯ୍ୟ କରିବ, ଯାହା ପ୍ରତି ସପ୍ତାହରେ ହଜାର ହଜାର ଲୋକଙ୍କୁ ହତ୍ୟା କରୁଥିବା ସେ ପ୍ରକାଶ କରିଛନ୍ତି ।

ଏହି ଡିଲ୍ ପରେ ଏହାର ପ୍ରଭାର ସିଧାସଳଖ ବ୍ୟବସାୟୀଙ୍କ ଉପରେ ପଡିବ । ଘରୋଇ ବଜାରରେ ଅନେକ ସାମଗ୍ରୀ ଏବେ ଶସ୍ତାରେ ମିଳିବ । ଏହାସହ ଆମେରିକାରେ ଭାରତୀୟ ବସ୍ତୁର ଚାହିଦା ବୃଦ୍ଧି ପାଇବ ।

ଏସିଆରେ ସବୁଠୁ କମ୍ ଟାରିଫ୍

ରିପୋର୍ଟ ଅନୁସାରେ, ଟ୍ରମ୍ପ୍ ଏବେ ଭାରତ ଉପରେ ଟାରିଫରେ ଯେଉଁ ପରିବର୍ତ୍ତନ କରିଛନ୍ତି ତାହା ଅନ୍ୟ ପଡୋଶୀ ଦେଶ ତୁଳନାରେ କମ୍ । ୟୁଏସ ଇଣ୍ଡୋନେସିଆ ଉପରେ ୧୯ ପ୍ରତିଶତ ଟାରିଫ୍ ଲଗାଇଛି । ସେହିପରି ବାଂଲାଦେଶ ଏବଂ ଭିଏତନାମ ଉପରେ ୨୦ ପ୍ରତିଶତ ଟାରିଫ୍ ଲାଗିଛି । ସେପଟେ ଚାଇନା ଉପରେ ୩୫ ପ୍ରତିଶତର ଟାରିଫ୍ ଲାଗିଥିବା ବେଳେ ପାକିସ୍ତାନ ଉପରେ ରହିଛି ୧୯ ପ୍ରତିଶତର ଟାରିଫ୍ ।

ଏହାର ଅର୍ଥ ଅନ୍ୟ ଦେଶରୁ ଆମେରିକାକୁ ହେଉଥିବା ରପ୍ତାନୀ ସହ ଭାରତ କଡା ଟକ୍କର ଦେବ । କମ୍ ଟାରିଫ ଲାଗିବା କାରଣରୁ ଆମେରିକାରେ ଭାରତୀୟ ଜିନିଷ ଶସ୍ତାରେ ମିଳିବ । ଫଳରେ ଅଧିକ ବ୍ୟବସାୟ ହେବ । କମ୍ ଦାମ୍ ଥିବାରୁ ୟୁଏସର ଲୋକେ ଭାରତୀୟ ଜିନିଷକୁ ଅଗ୍ରାଧିକାର ଦେବେ । ଏହା ଦ୍ୱାରା ଭାରତୀୟ କମ୍ପାନୀ ଫାଇଦାରେ ରହିବେ ।