ନୂଆଦିଲ୍ଲୀ: ଦିନ ମଜୁରିଆଙ୍କୁ ଆୟକର ନୋଟିସ୍ । କାମକୁ ଗଲେ ପେଟକୁ ଦାନା ଯାଉଥିବା ପରିବାରକୁ ଆସିଛି ଇନକମ୍ ଟ୍ୟାକ୍ସ ଚିଠି । ଆୟକର ବିଭାଗ ପକ୍ଷରୁ ପ୍ରାୟ ଦୁଇ କୋଟି ଟଙ୍କାର ନୋଟିସ୍ ଲାଗିଛି । ଚିଠି ପଢ଼ିବା ପରେ ପରିବାର ଲୋକଙ୍କ ପାଦ ତଳୁ ମାଟି ଖସିଯାଇଛି । କିଛି ଉପାୟ ନପାଇ ଶେଷରେ କୋର୍ଟଙ୍କ ଦ୍ବାରସ୍ଥ ହୋଇଛନ୍ତି । ଏଭଳି ଘଟଣା ଉତ୍ତର ପ୍ରଦେଶର ଗଞ୍ଜ ଥାନା ଅଞ୍ଚଳରୁ ସାମ୍ନାକୁ ଆସିଛି ।
ସୂଚନା ଅନୁଯାୟୀ, ମୁଜାହିତ ଖାଁ ନାମକ ଜଣେ ଶ୍ରମିକ ଏକ କାଠ ଫାର୍ମରେ ଦିନ ମଜୁରିଆ ଭାବେ କାର୍ଯ୍ୟ କରୁଥିଲା । ଚାକିରି ଆରମ୍ଭ କରିବ ପୂର୍ବରୁ ସ’-ମିଲ୍ ମାଲିକ ତାଙ୍କ ଠାରୁ ଏକ ଫର୍ମ ପୂରଣ କରିବା ସହିତ ପାନକାର୍ଡ ଓ ଆଧାର କାର୍ଡ ନେଇଥିଲେ । ଏହାକୁ ପଞ୍ଜିକୃତ କରିବା ସହତ ଧୋକାଦେଇ କୋଟି କୋଟି ଟଙ୍କାର କାରବାର କରିଥିବା ଅଭିଯୋଗ ହୋଇଛି । ଯାହାଫଳରେ ଦିନ ମଜୁରିଆ ମୁଜାହିତ ଖାଁଙ୍କ ନାଁରେ ୧.୯୨ କୋଟି ଟଙ୍କା ଆୟକର ନୋଟିସ୍ ଲାଗିଛି । ଏନେଇ ସେ ଅଦାଲତଙ୍କ ଦ୍ବାରସ୍ଥ ହୋଇଥିଲେ । କୋର୍ଟ ମାମଲାର ଶୁଣାଣି କରି କାଠ ଫାର୍ମ ମାଲିକଙ୍କ ନାଁରେ ମାମଲା ରୁଜୁ କରିବାକୁ ପୋଲିସକୁ ନିର୍ଦ୍ଦେଶ ଦେଇଛନ୍ତି ।
କେବଳ ଏହି ଗୋଟିଏ ମାମଲା ନୁହେଁ । ଏହା ପୂର୍ବରୁ ଉତ୍ତର ପ୍ରଦେଶର ଫିରୋଜାବାଦରୁ ସାମାନ କେସ୍ ସାମ୍ନାକୁ ଆସିଥିଲା । ଶାମସୁଦ୍ଦିନଙ୍କ ପରିବାରକୁ ଆୟକର ବିଭାଗରୁ ପାଖାପାଖି ପାଞ୍ଚ କୋଟି ଟଙ୍କାର ନୋଟିସ୍ ଲଗାଇଛି ଏବଂ ଏପ୍ରିଲ୍ ୧୭ ତାରିଖ ସୁଦ୍ଧା ଟଙ୍କା ଦାଖଲ କରିବାକୁ କୁହାଯାଇଛି । ଏନେଇ ଟ୍ୟାକ୍ସ ଚିଠି ଆସିବା ପରେ ହତବାକ୍ ହୋଇଯାଇଛନ୍ତି ଶାମସୁଦ୍ଦିନଙ୍କ ପରିବାର । ସେ ଠକେଇର ଶିକାର ହୋଇଥିବା ଅଭିଯୋଗ କରିଛନ୍ତି ।
