ମୁମ୍ଵାଇ ୧୩।୦୯: ସିନେ ଇଣ୍ଡଷ୍ଟ୍ରିରେ ଷ୍ଟାର୍କିଡ୍ ପରମ୍ପରାର ସମ୍ମୁଖୀନ ହେଉଛନ୍ତି ଅଭିନେତ୍ରୀ ରକୁଲ ପ୍ରୀତ ସିଂ । ରଣବୀର ଆହ୍ଲାବାଦିଆଙ୍କ ପଡ୍କାଷ୍ଟ ଶୋ’ରେ ଏ ବିଷୟରେ ସେ ଖୋଲି କଥା ହୋଇଛନ୍ତି । ରକୁଲ କହିଛନ୍ତି, ଷ୍ଟାର୍କିଡ୍ଙ୍କ ପାଇଁ ତାଙ୍କ ହାତରୁ ଅନେକ ଫିଲ୍ମ ଚାଲିଯାଇଛି । କିନ୍ତୁ ଏହାର ପ୍ରଭାବ ସେ ନିଜ ମାନସିକତା ଉପରେ ପଡ଼ିବାକୁ ଦେଇନାହାନ୍ତି ।
ଏନେଇ ସେ କହିଛନ୍ତି, ପ୍ରିୟାପ୍ରୀତିକୁ କେହି ଖଣ୍ଡନ କରିପାରିବେ ନାହିଁ, କାରଣ ଏହା ସବୁ ଇଣ୍ଡଷ୍ଟ୍ରିରେ ରହିଛି । ଏହା ସତ ଯେ ମୋ ହାତରୁ ଏକାଧିକ ଫିଲ୍ମ ଛଡ଼ାଇ ନିଆଯାଇଛି । କିନ୍ତୁ ମୁଁ ସେମିତି ମଣିଷ ନୁହେଁ ଯିଏ ଏଥିରେ ତିକ୍ତତା ପ୍ରଦର୍ଶନ କରିବି । ବୋଧହୁଏ ସେହି ପ୍ରୋଜେକ୍ଟ ମୋ ପାଇଁ ନ ଥିଲା ବୋଲି ଭାବି ମୁଁ ଆଗକୁ ବଢ଼େ । ଏଥିପାଇଁ ମୋତେ ଖରାପ ଲାଗେ । ହେଲେ ତା’ପରେ ମୁଁ ସେଥିରୁ ବାହାରି ଆସେ । ଭବିଷ୍ୟତରେ ରକୁଲଙ୍କ ପିଲା ଯଦି ଫିଲ୍ମ ଇଣ୍ଡଷ୍ଟ୍ରିକୁ ଚୟନ କରିବେ, ତେବେ ସେମାନଙ୍କୁ ସେ ସାହାଯ୍ୟ କରିବେ । ସେ ଯେମିତି ସଂଘର୍ଷ କରିଛନ୍ତି, ନିଜ ପିଲାଙ୍କୁ ସେଭଳି କରିବାକୁ ଦେବେ ନାହିଁ । ଷ୍ଟାର୍ଙ୍କ ପିଲାମାନେ ଯଦି ଇଣ୍ଡଷ୍ଟ୍ରିରେ ସହଜରେ ଏଣ୍ଟ୍ରି କରୁଛନ୍ତି, ତା’ର କାରଣ ସେମାନଙ୍କ ଅଭିଭାବକ କଠିନ ପରିଶ୍ରମ କରିଛନ୍ତି ।
ତେଣୁ ପ୍ରିୟାପ୍ରୀତି ବିଷୟରେ ଅଧିକ ଚିନ୍ତା କରୁନଥିବା ରକୁଲ କହିଛନ୍ତି । ସେ ଆହୁରି କହିଛନ୍ତି, ଯେକୌଣସି ଇଣ୍ଡଷ୍ଟ୍ରିରେ ସୁଯୋଗ ତୁମଠୁ ଛଡ଼ାଇ ନିଆଯାଏ । ଏହାକୁ ତୁମେ ଯେତେ ଶୀଘ୍ର ବୁଝିବ, ତୁମ ପ୍ରଗତି ପାଇଁ ଏହା ବହୁତ ଭଲ । ଜଣେ କଳାକାର ହେବାର ସ୍ୱପ୍ନକୁ ସତରେ ପରିଣତ କରିବାର ଶ୍ରେୟ ତେଲୁଗୁ ଇଣ୍ଡଷ୍ଟ୍ରିକୁ ଦେଇଛନ୍ତି ରକୁଲ । ନିଃସର୍ତ୍ତ ଭଲପାଇବା ପାଇଁ ତେଲୁଗୁ ଦର୍ଶକଙ୍କୁ କୃତଜ୍ଞତା ଜଣାଇଛନ୍ତି ।
