ନୂଆଦିଲ୍ଲୀ: ପହଲଗାମରେ ଆତଙ୍କୀ ହମଲା ପରେ ପାକିସ୍ତାନ ସହ ଭାରତର ଉତ୍ତେଜନାମୂଳକ ସ୍ଥିତି ଲାଗି ରହିଛି । ଏହାକୁ ଦୃଷ୍ଟିରେ ରଖି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ମେ ୯ ତାରିଖରେ ମସ୍କୋରେ ଆୟୋଜିତ ହେବାକୁ ଥିବା ରୁଷ ବିଜୟ ଦିବସ ପରେଡରେ ଯୋଗ ଦେବାର ସମ୍ଭାବନା ନାହିଁ । ଏହା ପୂର୍ବରୁ ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସାମିଲ ହେବାର କାର୍ଯ୍ୟକ୍ରମ ଥିଲା ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରୁଷ ଚଳିତ ବର୍ଷ ଭିକ୍ଟ୍ରି ଡେ ସମାରୋହ ପାଇଁ ଆମନ୍ତ୍ରିତ କରିଥିଲା । କିନ୍ତୁ ପହଲଗାମ ଆତଙ୍କୀ ହମଲା ପରେ ପ୍ରଧାନମନ୍ତ୍ରୀ ମୋଦୀ ନିଜର ରୁଷ ଗସ୍ତ ରଦ୍ଦ କରିଛନ୍ତି । ରାଜନାଥ ସିଂଙ୍କ ଯିବାର ସମ୍ଭାବନା ନ ଥିବାରୁ ଏବେ ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ସଞ୍ଜୟ ସେଠ ଭାରତର ପ୍ରତିନିଧିତ୍ୱ କରିବେ । ରୁଷର ଭିକ୍ଟ୍ି ଡେ ପରେଡ ଦ୍ୱିତୀୟ ବିଶ୍ୱ ଯୁଦ୍ଧରେ ଜର୍ମାନୀ ଉପରେ ସୋଭିଏତ ସଂଘର ବିଜୟର ୮୦ ବର୍ଷ ପୂର୍ତ୍ତି ଉପଲକ୍ଷେ ଆୟୋଜିତ କରାଯାଉଛି । ଏହି କାର୍ଯ୍ୟକ୍ରମକୁ ରୁଷର ଜାତୀୟ ସମ୍ମାନତ ପ୍ରତୀକ ବୋଲି କୁହାଯାଏ । ଏଥିରେ ଅନେକ ବିଶ୍ୱର ନେତା ଓ ସୈନ୍ୟ ପ୍ରତିନିଧି ଯୋଗ ଦେଇଥାନ୍ତି ।
ତେବେ ରୁଷ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଯାତ୍ରା ରଦ୍ଦ କରାଯିବା ପଛରେ କୌଣସି ଆନୁଷ୍ଠାନିକ କାରଣ ଦର୍ଶାଯାଇ ନାହିଁ । କିନ୍ତୁ ଏପ୍ରିଲ ୨୨ରେ ଜମ୍ମୁ-କାଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ହମଲା ପରେ ସୁରକ୍ଷାକୁ ଦୃଷ୍ଟିରେ ରଖି ଉପରୋକ୍ତ ନିଷ୍ପତ୍ତି ନିଆଯାଇଛି । ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ବର୍ଷ ଦୁଇ ଥର ରୁଷ ଯାତ୍ରା କରିଥିଲେ । ଥରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହିତ ବାର୍ଷିକ ସମ୍ମିଳନୀ ପାଇଁ ଏବଂ ଦ୍ୱିତୀୟ ଥର କଜାନରେ ଆୟୋଜିତ ବ୍ରିକ୍ସ ସମ୍ମିଳନୀରେ ଯୋଗ ଦେବା ପାଇଁ ପ୍ରଧାନନନ୍ତ୍ରୀ ରୁଷ ଗସ୍ତ କରିଥିଲେ ।
Also read: ପାକିସ୍ତାନ PM ସରିଫ୍ଙ୍କ ୟୁଟ୍ୟୁବ ଚ୍ୟାନେଲ୍ ଭାରତରେ ବ୍ୟାନ୍, ସୂଚନା ପ୍ରସାରଣ ମନ୍ତ୍ରୀଙ୍କ 'X' ବ୍ୟାନ୍
ରୁଷ ରାଷ୍ଟ୍ରପତି ନିକଟରେ ଘଟିଥିବା ପହଲଗାମ ଆତଙ୍କୀ ହମଲାକୁ କଡା ନିନ୍ଦା କରିଥିଲେ । ଏହାକୁ ସେ ଅତି ନୃଶଂସ ଆକ୍ରମଣ ବୋଲି କହିଥିଲେ । ମୃତକଙ୍କ ପ୍ରିୟଜନକୁ ସମବେଦନା ଜଣାଇବା ସହ ଆତଙ୍କବାଦ ବିରୋଧୀ ଅଭିଯାନରେ ରୁଷ ସର୍ବଦା ଭାରତ ସହ ରହିଥିବା କହିଥିଲେ ।
