ବାଲ୍ୟ ବିବାହରୁ ବଙ୍କୁଲିବାଡ଼ି, ଚାଳ କୁଡ଼ିଆରେ ଏକାଠି ୧୦୦ ବର୍ଷ

ଖଲ୍ଲିକୋଟ: ପ୍ରେମ। ଶାଶ୍ୱତ ଭାବନା। ପବିତ୍ର ସମ୍ପର୍କର ପ୍ରତୀକ। ହେଲେ ପ୍ରେମ ଦେଖେନି ବୟସ। ପ୍ରେମ ପରିବ୍ୟାପ୍ତ ସାଗରର ସୀମାହୀନ ଢ଼େଉ। ପ୍ରେମ କେବଳ ଯୁବବର୍ଗ ଭିତରେ ସୀମିତ ଏହି କଥାକୁ ଭୁଲ ପ୍ରମାଣିତ କରିଛନ୍ତି ଖଲ୍ଲିକୋଟ ଖୋଜାପଲି ଗାଁର ଶତାୟୁ ଦମ୍ପତି। ବୈଷ୍ଣବ ପ୍ରଧାନ ଓ ସମ୍ବାରି ପ୍ରଧାନ। ବୈଷ୍ଣବ ଏବଂ ସମ୍ବାରିଙ୍କ ମନେ ନାହିଁ ବିବାହ ତାରିଖ, କିନ୍ତୁ ପ୍ରତିଦିନ ସକାଳର ସୂର୍ଯ୍ୟ ଆଣେ ଏମାନଙ୍କ ପାଇଁ ନୂଆ ଆଶାର କିରଣ। ଦାମୀ ଗିପ୍ଟ ସିନା ଏମାନଙ୍କ ପାଇଁ ସ୍ୱପ୍ନ କିନ୍ତୁ ୟାଙ୍କୁ ଦେଖିଲେ ଲାଗିବ ପ୍ରେମର ପ୍ରକୃତ ଅର୍ଥ… ସତରେ ଅମୂଲ୍ୟ।

ଶହେ ବର୍ଷ ତଳେ ଉଭୟଙ୍କ ହୋଇଥିଲI ବାଲ୍ୟ ବିବାହ। ବାହାଘରକୁ ୧୦୦ ବର୍ଷ ବିତି ଯାଇଥିଲେ ମଧ୍ୟ ଉଭୟ ପ୍ରେମୀଯୁଗଳଙ୍କ ଠାରୁ କିଛି କମ୍ ନୁହନ୍ତି। ଉଭୟ ଉଭୟଙ୍କ ପାଇଁ ଜନ୍ମ ଜନ୍ମର ସାଥୀ। ସୁଖ ଦୁଃଖକୁ ଆଜିବି ପରସ୍ପର ମଧ୍ୟରେ ଭାଗବାଣ୍ଟି ଖୁବ ଖୁସିରେ ଅଛନ୍ତି ଏମାନେ। ଆଜି ବି ପରସ୍ପର ମଧ୍ୟରେ ବଞ୍ଚି ରହିଛି ସେଇ ସ୍ନେହ ଶ୍ରଦ୍ଧା ଆଉ ଭଲ ପାଇବା। ଘର ବୋଲି ଖଣ୍ଡିଏ ନ ଥିଲେ ମଧ୍ୟ ଭଲ ପାଇବା ଆଗରେ ହାର ମାନିଛି ସବୁକିଛି। ବର୍ତ୍ତମାନ ବୈଷ୍ଣବ ବୟସାଧିକ୍ୟ ହେତୁ ଚାଲିବୁଲି ପାରୁନାହାନ୍ତି ସତ। କିନ୍ତୁ ଆଜିବି ସ୍ୱାମୀଙ୍କ ସେବାରେ ନିଜକୁ ଉତ୍ସର୍ଗୀକୃତ କରିଛନ୍ତି ସ୍ତ୍ରୀ ସମ୍ବାରି।

ଭାଲେଣ୍ଟାଇନ ଡେ’ ଏମାନଙ୍କ ପାଇଁ ଅଜଣା ସତ, କିନ୍ତୁ ପରସ୍ପର ପ୍ରତି ସମ୍ମାନ ଓ ଆତ୍ମୀୟତା ଦେଖିଲେ ଲାଗିବ ଏମାନଙ୍କ ପାଇଁ ପ୍ରତିଦିନ ଭାଲେଣ୍ଟାଇନ ଡେ’। ପ୍ରେମୀଯୁଗଳଙ୍କ ଦିନରେ ଶତାୟୁ ଦମ୍ପତିଙ୍କ ଖୁସି କହିଲେ ନ ସରେ। ଆଜି କାଲି ପ୍ରେମ ଆଳରେ ଧୋକା ଆତ୍ମହତ୍ୟା, ମର୍ଡର ଦେଖିବାକୁ ମିଳୁଛି। ବାଲ୍ୟବିବାହରୁ ବଙ୍କୁଲିବାଡ଼ି… ଆଜିକାଲିର ପ୍ରେମ ସମ୍ପର୍କ ଆଗରେ ବୈଷ୍ଣବ ଓ ସମ୍ବାରିଙ୍କ ପ୍ରେମ ଫିକା।