ସୁନ୍ଦରଗଡ଼ ୧୨।୪: ସୁନ୍ଦରଗଡ଼ ଜିଲ୍ଲାରେ ଚୋରା କୋଇଲା ଖଣିକୁ ନେଇ ସପ୍ତାହେରୁ ଉର୍ଦ୍ଧ୍ବ ସମୟ ଧରି ତୁମ୍ବି ତୋଫାନ ପରେ ଶନିବାର ୪ କୋଇଲା ମାଫିଆଙ୍କୁ ବାନ୍ଧିଲା ପୋଲିସ । ସୁନ୍ଦରଗଡ଼ ହେମଗିରି ତହସିଲର ତେଲେନଡିହି, ରତନସରା, ଜାମକାନୀ, ଭୋଗ୍ରାକଛାର ଜଙ୍ଗଲରେ ଠାବ ହୋଇଥିବା ଚୋରା କୋଇଲା ଖଣି ମାମଲାର ତଦନ୍ତ କରୁଥିବା ସ୍ବତନ୍ତ୍ର ଏନଫୋର୍ସମେଣ୍ଟ ଟିମ୍ ୪ ଜଣ କୋଇଲା ମାଫିଆଙ୍କୁ ଚିହ୍ନଟ କରିବା ପରେ ପୋଲିସ ଏମାନଙ୍କୁ ଗିରଫ କରିଛି । ସେମାନଙ୍କ ନିକଟରୁ ୨ଟି ଟ୍ରାକ୍ଟର ସହ ଗୋଟିଏ ବାଇକ୍ ଜବତ କରାଯାଇଛି । ଗିରଫ ମାଫିଆ ମାନେ ହେଲେ ରତନସରା ଗାଁର ସମୀର ଦଣ୍ଡସେନା, ରତନପୁର ଗାଁର ଗେଲାନନ୍ଦ ମାଝୀ, ଝୁପ୍ ରୁଙ୍ଗା ଗାଁର ହେମାନନ୍ଦ ସେଠ୍, ଗୋପାଳପୁର ଗାଁର ଆଲୋକ ସିଂ । କୋଇଲା ମାଫିଆ ମାନେ ବେଆଇନ ଭାବେ ଖଣି ଖନନ କରି ବାହାର ରାଜ୍ୟକୁ ଟନ୍ ଟନ୍ କୋଇଲା ଚାଲାଣ କରୁଥିଲେ । ଏହି ମାମଲାରେ ଆହୁରି ଅନେକ ବ୍ୟକ୍ତିଙ୍କ ସଂପୃକ୍ତି ଥିବା ବେଳେ ମାଷ୍ଟରମାଇଣ୍ଡ ନିକଟରେ ଏଯାଏଁ ପହଞ୍ଚି ପାରିନାହିଁ ତଦନ୍ତକାରୀ ଟିମ୍ ।
ଶନିବାର ଦ୍ଵିତୀୟ ଦିନରେ ଖଣି ବିଭାଗର ଏନ୍ଫୋର୍ସମେଣ୍ଟ ଟିମ୍ର ଚଢ଼ାଉ ଜାରି ରହିଛି । ୯ ଜଣିଆ ଟିମ୍ ବିଭିନ୍ନ ଅଞ୍ଚଳ ବୁଲି ଦେଖିବା ସହ ଡ୍ରୋନ୍ କ୍ୟାମେରାରେ ଖଣି ଖନନ ଓ କୋଇଲା ଚାଲାଣର ତଥ୍ୟ ସଂଗ୍ରହ କରିବାକୁ ଉଦ୍ୟମ କରିଛି । ଟିମ୍ ସ୍ଥାନୀୟ ପ୍ରଶାସନ ସହ ଆଲୋଚନା କରିଛି । ସୁନ୍ଦରଗଡ଼ ଗୋପାଳପୁର ରେଞ୍ଜ ଅନ୍ତର୍ଗତ ତେଲନଡିହି, ରତନ ସରା, ଭୋଗ୍ରାକଛାର ଓ ଜାମକାନୀ ଜଙ୍ଗଲରେ ଚାଲିଥିଲା ଏହି ଚୋରା କୋଇଲା ଖଣି ଚାଲାଣ । ଏ ନେଇ ଖବର ପ୍ରସାରଣ ଏହାପରେ ଆରମ୍ଭ ହୋଇଥିଲା ଖୋଳତାଡ । ଶେଷରେ ଏହାର ତଦନ୍ତ ପାଇଁ ଖଣି ବିଭାଗ ଗଠନ କରିଥିଲା ସ୍ବତନ୍ତ୍ର ଏନ୍ଫୋର୍ସମେଣ୍ଟ ଟିମ୍ । ଖଣି ବିଭାଗର ଜୁନିଅର ଅଫିସର ହେମଗିରି ଥାନାରେ ଖଣି ଚୋରି ନେଇ ଏତଲା ଦେଇଥିଲେ । ଏତଲା ଆଧାରରେ ପୋଲିସ ୪ ଜଣଙ୍କୁ ଗିରଫ କରିଛି ।
You Can Read:
କୁଳପତିଙ୍କୁ ଡିଜିଟାଲ ଆରେଷ୍ଟ କରି ଠକି ନେଇଥିଲେ ୧୪ଲକ୍ଷ ଟଙ୍କା, ଦୁଇ ସାଇବର ଠକ ଗୁଜରାଟରୁ ଗିରଫ
