ନୂଆଦିଲ୍ଲୀ : ସାରା ଦୁନିଆରେ ପାକିସ୍ତାନର ଅସଲ ମୁଖା ଖୋଲି ଦେଶକୁ ଫେରିଥିବା ପ୍ରତିନିଧିମଣ୍ଡଳର ସଦସ୍ୟଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ସାକ୍ଷାତ୍ କରିଛନ୍ତି। ଏହି ସର୍ବଦଳୀୟ ପ୍ରତିନିଧିମଣ୍ଡଳରେ ଅନେକ ଦଳର ନେତା ସାମିଲ ଥିଲେ। ପିଏମ୍ ମୋଦି ୭ ଲୋକ କଲ୍ୟାଣ ମାର୍ଗ ସ୍ଥିତ ନିବାସରେ ନେତାଙ୍କୁ ସାକ୍ଷାତ୍ କରିଛନ୍ତି।
ସଦସ୍ୟମାନେ ପ୍ରଧାନମନ୍ତ୍ରୀଙ୍କ ସହ ନିଜର ଅନୁଭବ ସେୟାର କରିଛନ୍ତି। କେନ୍ଦ୍ର ସରକାର ପୂର୍ବରୁ ହିଁ ୫୦ରୁ ଅଧିକ ବ୍ୟକ୍ତି ଥିବା ୭ଟି ପ୍ରତିନିଧିମଣ୍ଡଳର କାର୍ଯ୍ୟକପ ପ୍ରଶଂସା କରି କରିଛନ୍ତି, ଯେଉଁଥିରେ ସର୍ବାଧିକ ବର୍ତ୍ତମାନର ସାଂସଦ ଅଛନ୍ତି। ପୂର୍ବତନ ସାଂସଦ ଓ ପୂର୍ବତନ କୂଟନୀତିଜ୍ଞ ମଧ୍ୟ ଏହି ପ୍ରତିନିଧିମଣ୍ଡଳର ଅଂଶ ଥିଲେ, ଯିଏକି ୩୩ ବିଦେଶୀ ରାଜଧାନୀ ଓ ୟୁରୋପୀୟ ସଂଘକୁ ଗସ୍ତ କରିଛନ୍ତି।
ବିଦେଶ ମନ୍ତ୍ରୀ ଏସ୍ ଜୟଶଙ୍କର ପୂର୍ବରୁ ହିଁ ପ୍ରତିନିଧିମଣ୍ଡଳ ସହ ମିଳି ସାରିଛନ୍ତି ଏବଂ ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୋଧରେ ଭାରତର କଡ଼ା ଆଭିମୁଖ୍ୟ ବ୍ୟକ୍ତ କରିବାରେ ତାଙ୍କ ପ୍ରୟାସର ପ୍ରଶଂସା କରି ସାରିଛନ୍ତି। ଚାରି ପ୍ରତିନିଧିମଣ୍ଡଳର ନେତୃତ୍ୱ କ୍ଷମତାସୀନ ଗଠବନ୍ଧନର ସାଂସଦ ମାନେ କରିଛନ୍ତି, ଯେଉଁଥିରେ ବିଜେପିର ଦୁଇ, ଜେଡିୟୁର ଜଣେ ଓ ଶିବସେନାର ଜଣେ ସାଂସଦ ସାମିଲ ଥିଲେ, ତିନି ଜଣର ନେତୃତ୍ୱ ବିରୋଧୀ ସାଂସଦମାନେ କରିଛନ୍ତି, ଯେଉଁଥିରେ କଂଗ୍ରେସ , ଡିଏମକେ ଓ ଏନସିପି (ଏସପି)ର ଜଣେ ଜଣେ ସାଂସଦ ସାମିଲ ଥିଲେ।
ବିଜେପିର ରବିଶଙ୍କର ପ୍ରସାଦ ଓ ବୈଜୟନ୍ତ ପଣ୍ଡା , କଂଗ୍ରେସର ଶଶି ଥରୁର ,ଜେଡି(ୟୁ)ର ସଞ୍ଜୟ ଝା, ଶିବସେନାର ଶ୍ରୀକାନ୍ତ ସିନ୍ଦେ , ଡିଏମକେର କାନିମୋଝି ଏବଂ ଏନସିପି(ଏସପି)ର ସୁପ୍ରିୟା ସୁଲେ ଆଦି ନେତାମାନେ ବିଶ୍ୱର ବିଭିନ୍ନ ସ୍ଥାନକୁ ନିଜ ନିଜ ପ୍ରତିନିଧିମଣ୍ଡଳର ନେତୃତ୍ୱ ନେଇ ଥିଲେ।
ସରକାର ଆତଙ୍କବାଦ ବିରୋଧରେ ଲଢେଇରେ ରାଷ୍ଟ୍ରୀୟ ଏକତାର ବାର୍ତ୍ତା ଦେବା ପାଇଁ ସର୍ବଦଳୀୟ ପ୍ରତିନିଧିମଣ୍ଡଳ ପଠାଇ ଥିଲେ, ଯେଉଁଥିରେ କଂଗ୍ରେସ ସାଂସଦ ଶଶି ଥରୁର ଓ ଏଆଇଏମଆଇଏମ ସାଂସଦ ଅସଦୁଦ୍ଦିନ ଓବେସିଙ୍କ ଭଳି ବ୍ୟକ୍ତି ବିଦେଶରେ ଭାରତର ସ୍ୱାର୍ଥ ପାଇଁ ଲବି କରିବାକୁ ଶାସକମେଣ୍ଟର ସଦସ୍ୟଙ୍କ ସହ ଯୋଗ ଦେଇଥିଲେ। ପ୍ରତିନିଧିମଣ୍ଡଳୀରେ ପ୍ରମୁଖ ପୂର୍ବତନ ସାଂସଦଙ୍କ ମଧ୍ୟରେ ପୂର୍ବତନ କେନ୍ଦ୍ରମନ୍ତ୍ରୀ ଗୁଲାମ ନବୀ ଆଜାଦ ଓ ସଲମାନ ଖୁର୍ଶୀଦ ସାମିଲ ଥିଲେ।
