ନୂଆଦିଲ୍ଲୀ: ୨୬/୧୧ ମୁମ୍ବାଇ ମାଷ୍ଟରମାଇଣ୍ଡ୍ ତଦବ୍ବୁର ରାଣାଙ୍କୁ ଗୁଡ଼େଇ ତୁଡ଼େଇ ପ୍ରଶ୍ନ କରିଛି ନ୍ୟାସନାଲ୍ ଇନଭେଷ୍ଟିଗେସନ୍ ଏଜେନ୍ସି । ଆତଙ୍କୀକୁ ଏନଆଇଏ ଟିମ୍ ପ୍ରାୟ ୮ରୁ ୧୦ ଘଣ୍ଟା ଜେରା କରି ୨୦୦୮ରେ ହୋଇଥିବା ମୁମ୍ବାଇ ବ୍ଲାଷ୍ଟ ଷଡ଼ଯନ୍ତ୍ରର ପର୍ଦ୍ଦାଫାସ୍ କରିବାକୁ ଚେଷ୍ଟା କରିଥିଲା । ୨୬/୧୧ ହମଲାରେ ୧୬୬ଜଣ ପ୍ରାଣ ହରାଇଥିବା ବେଳେ ୨୩୮ଜଣ ଆହତ ହୋଇଥିଲେ । ଅନ୍ୟପଟେ ତହବ୍ବୁର ରାଣା ଏବେ ଏନଆଇଏ ହେପାଜତ ରହିଛି । ରିମାଣ୍ଡରେ ସେ ଗୋଟିଏ କଲମ, ଏକ ନୋଟ୍ ବୁକ୍ ଓ କୋରାନ ମାଗିଥିଲା ।
ସୂତ୍ର ଅନୁଯାୟୀ, ଏନଆଇଏ ଅଧିକାରୀ ଆତଙ୍କୀ ତହବ୍ବୁର ରାଣାକୁ ସ୍ବାସ୍ଥ୍ୟାବସ୍ଥା ଯାଞ୍ଚ ପାଇଁ ଅନୁମତି ଦେଇଛନ୍ତି । ସେହିପରି ଦିଲ୍ଲୀ ଅଦାଲତଙ୍କ ଆଦେଶ ଅନୁସାରେ ନିଜ ଓକିଲଙ୍କ ସହିତ ଆଲୋଚନା କରିବାକୁ ଅନୁମତି ଦେଇଛନ୍ତି । ଦିଲ୍ଲୀ ଅଦାଲତ ଶୁକ୍ରବାର ଆତଙ୍କୀକୁ ୧୮ ଦିନିଆ ରିମାଣ୍ଡରେ ପଠାଇଛନ୍ତି । ଏନଆଇଏର ମୁଖ୍ୟ ଯାଞ୍ଚ ଅଧିକାରୀ ଜୟା ରାୟଙ୍କ ନେତୃତ୍ବରେ ଟିମ୍ ତହବ୍ବୁର ରାଣାକୁ ପ୍ରତିଦିନ ୮ରୁ ୧୦ ଘଣ୍ଟା ଲେଖାଏଁ ପଚରାଉଚରା କରୁଛି । ମୁମ୍ବାଇ ୨୬/୧୧ ହମଲା ଷଡ଼ଯନ୍ତ୍ରର ପର୍ଦ୍ଦାଫାଶ କରିବାକୁ ପ୍ରୟାସ କରୁଛି । ଆତଙ୍କବାଦୀ ତହବ୍ବୁର ରାଣାକୁ ଏନଆଇଏ ମୁଖ୍ୟାଳୟର ଏକ ହାଇ-ସିକ୍ୟୁରିଟି ଜୋନରେ ରଖାଯାଇଛି । ସେଠାରେ ସୁରକ୍ଷାକର୍ମୀ ୨୪ ଘଣ୍ଟିଆ ପ୍ରହରା ଦେଉଛନ୍ତି ।
ତହବ୍ବୁର ରାଣା ସହିତ ପାକିସ୍ତାନ ଗୁଇନ୍ଦା ଏଜେନ୍ସି ଆଇଏସଆଇ ଓ ଆତଙ୍କୀ ସଂଗଠନ ଲସ୍କର-ଏ-ତୈବାର ସମ୍ପର୍କ ବାବଦରେ ଯାଞ୍ଚ ଏଜେନ୍ସି ଜାଣିବାକୁ ଚେଷ୍ଟା କରିଛି । ଏହା ସହିତ ଦୁବାଇରେ ବସିଥିବା ଆଉ ଏକ ହ୍ୟାଣ୍ଡଲର ବାବଦରେ ପଚରାଉଚରା କରିଛି ଏନଆଇଏ ।
