ମୋକିମ୍‌ଙ୍କ ତେରେଛା ବାଣ : 'ରାଜ୍ୟରେ ଦରକାର ଅଛି ନୂଆ ବିକଳ୍ପ, ଖୁବଶୀଘ୍ର ଗଠନ ହୋଇପାରେ ନୂଆ ଆଞ୍ଚଳିକ ଦଳ'

ଭୁବନେଶ୍ୱର ୦୩।୦୧ : ରାଜ୍ୟରେ ଗଠନ ହେବ କି ଆଉ କିଏ ଆଞ୍ଚଳିକ ଦଳ । ଏପରି କିଛି ଆଭାସ ଦେଲେ ବରିଷ୍ଠ ରାଜନେତା ମହମ୍ମଦ ମୋକିମ୍। ସେ କହିଛନ୍ତି ଯେ, ରାଜ୍ୟରେ ଅନେକ ଯୁବ ନେତୃତ୍ୱଙ୍କୁ ଏକ ବଡ଼ ସୁଯୋଗର ଆବଶ୍ୟକତା ରହିଛି। ସେଥିପାଇଁ ସେ ଆମ ସହ ଯୋଗାଯୋଗରେ ଅଛନ୍ତି। ବୁଦ୍ଧିଜୀବୀଙ୍କ ସହ ଆଲୋଚନା ଚାଲିଛି। କାହା ପାଇଁ କେଉଁ ସ୍ଥାନ କେବେ ଖାଲି ପଡ଼େ ନାହିଁ। କିଏ ନା କିଏ କାହାକୁ ପୂରଣ କରିଥାନ୍ତି। ରାଜ୍ୟରେ ଅନେକ ଉଦୀୟମାନ ଯୁବକ ଅଛନ୍ତି ତାଙ୍କୁ କେବଳ ଏକ ସୁଯୋଗର ଆବଶ୍ୟକତା ରହିଛି। ରାଜ୍ୟରେ ଏବେ ବିଜେପି ସରକାର ଏବଂ ବିଜେଡି ଯେଉଁଭଳି ସ୍ଥିତି ଦେଇ ଗତି କରୁଛନ୍ତି, ସେଥିପାଇଁ ଏକ ବିକଳ୍ପର ଆବଶ୍ୟକତା ରହିଛି।

ଜାନକୀ ବଲ୍ଲଭ ପଟ୍ଟନାୟକଙ୍କ ସ୍ମୃତି ସଭାରେ କଂଗ୍ରେସ ଦଳର ହାଇକମାଣ୍ଡଙ୍କୁ ମୋକିମ୍ ଟାର୍ଗେଟ୍ କରିଛନ୍ତି। ସେ କହିଛନ୍ତି ଯେ, ଯିଏ ନିଜକୁ ନିଜେ ତିଆରି କରିଥିବେ ତାକୁ ସାଇଡ୍ କରି ଅନ୍ୟ କାହାକୁ ଦାୟିତ୍ଵ ଦେଲେ ସଙ୍ଗଠନ ପଛେଇ ଯାଏ। ଯାହା ଏବେ କଂଗ୍ରେସ ଦଳରେ ହୋଇଛି। ଯେତେବେଳେ କମଳ ନାଥ ଓଡ଼ିଶା ଆସି ଜାନକୀବଲ୍ଲଭ ପଟ୍ଟନାୟକଙ୍କୁ ଅତୀତ ବୋଲି କହିଥିଲେ ଏବଂ ଶରତ ପଟ୍ଟନାୟକଙ୍କୁ ପିସିସି ସଭାପତି କରାଗଲା, ସେତେବେଳେ କଂଗ୍ରେସ ଦଳର ଡାଉନଫଲ୍ ଆରମ୍ଭ ହୋଇଥିଲା। ଆଜି ପର୍ଯ୍ୟନ୍ତ ସେହି କ୍ଷତିରୁ କଂଗ୍ରେସ ଉଠି ପାରୁନାହିଁ । ସେତେବେଳେ ସୋନିଆ ଗାନ୍ଧୀ ଜାନକୀଙ୍କ ସହ ଆଲୋଚନା କରିଥିଲେ ଆଜିର ଦିନରେ କଂଗ୍ରେସର ଏଭଳି ସ୍ଥିତି ହୋଇନଥାନ୍ତା।

ସେହିପରି ମୋକିମ ଆହୁରି ମଧ୍ୟ କହିଛନ୍ତି ଯେ, ଦିଲ୍ଲୀ ସୁପ୍ରିମୋ ପିସିସି ସଭାପତି ପଦକୁ ବାରମ୍ବାର ପରିବର୍ତ୍ତନ କରି ରାଜ୍ୟରେ ଭୋଟ ପ୍ରତିଶତକୁ କମାଇ ଦେଇଛନ୍ତି। ଜାନକୀ ବାବୁ ଆଦର୍ଶରେ କଂଗ୍ରେସ ଦଳ ଚାଲିବା ଆବଶ୍ୟକ, କିନ୍ତୁ ଏହି ଆଦର୍ଶରେ କଂଗ୍ରେସ ଦଳର କୌଣସି ନେତା ଚାଲିବାର ଆନ୍ତରିକତା ଦେଖାଯାଉ ନାହିଁ।