ନୂଆଦିଲ୍ଲୀ: ତୁର୍କୀ ଡ୍ରୋନରେ ଭାରତ ଉପରେ ହମଲା କରିଥିଲା ପାକିସ୍ତାନ । ବିଶେଷକରି ଜନବସତି ଅଞ୍ଚଳ ଓ ସୈନ୍ୟ ଅଡ୍ଡାକୁ ଟାର୍ଗେଟ୍ କରିଥିଲା ପଡ଼ୋଶୀ ଦେଶ । ମେ’ ୮ ଓ ୯ ତାରିଖରେ ଏହି ହମଲା ହୋଇଥିଲା । ଏଥିରେ ଜମ୍ମୁରୁ ଜୈସଲମେର ପର୍ଯ୍ୟନ୍ତ ତୁର୍କୀ ଡ୍ରୋନ୍ ଓ ମିସାଇଲ୍ ମାଡ଼ି କରିଥିଲା । ହେଲେ ଭାରତର ଏୟାର ଡିଫେନ୍ସ ସିଷ୍ଟମ ପାକିସ୍ତାନର ସବୁ ମିଶନକୁ ଫେଲ୍ କରି ଦେଇଛି । ଶୁକ୍ରବାର ବିଦେଶ ମନ୍ତ୍ରାଳୟରେ ପ୍ରେସମିଟରେ ଏଭଳି କିଛି କହିଛନ୍ତି ବିଦେଶ ସଚିବ ବିକ୍ରମ ମିଶ୍ରି ।
ଅପରେସନ ସିନ୍ଦୂର ପରେ ପାକିସ୍ତାନ ରକ୍ତ ଚାଉଳ ଚୋବାଉଛି । ଆତଙ୍କବାଦୀଙ୍କୁ ସମର୍ଥନ କରି ଭିତରେ ଭିତରେ ଭାରତରେ ହମଲା କରିବାକୁ ଯୋଜନା ପ୍ରସ୍ତୁତ କରୁଥିଲା । ଗତକାଲି ଭାରତୀୟ ସୀମାକୁ ଲାଗିଥିବା ଅଞ୍ଚଳରେ ସାଧାରଣ ଲୋକଙ୍କୁ ଟାର୍ଗେଟ୍ କରିଥିଲା । ଏହା ସହିତ ଭାରତୀୟ ସେନା କ୍ୟାମ୍ପସକୁ ହମଲା କରାଯାଇଥିଲା । ପାକିସ୍ତାନ ଏହି ହମଲାରେ ତୁର୍କୀ ଡ୍ରୋନ୍ ବ୍ୟବହାର କରିଥିଲା । ଜମ୍ମୁ, ଶ୍ରୀନଗର, ଅବନ୍ତିପୁରା, ପଠାନକୋଟ୍, ଅମୃତସର, କପୁରଥାଲା, ଉଦମପୁର, ଲୁଧିଆନା, ଭଟିଣ୍ଡା, ଜଲନ୍ଦର, ଚଣ୍ଡିଗଡ଼, ଭୁଜ୍, ଜୈସଲମେର ଆଦି ୩୬ଟି ସ୍ଥାନରେ ୪୦୦ରୁ ୫୦୦ ଡ୍ରୋନ୍ ଓ ମିସାଇଲ୍ ମାଡ଼ କରିଥିଲା । ହେଲେ ଭାରତର ଏୟାର ଡିଫେନ୍ସ ସିଷ୍ଟମ ଏଗୁଡ଼ିକ ପ୍ରତିହତ କରିବାରେ ସଫଳ ହୋଇଥିଲା । ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀ ତୁର୍କୀ ଡ୍ରୋନକୁ ଆକାଶରେ ମାରି ଖସାଇପକାଇଥିଲା । ଏନେଇ ବିଦେଶ ମନ୍ତ୍ରାଳୟର ପ୍ରେସ୍ ମିଟ୍ରେ ସୂଚନା ଦେଇଛନ୍ତି ବିଦେଶ ସଚିବ ବିକ୍ରମ ମିଶ୍ରି, ଭାରତୀୟ ସେନାର କର୍ଣ୍ଣେଲ ସୋଫିୟା କୁରେଶି ଓ ବାୟୁସେନା ଓ୍ବିଙ୍ଗ କମାଣ୍ଡର ବ୍ୟୋମିକା ସିଂହ ।
ପ୍ରେସ୍ ସମ୍ବୋଧନରେ ବିଦେଶ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଗୁରୁବାର ହମଲାରେ ପାକିସ୍ତାନ ଯେଉଁ ଡ୍ରୋନ୍ ବ୍ୟବହାର କରିଥିଲା, ତା’ର ଭଗ୍ନାବଶେଷର ଫରେନ୍ସିକ୍ ଯାଞ୍ଚ ହୋଇଛି । ଏଗୁଡ଼ିକ ତୁର୍କୀ ନିର୍ମିତ ଅସିସଗାର୍ଡ ସୋଙ୍ଗାର ମଡେଲ୍ ଡ୍ରୋନ ବୋଲି ସ୍ପଷ୍ଟ ହୋଇଛି । ଏହାକୁ ସୀମାରେ ନୀରିକ୍ଷଣ ଓ ସଠିକ୍ ହମଲା ପାଇଁ ବ୍ୟବହାର କରାଯାଇଥାଏ । ତେବେ ଏହି ସବୁ ଡ୍ରୋନ ଓ ମିସାଇଲକୁ ଭାରତୀୟ ଏୟାର ଡିଫେନ୍ସ ସିଷ୍ଟମ ପ୍ରତିହତ କରିବାରେ ସକ୍ଷମ ହୋଇଛି ।...
