ସ୍ମୃତି ମନ୍ଧାନା-ପଲାସ ମୁଚ୍ଛଲଙ୍କ ବିବାହ ସ୍ଥଗିତ, ବାପାଙ୍କ ସ୍ୱାସ୍ଥ୍ୟ ଖରାପ ହେବା ପରେ ଭାରତୀୟ ଖେଳାଳି ନେଲେ ନିଷ୍ପତ୍ତି

ନୂଆଦିଲ୍ଲୀ: ଟିମ୍ ଇଣ୍ଡିଆର ଷ୍ଟାର ବ୍ୟାଟର ସ୍ମୃତି ମନ୍ଧାନା ଓ ଗୀତିକାର ପଲାସ ମୁଚ୍ଛଲଙ୍କ ବିବାହ ହଠାତ୍ ସ୍ଥିଗତ ହୋଇଯାଇଛି । ରବିବାର ନଭେମ୍ୱର ୨୩ରେ ମହାରାଷ୍ଟ୍ରର ସାଙ୍ଗଲୀରେ ସ୍ମୃତି ଓ ପଲାସଙ୍କ ବିବହା ହୋଇଥାନ୍ତା । କିନ୍ତୁ ଏହା ପୂର୍ବରୁ ବିବାହର ଖୁସିର ପରିବେଶ ଭିତରେ ସ୍ମତିଙ୍କ ବାପା ହଠାତ୍ ଅସୁସ୍ଥ ହୋଇଯାଇଥିଲେ । ସୂଚନା ଅନୁସାରେ, ହଠାତ୍ ଅସୁସ୍ଥ ହେବା ପରେ ସ୍ମୃତିଙ୍କ ବାପା ଶ୍ରୀନିବାସ ମନ୍ଧାନାଙ୍କୁ ତତ୍କାଳରେ ହସ୍ପିଟାଲରେ ଭର୍ତ୍ତି କରାଯାଇଛି । ବାପାଙ୍କ ସ୍ୱାସ୍ଥ୍ୟ ଖରାପ କାରଣରୁ ସ୍ମୃତି ବିବାହକୁ ସ୍ଥଗିତ ରଖିବା ପାଇଁ ନିଷ୍ପତ୍ତି ନେଇଛନ୍ତି ।

ମହାରାଷ୍ଟ୍ରର ସାଙ୍ଗଲୀରେ ସ୍ମୃତି ମନ୍ଧାନାଙ୍କ ନୂଆ ଘରେ କିଛି ଦିନ ଘର ବିବାହର ପ୍ରସ୍ତୁତି ଚାଲିଥିଲା ଓ ସମସ୍ତ ରୀତିନୀତି କରାଯାଉଥିଲା । ରବିବାର ନଭେମ୍ୱର ୨୩ ଅପରାହ୍ଣ ପ୍ରାୟ ୪.୩୦ରେ ବିବାହର ଶୁଭ ମୁହୂର୍ତ୍ତ ଥିଲା, କିନ୍ତୁ ଏହା ପୂର୍ବରୁ ଖୁସି ଫିକା ହୋଇ ଯାଇଥିଲା । ସୂଚନା ଅନୁସାରେ ସକାଳ ଜଳଖିଆ ବେଳେ ମନ୍ଧାନାଙ୍କ ବାପା ହଠାତ୍ ଅସୁସ୍ଥ ହୋଇପାଡ଼ିଥିଲେ । ତାଙ୍କ ସ୍ୱାସ୍ଥ୍ୟରେ ଅବନତି ଘଟିବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତରୀ ଟିମ୍ ତାଙ୍କ ସ୍ୱାସ୍ଥ୍ୟ ଉପରେ ନଜର ରଖିଛନ୍ତି ।

ଗଣମାଧ୍ୟମକୁ ପ୍ରତିକ୍ରିୟା ଦେଇ ସ୍ମୃତି ମନ୍ଧାନାଙ୍କ ମ୍ୟାନେଜର ତୁହିନ ମିଶ୍ର ପୂରା ଘଟଣା କହିଛନ୍ତି । ସେ କହିଛନ୍ତି, "ଆଜି ସକାଳେ ଶ୍ରୀନିବାସ ମନ୍ଧାନା ଜଳଖିଆ ଖାଉଥିବା ସମୟରେ ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇଯାଇଥିଲା । ଆମେ ଭାବିଥିଲୁ ଯେ ସେ ସୁସ୍ଥ ହୋଇଯିବେ, ତେଣୁ ଆମେ କିଛି ସମୟ ଅପେକ୍ଷା କରିଥିଲୁ । କିନ୍ତୁ ତା'ପରେ ତାଙ୍କ ଅବସ୍ଥା ଆହୁରି ଖରାପ ହୋଇଗଲା, ଯାହା ଫଳରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ସ୍ମୃତି ତାଙ୍କ ପିତାଙ୍କ ବହୁତ ନିକଟତର । ତେଣୁ ତାଙ୍କ ବାପା ସମ୍ପୂର୍ଣ୍ଣ ସୁସ୍ଥ ନହେବା ପର୍ଯ୍ୟନ୍ତ ସେ ବିବାହ ନ କରିବାକୁ ନିଷ୍ପତ୍ତି ନେଇଛନ୍ତି ।"

ତୁହିନ ମିଶ୍ର କହିଛନ୍ତି ଯେ ସ୍ମୃତି ବିବାହକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି । ସେ କହିଛନ୍ତି, "ଡାକ୍ତରମାନେ ବର୍ତ୍ତମାନ ଶ୍ରୀନିବାସ ମନ୍ଧାନାଙ୍କ ଅବସ୍ଥା ଉପରେ ନଜର ରଖିଛନ୍ତି । ସେମାନେ କହିଛନ୍ତି ଯେ ତାଙ୍କୁ କିଛି ଦିନ ପାଇଁ ହସ୍ପିଟାଲରେ ରହିବାକୁ ପଡିବ । ତେଣୁ, ସ୍ମୃତି ତାଙ୍କ ବାପା ସମ୍ପୂର୍ଣ୍ଣ ସୁସ୍ଥ ନହେବା ପର୍ଯ୍ୟନ୍ତ ବିବାହ ନକରିବାକୁ ନିଷ୍ପତ୍ତି ନେଇଛନ୍ତି । ବିବାହ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି । ଆମେ ସମସ୍ତଙ୍କୁ ମନ୍ଧନା ପରିବାରର ଗୋପନୀୟତାକୁ ସମ୍ମାନ ଦେବାକୁ ନିବେଦନ କରୁଛୁ ।"