ନୂଆଦିଲ୍ଲୀ: ମୁମ୍ବାଇ ୨୬/୧୧ ଆତଙ୍କବାଦୀ ଆକ୍ରମଣର ମୁଖ୍ୟ ଅଭିଯୁକ୍ତଙ୍କ ମଧ୍ୟରୁ ଅନ୍ୟତମ ତହବୁର ରାଣାକୁ ଆମେରିକାରୁ ଭାରତ ଅଣାଯାଇଛି। ଅନ୍ୟପଟେ ପାକିସ୍ତାନ ତହବୁର ରାଣାକୁ ଚିହ୍ନି ନ ଥିନା କହିଛି। ପାକିସ୍ତାନର ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ତହବୁର ରାଣା ଦୁଇ ଦଶନ୍ଧିରୁ ଅଧିକ ସମୟ ହେବ ନିଜର ପାକିସ୍ତାନୀ କାଗଜପତ୍ରର ନବୀକରଣ କରି ନାହିଁ। ତେଣୁ ସେ ବର୍ତ୍ତମାନ ପାକିସ୍ତାନୀ ନୁହେଁ ବରଂ କାନାଡ଼ାର ନାଗରିକ। 

ମୁମ୍ବାଇ ୨୦୦୮ ଆତଙ୍କୀ ହମଲାର ମୁଖ୍ୟ ଅଭିଯୁକ୍ତ ତହବୁର ରାଣାଙ୍କୁ ଗୁରୁବାର ଅର୍ଥାତ ଏପ୍ରିଲ ୧୦ରେ ସ୍ଵତନ୍ତ୍ର ବିମାନରେ ଭାରତ ଅଣା ଯାଇଛି। ଆମେରିକା ହାଇକୋର୍ଟ ରାଣାର ଆବେଦନ ଖାରଜ କରିବା ପରେ ତାର ଭାରତ ପ୍ରତ୍ୟର୍ପଣ ପଥ ପରିଷ୍କାର ହୋଇଥିଲା। ସେ ଲସ୍କର ଇ ତୋଇବା ଦ୍ଵାରା ୨୦୦୮ରେ ହୋଇଥିବା ଆତଙ୍କବାଦୀ ଆକ୍ରମଣରେ ସଂପୃକ୍ତି ଥିଲା। ତହବୁର ରାଣା ମୁଖ୍ୟ ଷଡ଼ଯନ୍ତ୍ରକାରୀଙ୍କ ମଧ୍ୟରୁ ଜଣେ ଡେଭିଡ କୋଲେମାନ ହେଡଲୀ ଓରଫ ଦାଉଦ ଗିଲାନୀଙ୍କ ନିକଟତର ସହଯୋଗୀ ଥିଲା। 

Also read: କେବେ ହଁ ତ କେବେ ନାଁ: ପାଲଟା ଶୁଳ୍କକୁ ୯୦ ଦିନ ପାଇଁ ସ୍ଥଗିତ ରଖିଲେ ଟ୍ରମ୍ପ, ଚୀନ ଉପରେ ପୁଣି ବଢାଇଲେ ଶୁଳ୍କ

ମୁମ୍ବାଇ ଆତଙ୍କୀ ହମଲାର ଅଭିଯୁକ୍ତ ତହବୁର ରାଣାକୁ ଦିଲ୍ଲୀ ତିହାର ଜେଲ୍‌ର ଉଚ୍ଚ ସୁରକ୍ଷା ସଂପନ୍ନ ଓ୍ଵାର୍ଡରେ ରଖାଯିବ। ଜେଲ୍ କର୍ତ୍ତୃପକ୍ଷଙ୍କ ପକ୍ଷରୁ ଏ ନେଇ ଆବଶ୍ୟକୀୟ ପ୍ରସ୍ତୁତି ସରି ସାରିଛି। ଜେଲ୍ ଅଧିକାରୀ ଅଦାଲତଙ୍କ ଆଦେଶ ଅପେକ୍ଷାରେ ଅଛନ୍ତି। କେନ୍ଦ୍ର ସରକାର ତହବୁର ରାଣା ସମ୍ବନ୍ଧିତ ମାମଲାର ମୋକଦ୍ଦମା ପାଇଁ ଏକ ସ୍ଵତନ୍ତ୍ର ସରକାରୀ ଆଡଭୋକେଟ୍ ନିଯୁକ୍ତ କରିଛନ୍ତି। ଜାରି ଅଧିସୂଚନା ଅନୁଯାୟୀ, କେନ୍ଦ୍ର ଗୃହ ମନ୍ତ୍ରଣାଳୟ  ବରିଷ୍ଠ ଆଇନଜୀବୀ ନରେନ୍ଦ୍ର ମାନଙ୍କୁ ମୁମ୍ବାଇ ଆକ୍ରମଣ ସଂପର୍କିତ ଶୁଣାଣି ପାଇଁ ସ୍ଵତନ୍ତ୍ର ସରକାରୀ ଓକିଲ ଭାବେ ନିଯୁକ୍ତ କରିଛି। 

ସରକାରୀ ସୂତ୍ର ଅନୁଯାୟୀ, ତହବୁର ରାଣା ପାଖରେ କାନାଡ଼ାର ନାଗରିକତା ରହିଛି। ପାକିସ୍ତାନ ସେହି ବଛା ବଛା ଦେଶ ମଧ୍ୟରେ ସାମିଲ ଯିଏ ଦ୍ଵୈତ ନାଗରିକତା ପ୍ରଦାନ କରିଥାଏ। କିନ୍ତୁ ଏଥିରେ କିଛି ସର୍ତ୍ତ ମଧ୍ୟ ରହିଛି। ତହବୁର ରାଣା ପାକିସ୍ତାନରେ  National Identity Card for Overseas Pakistanis (NICOP) କାର୍ଡ ଜରିଆରେ ପ୍ରବେଶ କରି ପାରିବ। ଏହାର ଅର୍ଥ ରାଣା କାନାଡା ପାସପୋର୍ଟରେ ପାକିସ୍ତାନ ଯାତ୍ରା କରି ପାରିବ। ସେ ପାକିସ୍ତାନରେ ଏବେ ବି ପୂର୍ବତନ ନାଗରିକତା ଭାବେ କିଛି ଅଧିକାର ପାଇ ପାରିବ। 

NICOP କଣ ?

NICOP ସେହି ପାକିସ୍ତାନୀ ନାଗରିକଙ୍କୁ ଜାରି କରାଯାଏ, ଯିଏ ବିଦେଶରେ ରହିଥାନ୍ତି ଏବଂ ସେଠାକାର ନାଗରିକତା ଗ୍ରହଣ କରିଥାନ୍ତି। ଏଥିରେ ଆମେରିକା, କାନାଡ଼ା ଓ ୟୁକେରେ ରହୁଥିବା ପାକିସ୍ତାନୀ ସାମିଲ। NICOP କାର୍ଡଧାରୀଙ୍କୁ ପାକିସ୍ତାନ ଆସିବା, ସଂପତ୍ତି କିଣିବା, ବ୍ୟାଙ୍କିଙ୍ଗ ଓ ଅନ୍ୟ ଅଧିକାରର ସୀମିତ ଅନୁମତି ମିଳିଥାଏ। ଏହା ପାସପୋର୍ଟ ପରି ହୋଇ ନ ଥାଏ, ବରଂ ପୁନର୍ବାର ପାକିସ୍ତାନ ଆସିବା ପାଇଁ ଏକ ପରିଚୟ ପତ୍ର।