ନୂଆଦିଲ୍ଲୀ: ବିଳମ୍ବରେ ହେଉ ପଛେ ବୁଦ୍ଧି ଶିଖିଲା ପାକିସ୍ତାନ। ମୌଲାନାଙ୍କୁ ବଡ଼ ଝଟକା। ଏଣିକି ନାବାଳିକା ଝିଅଙ୍କ ସହ ବିବାହ ନିଷେଧ। ଏହି ସମ୍ପର୍କିତ ବିଲରେ ସ୍ୱାକ୍ଷର କରିଛନ୍ତି ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ। ଖୁବ୍ ଶୀଘ୍ର ପାକିସ୍ତାନ ସରକାର ଏ ସମ୍ପର୍କରେ ଏକ ଗେଜେଟ୍ ବିଜ୍ଞପ୍ତି ଜାରି କରିବେ।
ଜିଓ ଟିଭି ଅନୁଯାୟୀ, ନାବାଳିକା ଝିଅଙ୍କ ସହ ବିବାହକୁ ଅପରାଧ ବୋଲି ଘୋଷଣା କରାଯାଇଛି। ପାକିସ୍ତାନ ସରକାରଙ୍କ ନୂତନ ଆଇନ ଅନୁଯାୟୀ, ଏବେ ୧୮ ବର୍ଷରୁ କମ୍ ବୟସର ଝିଅଙ୍କ ସହିତ ବିବାହକୁ ଅପରାଧ ବୋଲି ବିବେଚନା କରାଯିବ। ବିବାହ କରୁଥିବା ଏବଂ ସେମାନଙ୍କୁ ବିବାହ କରାଇଥିବା ଲୋକଙ୍କ ବିରୁଦ୍ଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ।
ଶାହବାଜ ସରିଫଙ୍କ ସରକାର କହିଛନ୍ତି ଯେ ଏହି ନିଷ୍ପତ୍ତି ବିଳମ୍ବରେ ନିଆଯାଇଛି, କିନ୍ତୁ ଏହାକୁ ସଠିକ୍ ଭାବରେ ନିଆଯାଇଛି। ସରକାର ଏହାକୁ ମହିଳାଙ୍କ ପାଇଁ ନିଆଯାଇଥିବା ସର୍ବୋତ୍ତମ ନିଷ୍ପତ୍ତି ବୋଲି କହିଛନ୍ତି। ଏହି ଆଇନ କାର୍ଯ୍ୟକାରୀ ହେବା ସହିତ, ଏବେ ମୌଲବୀମାନେ ସାରିଆ ଅନୁଯାୟୀ ନାବାଳିକା ଝିଅମାନଙ୍କୁ ବିବାହ କରାଇପାରିବେ ନାହିଁ। ଏପରି କରିବା ପାଇଁ ମୌଲବୀଙ୍କ ବିରୁଦ୍ଧରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଇପାରିବ। ଆଇନ ଉଲ୍ଲଂଘନ କଲେ ୩ ବର୍ଷ ଜେଲଦଣ୍ଡର ବ୍ୟବସ୍ଥା ଅଛି।
ଇସଲାମର ସାରିଆ ଆଇନ ଅନୁଯାୟୀ, ବିବାହ କରିବାର ଅଧିକାର ନିକାହ ରେଜିଷ୍ଟ୍ରାର ଏବଂ କାଜିଙ୍କ ପାଖରେ ଅଛି। ପାକିସ୍ତାନରେ କମ୍ ବୟସରେ ବିବାହ ସମ୍ପର୍କରେ ସରକାରଙ୍କ ନିଷ୍ପତ୍ତିକୁ କଡ଼ା ବିରୋଧ କରାଯାଉଛି। ସେଠାକାର ଧର୍ମଗୁରୁମାନେ ପ୍ରତିବାଦ କରିଆସୁଥିଲେ। ପାକିସ୍ତାନ ମୁସଲିମ ପରିଷଦ ଏକ ବିବୃତ୍ତି ଜାରି କରି କହିଛି ଯେ ଏହା ଇସଲାମ ବିରୋଧୀ।
ପରିଷଦ ଅନୁଯାୟୀ, ସରକାର ଏହି ପ୍ରସଙ୍ଗରେ ସେମାନଙ୍କ ସହିତ ପରାମର୍ଶ କରିବାକୁ ମଧ୍ୟ ଆବଶ୍ୟକ ମନେ କରିନଥିଲେ। ପରିଷଦକୁ ପୂର୍ବତନ ଗୃହମନ୍ତ୍ରୀ ଫଜଲ-ଉର ରେହମାନ ଏବଂ ତାଙ୍କ ଦଳ ଜମାତ-ଏ-ଇସଲାମିଙ୍କ ସମର୍ଥନ ରହିଛି। ରେହମାନ ସଂସଦରେ ଏହି ଆଇନକୁ ବିରୋଧ କରିଥିଲେ। ରେହମାନ କହିଥିଲେ ଯେ ଲୋକମାନେ ଏହି ଆଇନ ବିରୋଧରେ ରାସ୍ତାକୁ ଓହ୍ଲାଇବେ। ଏହା ଦେଶର ଏକତା ଏବଂ ଅଖଣ୍ଡତାକୁ ପ୍ରଭାବିତ କରିବ।
ଜାତିସଂଘର ମହିଳା ଶାଖା ଅନୁଯାୟୀ, ପାକିସ୍ତାନରେ ପ୍ରାୟ 1 କୋଟି 90 ଲକ୍ଷ ବାଲ୍ୟବଧୂ ଅଛନ୍ତି। ପ୍ରତି ୬ ଜଣ ଝିଅଙ୍କ ମଧ୍ୟରୁ ଜଣେ ୧୮ ବର୍ଷ ବୟସ ପୂର୍ବରୁ ବିବାହ ହୋଇଯାଏ। ଏହି ପରିସଂଖ୍ୟାନ ଉପରେ ଜାତିସଂଘ ପାକିସ୍ତାନ ପ୍ରତି ନିଜର ଅସନ୍ତୋଷ ପ୍ରକାଶ କରିଥିଲା। ଋଣ ପ୍ରଦାନକାରୀ ସଂସ୍ଥା IMF ମଧ୍ୟ ଏହି ପ୍ରସଙ୍ଗରେ ପାକିସ୍ତାନ ଉପରେ ଚାପ ପକାଇଥିଲା।
