ନୂଆଦିଲ୍ଲୀ: ଆମେରିକା କାଲିଫର୍ନିଆ ରାଜ୍ୟର ଲସ୍ ଏଞ୍ଜେଲ୍ସ ଜଙ୍ଗଲରେ ଲାଗିଥିବା ନିଆଁରେ ଏକ ଡଜନ ଲୋକଙ୍କ ମୃତ୍ୟୁ ହୋଇଛି । ସେହିପରି ୧୦ ହଜାରରୁ ଅଧିକ ଘର ଜଳିପୋଡ଼ି ଛାରଖାର ହୋଇଛି । ଶୁଷ୍କ ବାୟୁ ଏବଂ ପବନ ଯୋଗୁଁ ନିଆଁ ଉପରେ ନିୟନ୍ତ୍ରଣ ହାସଲ କରିବା ସମ୍ଭବପର ହେଉ ନାହିଁ । ଏବେ ଏହି ନିଆଁରେ ଲ୍ୟୁମିନାର ଟେକ୍ନୋଲଜିର ସିଇଓ ଅଷ୍ଟିନ ରସେଲଙ୍କ ୧୮ ବେଡ୍ରୁମ୍ ବିଶିଷ୍ଟ ବିଶାଳ କୋଠା ଜଳି ପାଉଁଶ ହୋଇଯାଇଛି । ଅନେକ ବଡ଼ ଶୋ’ର ସୁଟିଂ ପାଇଁ ଏହି କୋଠାକୁ ବ୍ୟବହାର କରାଯାଇଛି । ଏହା କାର୍ଲିଫର୍ଣ୍ଣିଆର ସବୁଠୁ ଦାମୀ ବଙ୍ଗଳା ଥିଲା ।
ବନାଗ୍ନି ଆଁରେ ପାଉଁଶ ହୋଇଥିବା ଏହି ବଙ୍ଗଳାର ମୂଲ୍ୟ ପ୍ରାୟ ୧୨ କୋଟି ଟଙ୍କା ଡଲାର ଅର୍ଥାତ୍ ପ୍ରାୟ ୧୦,୭୭୦ କୋଟି ଟଙ୍କା । ଦିନେ ଯେଉଁ ସ୍ଥାନରେ ଏକ ବିଶାଳ ଦାମୀ ବଙ୍ଗଳା ଥିଲା, ଆଜି ସେଠାରେ କେବଳ ପାଉଁଶ ଗଦା ରହିଛି । ଏହି ବଙ୍ଗଳାରେ ସବୁ ବିଶାଳପୂର୍ଣ୍ଣ ସାମଗ୍ରୀ ଥିଲା । ୨୦ ସିଟର ଥିଏଟର, ୱାଇନ୍ ସେଲର ଏବଂ ଷ୍ଟାରଗୋଜିଂ ଥିଲା । ସେହିପରି ଗତ ବର୍ଷ ଫେବ୍ରୁଆରୀରେ ୨.୦୪ ବିଲିୟନ ଡଲାର ଲଟେରୀ ଜିତିଥିବା ଏଡୱିନ କାସ୍ତ୍ରୋ ହଲିଉଡ୍ ହିଲ୍ସରେ ୨୫ ମିଲିୟନ ଡଲାରରେ ଏକ ବିରାଟ ବଙ୍ଗଳା କିଣିଥିଲେ । ଏବେ ସେହି ସ୍ଥାନରେ କେବଳ କାଠ ପାଉଁଶ ରହିଛି ।
ପାସିଫିକ୍ ପାଲିସାଡେସ୍ ଓ ପାସାଡେନା ଉପକୂଳରେ ପବନର ତୀବ୍ରତା ଏବଂ ବାୟୁମଣ୍ଡଳରେ ଶୁଷ୍କତା ବୃଦ୍ଧି ସାଙ୍ଗକୁ ଘୂର୍ଣ୍ଣିଝଡ଼ ଯୋଗୁ ନିଆଁ ବ୍ୟାପିବାରେ ଲାଗିଛି । ପ୍ରାୟ ୪୦,୦୦୦ ଏକର ଜଙ୍ଗଲ ପାଉଁଶ ହୋଇଗଲାଣି । ୧୫ ହଜାର ଅଗ୍ନିଶମ କର୍ମଚାରୀଙ୍କ ନିରନ୍ତର ଉଦ୍ୟମ ସତ୍ତ୍ୱେ ବନାଗ୍ନିକୁ ଆୟତ୍ତ କରାଯାଇପାରି ନାହିଁ ।
