ହାଇଦ୍ରାବାଦ ୧୦।୫: ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧବିରାମ ପାଇଁ ସହମତି ହୋଇଯାଇଛି। ତେବେ ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓବେସୀ ଏହି ସିଜଫାୟାରକୁ ନେଇ ପ୍ରଶ୍ନ ଉଠାଇଛନ୍ତି। କହିଛନ୍ତି ଯେଉଁ ପର୍ଯ୍ୟନ୍ତ ପାକିସ୍ତାନ ନିଜ ମାଟିକୁ ଭାରତ ବିରୋଧରେ ଆତଙ୍କବାଦ ପ୍ରସାର ପାଇଁ ବ୍ୟବହାର କରୁଥିବ ସେ ପର୍ଯ୍ୟନ୍ତ ସ୍ଥାୟୀ ଶାନ୍ତି ସମ୍ଭବ ନୁହେଁ। ସେ କହିଛନ୍ତି ସିଜଫାୟାର ହେଉ କି ନ ହେଉ ପହଲଗାମ ଆକ୍ରମଣ ଲାଗି ଦାୟୀ ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଜାରି ରହିବା ଦରକାର।
ଓବେସୀ ଭାରତୀୟ ସେନା ଓ ସରକାରଙ୍କୁ ସମର୍ଥନ କରି କହିଛନ୍ତି ଯେ ମୁଁ ସର୍ବଦା ବାହ୍ୟ ଆକ୍ରମଣ ବିରୋଧରେ ସରକାର ଓ ସଶସ୍ତ୍ର ବଳଙ୍କ ସହିତ ଛିଡା ହୋଇଛି ଓ ଏହା ଆଗକୁ ମଧ୍ୟ ଜାରି ରହିବ। ମୁଁ ଆମ ସେନାର ବାହାଦୂରୀ ଓ ଅଦ୍ୱିତୀୟ କୌଶଳକୁ ଉଚ୍ଚ ପ୍ରଶଂସା କରୁଛି। ସେହିପରି ଶହିଦ ଜବାନ ଏମ. ମୂରଲୀ ନାୟକ, ଏଡିସିସି ରାଜକୁମାର ଥାପ୍ପାଙ୍କୁ ଶ୍ରଦ୍ଧାଞ୍ଜଳି ଜଣାଉଛି। ଏହାଛଡା ସଂଘର୍ଷରେ ପ୍ରାଣ ହରାଇଥିବା ଓ ଆହତ ହୋଇଥିବା ନାଗରିକଙ୍କ ନିମନ୍ତେ ପ୍ରାର୍ଥନା କରୁଛି।
ଯୁଦ୍ଧବିରାମ ଯୋଗୁ ସୀମାବର୍ତ୍ତି କ୍ଷେତ୍ରର ଲୋକଙ୍କୁ ଆଶ୍ୱସ୍ତି ମିଳିବ ବୋଲି ଆଶାବ୍ୟକ୍ତ କରିଛନ୍ତି, ତେବେ ଏଥି ପାଇଁ ସରକାରଙ୍କୁ ୪ଟି ପ୍ରଶ୍ନ କରିଛନ୍ତି। ଏଥିରେ ସେ ପ୍ରଥମ ପ୍ରଶ୍ନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କରିଛନ୍ତି। ପଚାରିଛନ୍ତି ଆମ ଦେଶର ପ୍ରଧାନମନ୍ତ୍ରୀଙ୍କ ବଦଳେ ଏକ ବିଦେଶୀ ଦେଶର ରାଷ୍ଟ୍ରପତି ସଂଘର୍ଷ ବୀରାମର ଘୋଷଣା କାହିଁକି କଲେ? ସେ କହିଛନ୍ତି ଯେ ୧୯୭୨ ଶିମଲା ବୁଝାମଣା ପରଠାରୁ ଭାରତ ସର୍ବଦା ତୃତୀୟ ପକ୍ଷ ହସ୍ତକ୍ଷେପର ବିରୋଧ କରିଆସିଛି, ଏଥିରେ ଆମେ ଏବେ ଏହାକୁ ସ୍ୱୀକାର କଲେ କାହିଁକି? ମୁଁ ଆଶା କରୁଛି କାଶ୍ମୀର ପ୍ରସଙ୍ଗର ଅନ୍ତର୍ଜାତୀୟ କରଣ ହେବ ନାହିଁ, କାରଣ ଏହା ଆମର ଆନ୍ତରିକ ମାମଲା।
ସେହିପରି ଦ୍ୱିତୀୟ ପ୍ରଶ୍ନଟି ହେଲା ଏହି ସମ୍ବେଦନଶୀଳ କ୍ଷେତ୍ରରେ ଆଲୋଚନା ଲାଗି କାହିଁକି ପ୍ରସ୍ତୁତ ହେଲେ? ଏହି ସବୁ ବାର୍ତ୍ତାର ଏଜେଣ୍ଡା କଣ ହବ? ତୃତୀୟ ପ୍ରଶ୍ନ ଟି ହେଲା ଆମେରିକା ଏ କଥାର ଗ୍ୟାରେଣ୍ଟି ଦେବ କି ଭବିଷ୍ୟତରେ ପାକିସ୍ତାନ ନିଜ ମାଟିରୁ ପୁଣି ଆତଙ୍କବାଦକୁ ପ୍ରୋତ୍ସାହନ ଦେବନିତ? ସେହିପରି ଚତୁର୍ଥ ପ୍ରଶ୍ନରେ ଆମେ ପାକିସ୍ତାନକୁ ଭବିଷ୍ୟତର ଆତଙ୍କବାଦୀ ଆକ୍ରମଣରୁ ରୋକିବା ଲାଗି ଆମ ଲକ୍ଷରେ ସଫଳ ହୋଇଛେ? ନା କେବଳ ସିଜଫାୟାର ଆମର ଉଦ୍ଦେଶ୍ୟ ଥିଲା ବୋଲି ପ୍ରଶ୍ନ କରିଛନ୍ତି।
