ତାମିଲନାଡୁରେ ପୁଣି ଦୁଇ ବସ୍ ମଧ୍ୟରେ ମୁହଁମୁହିଁ ଧକ୍କା; ୭ ମୃତ, ବଢ଼ିପାରେ ମୃତ୍ୟୁ ସଂଖ୍ୟା

ଚେନ୍ନାଇ: ତାମିଲନାଡୁର ଶିବଗଙ୍ଗା ଜିଲ୍ଲାର ତିରୁପଥୁର ନିକଟରେ ରବିବାର ଦୁଇଟି ସରକାରୀ ବସ୍ ମୁହାଁମୁହିଁ ଧକ୍କା ହେବା ଫଳରେ ୭ ଜଣଙ୍କର ମୃତ୍ୟୁ ହୋଇଛି। ୪୦ ରୁ ଅଧିକ ଲୋକ ଆହତ ହୋଇଥିବା ଖବର ମିଳିଛି । ଦୁର୍ଘଟଣାର କାରଣ ଜାଣିବାକୁ ତଦନ୍ତ ଆରମ୍ଭ ହୋଇଛି।

ପୋଲିସର କହିବା ଅନୁସାରେ, ଗୋଟିଏ ବସ୍ କରିକୁଡି ଏବଂ ଅନ୍ୟଟି ମଦୁରାଇ ଯାଉଥିଲା । ତିରୁପଥୁର ନିକଟସ୍ଥ ଏକ ରାସ୍ତାରେ ଦୁଇଟି ମସ୍ ମଧ୍ୟ ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣା ପରେ ଅନେକ ଯାତ୍ରୀ ଗାଡ଼ି ଭିତରେ ଫସି ରହିଥିଲେ । ସ୍ଥାନୀୟ ଲୋକେ ଏବଂ ଉଦ୍ଧାରକାରୀ ଦଳ ସେମାନଙ୍କୁ ଉଦ୍ଧାର କରିଥିଲେ।

ଆହତମାନଙ୍କୁ ଶିବଗଙ୍ଗା ସରକାରୀ ଡାକ୍ତରଖାନାକୁ ନିଆଯାଇଛି। କିଛି ଯାତ୍ରୀଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ଅଧିକାରୀମାନେ କହିଛନ୍ତି। ପୋଲିସ କହିଛି ଯେ, ଦୁର୍ଘଟଣାରେ ଉଭୟ ବସ୍ର ସମ୍ମୁଖ ଭାଗ ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା । ଘଟଣାସ୍ଥଳରେ ଅନେକ ଲୋକଙ୍କ ମୃତ୍ୟୁ ହୋଇଥିଲା।

ତାମିଲନାଡୁରେ ଗୋଟିଏ ସପ୍ତାହ ମଧ୍ୟରେ ଏହା ଦ୍ୱିତୀୟ ଦୁର୍ଘଟଣା । ସୋମବାର (୨୩ ନଭେମ୍ବର, ୨୦୨୫) ରାଜ୍ୟର ଟେନକାସି ଜିଲ୍ଲାରେ ଦୁଇଟି ବସ୍ ମୁହାଁମୁହିଁ ଧକ୍କା ହୋଇଥିଲା। ଏଥିରେ ୬ ଜଣଙ୍କର ମୃତ୍ୟୁ ହୋଇଥିଲା ଏବଂ ପ୍ରାୟ ୩୦ ଜଣ ଯାତ୍ରୀ ଆହତ ହୋଇଥିଲେ।

ମୃତକଙ୍କ ମଧ୍ୟରେ ପାଞ୍ଚ ଜଣ ମହିଳା ଏବଂ ଜଣେ ପୁରୁଷ ଥିଲେ । ମଦୁରାଇରୁ ସେନକୋଟାଇ ଯାଉଥିବା ଏକ ବସ୍ ଟେନକାସିରୁ କୋଭିଲପଟ୍ଟି ଯାଉଥିବା ଏକ ବସ୍ ସହିତ ଧକ୍କା ହୋଇଥିଲା। ତଦନ୍ତରୁ ଜଣାପଡିଛି ଯେ, ଡ୍ରାଇଭରଙ୍କ ଭୁଲ ଥିଲା। ମଦୁରାଇ-ସେନକୋଟାଇ ବସ୍ର ଡ୍ରାଇଭର ବେପରୁଆ ଏବଂ ଦ୍ରୁତ ଗତିରେ ଗାଡ଼ି ଚଲାଉଥିଲେ।