ନୂଆଦିଲ୍ଲୀ: ଭାରତକୁ ଫେରିଛି ୨୬/୧୧ ମୁମ୍ବାଇ ହମଲା ମାଷ୍ଟରମାଇଣ୍ଡ ତହବ୍ବୁର ରାଣା । ଆମେରିକାରୁ ପ୍ରତ୍ୟର୍ପଣ କରାଯାଇ ଦିଲ୍ଲୀ ଅଣାଯାଇଛି । ସେଠାରେ ଆତଙ୍କବାଦୀକୁ ଏନଆଇଏ ଅଦାଲତରେ ହାଜର କରାଯିବ । ତେବେ ଆତଙ୍କୀ ତହବ୍ବୁରକୁ ଭାରତ ଆଣିବା ପଛରେ ନ୍ୟାଶନାଲ ଇନଭେଷ୍ଟିଗେସନ ଅଧିକାରୀଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିଛି । ଏନଆଇଏ ସ୍ବତନ୍ତ୍ର ଟିମ୍ର ବାରମ୍ବାର ପ୍ରୟାସ ପରେ ଆମେରିକା ଅଦାଲତ, ରାଣାକୁ ଭାରତ ଫେରାଇବା ପାଇଁ ନିର୍ଦ୍ଦେଶ ଦେଇଥିଲେ ।
ଏନଆଇଏର ଏହି ସ୍ବତନ୍ତ୍ର ଟିମରେ ୩ଜଣ ଅଫିସର୍ ମହତ୍ବପୂର୍ଣ୍ଣ ଭୂମିକା ନିଭାଇଛନ୍ତି । ଏମାନେ ହେଲେ ଆଶିଷ୍ ବତ୍ରା, ଜୟା ରାୟ ଓ ପ୍ରଭାତ କୁମାର । ଆଶିଷ୍ ବତ୍ରା ୧୯୯୭ ବ୍ୟାଚ୍ର ଆଇପିଏସ୍ ତଥା ଝାଡ଼ଖଣ୍ଡ କ୍ୟାଡରର ଅଧିକାରୀ । ସେ ବର୍ତ୍ତମାନ ଏନଆଇଏର ଇନ୍ସପେକ୍ଟର ଜେନେରାଲ ଅଛନ୍ତି । ବତ୍ରା ଜହାନାବାଦ ଓ ରାଞ୍ଚି କ୍ଷେତ୍ରରେ ନିୟୋଜିତ ରହିଛନ୍ତି । ଦ୍ବିତୀୟ ଅଧିକାରୀ ହେଉଛନ୍ତି ଜୟା ରାୟ । ସେ ୨୦୧୧ ବ୍ୟାଚର ଆଇପିଏସ୍ ତଥା ଝାଡ଼ଖଣ୍ଡ କ୍ୟାଡରର ଅଧିକାରୀ ଡେପୁଟି ଇନ୍ସପେକ୍ଟର ଜେନେରାଲ ପଦରେ କାର୍ଯ୍ୟରତ । ବର୍ତ୍ତମାନ ଏନଆଇଏର ସିନିୟର ପବ୍ଲିକ୍ ରିଲେସନସିପ୍ ଅଧିକାରୀ ଭାବେ ଦାୟିତ୍ବ ସମ୍ଭାଳୁଛନ୍ତି ।
ସେହିପରି ଅନ୍ୟଜଣେ ଅଧିକାରୀ ହେଉଛନ୍ତି, ପ୍ରଭାତ କୁମାର । ସେ ୨୦୧୯ ବ୍ୟାଚ୍ ଛତିଶଗଡ଼ କ୍ୟାଡରର ଆଇପିଏସ ଅଧିକାରୀ । ଏନଆଇଏର ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ ଭାବେ କାର୍ଯ୍ୟରତ ଆଇପିଏସ୍ ପ୍ରଭାତ କୁମାର ଆମେରିକା ଟିମ୍ରେ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିଲେ । ଆତଙ୍କୀ ତହବ୍ବୁର ରାଣା ଭାରତ ପ୍ରତ୍ୟର୍ପଣ ବେଳେ ସମସ୍ତ ପ୍ରସ୍ତୁତି ଦାୟିତ୍ବ ସମ୍ଭାଳିଥିଲେ । ଦିଲ୍ଲୀ ଏୟାରପୋର୍ଟରୁ ଏନଆଇଏ କାର୍ଯ୍ୟାଳୟ ପର୍ଯ୍ୟନ୍ତ ପୂରା ଅପରେସନର କୋଓର୍ଡିନେଟର ଅଛନ୍ତି । ଏନଆଇଏ ଟିମ୍ ଆମେରିକାରେ ଆଇନଗତ ସମସ୍ତ ପ୍ରକ୍ରିୟା ଶେଷ କରିବା ପରେ ରାଣାକୁ ହେପାଜତକୁ ନେଇଥିଲା ଏବଂ ତାକୁ ଏକ ସ୍ବତନ୍ତ୍ର ବିମାନ ଯୋଗେ ଭାରତ ଆଣିଥିଲେ । ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବ୍ବୁର ରାଣାକୁ ଦିଲ୍ଲୀ ତିହାର ଜେଲରେ ରଖାଯିବ । ଅତଙ୍କୀର ଭାରତ ପ୍ରତ୍ୟାର୍ପଣ ଏକ କୂଟନୈତିକ ଓ ଆଇନଗତ ସଫଳତା ।
ଟାଇମ୍ ଲାଇନ୍:
୨୬/୧୧ ମୁମ୍ବାଇ ଆତଙ୍କବାଦୀ ହମଲାର ମାଷ୍ଟରମାଇଣ୍ଡ୍ ତହବ୍ବୁର ରାଣାର ଭାରତ ପ୍ରତ୍ୟର୍ପଣ ଏକ ଲମ୍ବା ଆଇନ ଓ କୂଟନୈତିକ ପ୍ରକ୍ରିୟା। ରାଣାକୁ ଫେରାଇ ଆଣିବାକୁ ଆମେରିକା ଅଦାଲତରେ ବାରମ୍ବାର ଆବେଦନ ଖାରଜ୍ ହୋଇଥିଲା । ହେଲେ ହାର୍ ମାନିନଥିଲେ କେନ୍ଦ୍ର ସରକାର । ରାଣା ବିରୋଧରେ ପ୍ରମାଣ ଯୋଗାଡ଼ କରିଥିଲେ । ପରେ ଆତଙ୍କବାଦୀ ଭାରତ ଫେରିବା ନେଇ ରାସ୍ତା ସଫା ହୋଇଥିଲା ।
ଅଗଷ୍ଟ ୨୦୨୪: ଆମେରିକାର ନୈଭି ସର୍କିଟ୍ କୋର୍ଟ ଅଫ୍ ଅପିଲ୍ସ ଅତଙ୍କବାଦୀ ତହବ୍ବୁର ରାଣାର ଭାରତ ପ୍ରତ୍ୟର୍ପଣ ଆଦେଶକୁ କାଏମ୍ ରଖିଥିଲେ । ଅଦାଲତଙ୍କ ଏହି ନିଷ୍ପତ୍ତି ରାଣା ବିରୋଧରେ ଭାରତ ପ୍ରମାଣକୁ ମଜଭୁତ କରିଥିଲା ।
ନଭେମ୍ବର ୨୦୨୪: ନିମ୍ନ ଅଦାଲତଙ୍କ ରାୟକୁ ବିରୋଧ କରି ତହବ୍ବୁର ରାଣା ଆମେରିକା ସୁପ୍ରିମ କୋର୍ଟଙ୍କ ଦ୍ବରସ୍ଥ ହୋଇ ଏକ ପୁନଃସମୀକ୍ଷା ଯାଚିକା ଦାୟର କରିଥିଲା । ଏହା ରାଣାଙ୍କ ପକ୍ଷରୁ ଲଢ଼ୁଥିବା ଆଇନଜୀବୀଙ୍କ ବଡ଼ ପଦକ୍ଷେପ ଥିଲା ।
ଜାନୁଆରୀ ୨୦୨୫: ଆମେରିକା ସୁପ୍ରିମକୋର୍ଟ ଆତଙ୍କୀ ତହବ୍ବୁର ରାଣାଙ୍କ ପୁନଃସମୀକ୍ଷା ଆବେଦନକୁ ଖାରଜ୍ କରି ଦେଇଥିଲେ । ଆପେକ୍ସ କୋର୍ଟଙ୍କ ଏହି ନିଷ୍ପତ୍ତି ରାଣାକୁ ଭାରତ ପ୍ରତ୍ୟର୍ପଣ ପାଇଁ ରାସ୍ତା ସଫା ହୋଇଥିଲା ।
ମାର୍ଚ୍ଚ ୨୦୨୫: ତହବ୍ବୁର ରାଣା ଭାରତ ପ୍ରତ୍ୟର୍ପଣ ଆଦେଶ ଉପରେ ରୋକ୍ ଲଗାଇବା ପାଇଁ ଏକ ଜରୁରୀକାଳୀନ ଯାଚିକା ଦାୟର ହୋଇଥିଲା । ମାତ୍ର କୋର୍ଟ ଏହାକୁ ମଧ୍ୟ ଖାରଜ୍ କରିଥିଲେ । ତେବେ ଆଜି ୨୬/୧୧ ମୁମ୍ବାଇ ଆତଙ୍କବାଦୀ ହମଲା ଆତଙ୍କୀ ତହବ୍ବୁର ରାଣା ଭାରତ ଫେରିଛି ।..
