'ଆତଙ୍କବାଦ-ନିଶା କାରବାର ବଡ ଆହ୍ୱାନ' : ଜି୨୦ରେ ସବୁ ଦେଶକୁ ଏକାଠି ହେବାକୁ କହିଲେ ମୋଦୀ

ନୂଆଦିଲ୍ଲୀ, ୨୩|୧୧: ଶନିବାର ଦକ୍ଷିଣ ଆଫ୍ରିକାର ଜୋହାନ୍ସବର୍ଗରେ ଆୟୋଜିତ ଜି-୨୦ ସମ୍ମିଳନୀରେ ଯୋଗ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏଥିରେ ସେ ଆତଙ୍କବାଦ ଉପରେ ଭାରତର ଆଭିମୁଖ୍ୟକୁ ସ୍ପଷ୍ଟ କରିଛନ୍ତି । ଆତଙ୍କବାଦ ବିରୋଧରେ ସାରା ବିଶ୍ୱ ଏକାଠି ହେବା ଦରକାର ବୋଲି କହିଛନ୍ତି ପ୍ରଧାନମନ୍ତ୍ରୀ ।

ସମ୍ମିଳନୀରେ ମୋଦୀ ଦୀର୍ଘମିଆଦି ଯୋଜନା ପ୍ରସ୍ତୁତ କରି ଲକ୍ଷ୍ୟ ହାସଲ ଉପରେ ଗୁରୁତ୍ୱ ଦେଇଥିଲେ । ସେହିପରି ନିଶା କାରବାର, ଆତଙ୍କବାଦକୁ ମିଳିତ ଭାବେ ରୋକିବା, ବେଆଇନ ନିଶା କାରବାରକୁ ବନ୍ଦ କରିବା, ଆତଙ୍କବାଦକୁ ମିଳୁଥିବା ପାଣ୍ଠି ଉପରେ ଲଗାମ ଲଗାଇବା ଦରକାର ବୋଲି ସେ କହିଥିଲେ । ଆହୁରି ମଧ୍ୟ କିପରି ପ୍ରାକୃତିକ ସମ୍ବଳର କ୍ଷୟକୁ ରୋକାଯାଇପାରିବ ସେନେଇ ପ୍ରଧାନମନ୍ତ୍ରୀ ମତ ଦେଇଥିଲେ ।

ସେ କହିଥିଲେ ଯେ, ଆଫ୍ରିକା ମହାଦେଶ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି । ଏଠାରେ ସଠିକ ଭାବେ ବିକାଶ ପହଁଚିପାରି ନାହିଁ । ଆଜି ଆଫ୍ରିକା ଜି୨୦ ସମ୍ମିଳନୀର ଆୟୋଜନ କରୁଛି । ବିକାଶ କହିଲେ କଣ ବୁଝାଯିବ ସେନେଇ ଏକ ମାପଦଣ୍ଡ ରହିବା ଜରୁରୀ । ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଏକ ବିଚାରକୁ ସେ ସମ୍ମିଳନୀରେ ରଖିଥିଲେ । ବ୍ୟକ୍ତି, ପରିବେଶ ଏବଂ ସମାଜକୁ ସମାନ ଭାବେ ଆଗକୁ ନେବାର ଆବଶ୍ୟକତା ରହିଛି । ଏହାଦ୍ୱାରା ଆମେ ବିକାଶ ଏବଂ ପ୍ରକୃତି ମଧ୍ୟରେ ସମନ୍ୱୟ ରକ୍ଷା କରିପାରିବା ବୋଲି କହିଥିଲେ ପ୍ରଧାନମନ୍ତ୍ରୀ ।

ଆହୁରି ମଧ୍ୟ ସେ କହିଥିଲେ ଯେ, ପ୍ରାଚୀନ ଜ୍ଞାନ-କୌଶଳ ଅତି ସମୃଦ୍ଧ । ଏହା ବିଶ୍ୱକୁ ଅନେକ କ୍ଷେତ୍ରରେ ରାସ୍ତା ଦେଖାଇଛି । ସେହିପରି କୌଣସି ବୈଶ୍ୱିକ ସ୍ୱାସ୍ଥ୍ୟ ଜନିତ ସମସ୍ୟାର ମୁକାବିଲା ପାଇଁ ଜି୨୦ ଦେଶମାନେ ଏକ ଆଗକୁ ଅସିବା ଉଚିତ । ଆଫ୍ରିକାର ଯୁବପୀଢିଙ୍କ ଜ୍ଞାନର ବିକାଶ ହେଲେ ଅନ୍ୟ ସମସ୍ତ ଦେଶ ପାଇଁ ଏହା ଲାଭଜନକ ହେବ । ତେଣୁ ଜି୨୦-ଆଫ୍ରିକା କୌଶଳ ପଦ୍ଧତି ଆଫ୍ରିକୀୟ ଯୁବପୀଢିଙ୍କୁ ଅନେକ ମାତ୍ରାରେ ସାହାଯ୍ୟ କରିବ । ଆଗାମୀ ୧୦ ବର୍ଷରେ ୧୦ ଲକ୍ଷ କୁଶଳୀ ଯୁବକଙ୍କୁ ତିଆରି କରିବା ଏହାର ଲକ୍ଷ୍ୟ ହେବା ଉଚିତ ବୋଲି ସେ ପ୍ରକାଶ କରିଥିଲେ ।