ନୂଆଦିଲ୍ଲୀ ୨୫/୦୪: ପହଲଗାମ ଆକ୍ରମଣ ନେଇ ସାରା ଦେଶରେ ଚର୍ଚ୍ଚା । ଆତଙ୍କୀଙ୍କୁ ମୁହଁତୋଡ ଜବାବ ଦେବାକୁ ସବୁରି ମୁହଁରେ ଆଲୋଚନା । ଦିଲ୍ଲୀରୁ ପଲ୍ଲୀ ତେଜିଛି ତୀବ୍ର ପ୍ରତିବାଦ । ଏହାରି ଭିତରେ ନୀରବତା ଭାଙ୍ଗିଛନ୍ତି ଭାରତର ଜାଭେଲିନ୍ ଷ୍ଟାର ନୀରଜ ଚୋପ୍ରା । ପାକିସ୍ତାନୀ ଅଲିମ୍ପିକ୍ ବିଜେତା ଅର୍ଶଦ ନଦୀମଙ୍କୁ ନିମନ୍ତ୍ରଣ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ସେ । ସେ ଏପ୍ରିଲ ୨୫ ତାରିଖରେ ଏକ ବିବୃତ୍ତି ଜାରି କରି କହିଥିଲେ ଯେ ତାଙ୍କ ଦେଶପ୍ରେମ ଉପରେ ପ୍ରଶ୍ନ ଉଠାଯାଉଛି ।
ଅରଶଦ ନଦୀମଙ୍କୁ ନିମନ୍ତ୍ରଣ ପାଇଁ ତାଙ୍କ ପରିବାରକୁ ଟାର୍ଗେଟ କରାଯାଉଛି । ତାଙ୍କୁ ଦୁର୍ବ୍ୟବହାର କରାଯାଉଛି । ତାଙ୍କ ବିରୋଧରେ ଘୃଣା ପ୍ରସାର କରାଯାଉଛି । ଯାହାକୁ ସେ କେବେବି ସହ୍ୟ କରିବେ ନାହିଁ। ନୀରଜ ସ୍ପଷ୍ଟ କରିଛନ୍ତି ଯେ ପହଲଗାମ ଆକ୍ରମଣ ପୂର୍ବରୁ ଅର୍ଶଦଙ୍କୁ ନିମନ୍ତ୍ରଣ ପଠାଯାଇଥିଲା। ହେଲେ ଏବେ ତାଙ୍କ ପାଇଁ ଦେଶ ଓ ଏହାର ସ୍ୱାର୍ଥ ସର୍ବପ୍ରଥମେ।
ନୀରଜ ଚୋପ୍ରା ଏକ ବିବୃତ୍ତି ଜାରି କରି କହିଛନ୍ତି, "ମୁଁ ସର୍ବା କମ୍ କଥାବାର୍ତା କରେ । କିନ୍ତୁ ଏହାର ଅର୍ଥ ଏହା ନୁହେଁ ଯେ ଯେତେବେଳେ ମୋର ଦେଶ ପ୍ରତି ପ୍ରେମ ଓ ମୋ ପରିବାରର ସମ୍ମାନ ଉପରେ ପ୍ରଶ୍ନ ଉଠାଯାଏ ସେତେବେଳେ ମଧ୍ୟ ମୁଁ କହିବି ନାହିଁ। ନୀରଜ ଚୋପ୍ରା କ୍ଲାସିକ୍ରେ ଅଂଶଗ୍ରହଣ କରିବା ପାଇଁ ଅର୍ଶଦ ନଦୀମଙ୍କୁ ନିମନ୍ତ୍ରଣ କରିବା ପାଇଁ ମୋର ନିଷ୍ପତ୍ତି ବିଷୟରେ ବହୁତ ଆଲୋଚନା ହୋଇଛି। କେବେଳ ମୁଁ ନୁହେଁ ମୋ ପରିବାର ବି ବାଦ୍ ପଡିନଥିଲେ ।
ମୁଁ ଅର୍ଶଦଙ୍କୁ ଯେଉଁ ନିମନ୍ତ୍ରଣ ଦେଇଥିଲି ତାହା ଜଣେ ଖେଳାଳିଙ୍କଠାରୁ ଅନ୍ୟ ଜଣେ ଖେଳାଳିଙ୍କୁ ଥିଲା । NC କ୍ଲାସିକ୍ର ଉଦ୍ଦେଶ୍ୟ ଥିଲା ସର୍ବୋତ୍ତମ ଖେଳାଳିମାନଙ୍କୁ ଭାରତ ଆଣିବା ସହ ଆମ ଦେଶକୁ ବିଶ୍ୱସ୍ତରୀୟ କ୍ରୀଡ଼ା ଇଭେଣ୍ଟର ହବ୍ କରିବା । ପହଲଗାମରେ ଆତଙ୍କବାଦୀ ଆକ୍ରମଣର ଦୁଇ ଦିନ ପୂର୍ବରୁ ଏହି ନିମନ୍ତ୍ରଣ ପଠାଯାଇଥିଲା । ଗତ ୪୮ ଘଣ୍ଟା ମଧ୍ୟରେ ଯାହା କିଛି ଘଟିଛି, ତାହା ପରେ, NC କ୍ଲାସିକ୍ରେ ଅର୍ଶଦଙ୍କ ଉପସ୍ଥିତି ନେଇ କୌଣସି ପ୍ରଶ୍ନ ଉଠେ ନାହିଁ। ମୋ ଦେଶ ଓ ଏହାର ସ୍ୱାର୍ଥ ସର୍ବଦା ଆଗ ପ୍ରାଥମିକତା ।
ନୀରଜ ଚୋପ୍ରା ଆହୁରି କହିଛନ୍ତି, "ମୁଁ ଏତେ ବର୍ଷ ଧରି ଗର୍ବର ସହିତ ମୋ ଦେଶର ସେବା କରିଛି । ଆଜି ମୋର ସାଧୁତା ଉପରେ ପ୍ରଶ୍ନ ଉଠାଯାଉଛି । ଯାହା ଦେଖି ବହୁତ ଦୁଃଖ ଲାଗୁଛି। ମୁଁ ଦୁଃଖିତ ଯେ ମୋ ପରିବାରକୁ ଟାର୍ଗେଟ କରୁଥିବା ଲୋକଙ୍କୁ ମୋତେ ବୁଝାଇବାକୁ ପଡୁଛି । ଆମେ ସାଧାରଣ ଲୋକ, ଦୟାକରି ଆମକୁ ଆଉ କିଛି ବୁଝାନ୍ତୁ ନାହିଁ ।
କହିବାକୁ ଗଲେ ନୀରଜ ଚୋପ୍ରାଙ୍କ ନେତୃତ୍ୱରେ ମେ ୨୪ ତାରିଖରୁ ଭାରତରେ ଏନସି କ୍ଲାସିକ୍ ଜାଭେଲିନ୍ ଟୁର୍ଣ୍ଣାମେଣ୍ଟ ଆରମ୍ଭ ହେବାକୁ ଯାଉଛି। ନୀରଜ ଚୋପ୍ରା ସମେତ ବିଶ୍ୱର ଅନେକ ଷ୍ଟାର ଖେଳାଳି ଏଥିରେ ଅଂଶଗ୍ରହଣ କରିବାକୁ ଯାଉଛନ୍ତି । ଏହି ପ୍ରତିଯୋଗିତା ପାଇଁ ପାକିସ୍ତାନର ଜାଭେଲିନ୍ ଷ୍ଟାର ଅର୍ଶଦ ନଦୀମଙ୍କୁ ମଧ୍ୟ ଡକାଯାଇଥିଲା । କିନ୍ତୁ ସେ ନୀରଜଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି । ଭାରତ ଆସିବାକୁ ମନା କରିଛନ୍ତି। ଅର୍ଶଦଙ୍କ ଅନୁଯାୟୀ, ଏହି ସମୟରେ ସେ ଅନ୍ୟ ଟୁର୍ଣ୍ଣାମେଣ୍ଟରେ ବ୍ୟସ୍ତ ରହିବେ। ତେଣୁ, ସେ ଏଥିରେ ଅଂଶଗ୍ରହଣ କରିପାରିବେ ନାହିଁ।
