ଭୁବନେଶ୍ୱର: ଓଡିଶା କବାଡି ସଂଘ ଆନୁକୂଲ୍ୟରେ ତଥା ଓଡିଶା ସରକାରଙ୍କ କ୍ରୀଡା ବିଭାଗ ସହଯୋଗରେ ଫେବୃଆରୀ ୨୦ରୁ ୨୩ ତାରିଖ ପର୍ଯ୍ୟନ୍ତ କଟକର ଇଣ୍ଡୋର ଷ୍ଟାଡିୟମ୍ଠାରେ ଜାତୀୟ ସିନିୟର ପୁରୁଷ କବାଡି ପ୍ରତିଯୋଗିତା-୨୦୨୫ ଆୟୋଜିତ ହେବ। ଏନେଇ ଘୋଷଣା କରିଛନ୍ତି ଓଡିଶା କବାଡି ସଂଘର କର୍ମକର୍ତ୍ତାମାନେ।
ଆଜି ବାରବାଟୀ କବାଡି କମ୍ପେଲକ୍ସରେ ଓଡିଶା କବାଡି ସଂଘର ସଭାପତି ଡ. ଶରତ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ପ୍ରେସ୍ ବିଜ୍ଞପ୍ତିରେ ଅଧ୍ୟକ୍ଷ ରବି ଶଙ୍କର ପ୍ରତିହାରୀ, ସଂଘର କାର୍ଯ୍ୟକାରୀ ସଭାପତି ଦେବେନ୍ଦ୍ର ସାହୁ, ସାଧାରଣ ସମ୍ପାଦକ ଅଜୟ ବେହେରା, ରୁଚି ମସଲାର ନିର୍ଦ୍ଦେଶିକା ରଶ୍ମି ସାହୁ, ଯୁଗ୍ମ ସଂମ୍ପାଦିକା ଜୟଶ୍ରୀ ସ୍ୱାଇଁ, ବିଶିଷ୍ଟ ଚଳଚିତ୍ର ଅଭିନେତା ତଥା ଚଳିତ ବର୍ଷ କବାଡିର ବ୍ରାଣ୍ଡ ଆମ୍ବାସଡର ଶ୍ରୀତମ୍ ଦାସ, ଅନ୍ତର୍ଜାତୀୟ କବାଡି ଖେଳାଳି ତଥା ଓଡିଶା କବାଡି ଦଳର ପ୍ରଶିକ୍ଷକ ଭୀମ ବରଦା, ଓଡିଶା ଅଲମ୍ପିକସଂଘର ସଂପାଦକ ଅଭିଜିତ ପାଲ, କବାଡି ସଂଘର ବରିଷ୍ଠ ସଭ୍ୟ ଜ୍ଞାନ ରଂଜନ ପରିଡା, ମହମ୍ମଦ ସହିଦ ଜବ୍ୱାର, ପ୍ରଶାନ୍ତ ଜେନା ଏବଂ ଚଳିତ ବର୍ଷର ଇଭେଣ୍ଟ କମିଟିର ମୁଖ୍ୟ ଉଲ୍ଲାସ ଚନ୍ଦ୍ର ବେହୁରା, ସଦସ୍ୟ ସତ୍ୟବ୍ରତ ମିଶ୍ର ପ୍ରମୁଖ ଉପସ୍ଥିତ ଥିଲେ।
ପ୍ରଥମଥର ପାଇଁ ଭାରତର ଆର୍ମେଚର କବାଡି ଫେଡେରେସନ ଦିଗ୍ଦର୍ଶନରେ ଓଡିଶାରେ ଏହି କବାଡି ମହାକୁମ୍ଭ ଆୟୋଜନ କରାଯାଉଥିବା ବେଳେ ୩୦ଟି ରାଜ୍ୟ ଓ ୪ ବିଭାଗୀୟ ଦଳ ଏହି ପ୍ରତିଯୋଗିତାରେ ଅଂଶଗ୍ରହଣ କରିବେ। ରାଜ୍ୟ, ଜାତୀୟ ଓ ଆନ୍ତର୍ଜାତୀୟ ସ୍ତରର ୪୫୦ରୁ ଉର୍ଦ୍ଧ୍ୱ ପ୍ରତିଭାବାନ କବାଡି ଖେଳାଳିମାନେ ଏହି ସିନିୟର୍ ପ୍ରତିଯୋଗିତାରେ ପ୍ରତିନିଧିତ୍ୱ କରୁଥିବା ବେଳେ ୫୦ରୁ ଉର୍ଦ୍ଧ୍ୱ ପ୍ରୋକବାଡି ଖେଳାଳି ମଧ୍ୟ ଅଂଶଗ୍ରହଣ କରିବେ ।
ଓଡିଶା ସରକାରଙ୍କ କ୍ରୀଡାବିଭାଗ ୭୧ତମ ଜାତୀୟ ସିନିୟର କବାଡି ପ୍ରତିଯୋଗିତାର ସଫଳ ଆୟୋଜନ ପାଇଁ ସମସ୍ତ ପ୍ରକାର ସହଯୋଗ କରୁଥିବାବେଳେ ଏହି ବିଭାଗୀୟ ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମସ୍ତ କାର୍ଯ୍ୟ ସୂଚାର ରୂପେ କରାଯାଉଛି ବୋଲି ପ୍ରକାଶ କରିଥିଲେ ସଂଘର ସଭାପତି। ଫେବୃୟାରୁ ୨୦ ରୁ ୨୩ ପର୍ଯ୍ୟନ୍ତ ଅନୁଷ୍ଠିତହେବାକୁ ଥିବା ଏହି କବାଡି ମହାକୁମ୍ଭ ଦେଖିବା ପାଇଁ ଇଚ୍ଛୁକ ଦର୍ଶକ, କ୍ରୀଡାପ୍ରେମୀମାନେ ଇଣ୍ଡୋର ଷ୍ଟାଡିଅମ୍, ବାରବାଟୀ କବାଡି କମ୍ପଲେକ୍ସ, ଓଡିଶା କବାଡି ସଂଘ, ରୁଚି ଫ୍ରୋଜିଟ ଆଉଟଲେଟ୍ଠାରେ ପାସ୍ ସଂଗ୍ରହ କରିପାରିବେ।
