ଗତ ଦୁର୍ଗାପୂଜାରୁ ଥିଲା ବିବାଦ, ଅନେକ ଥର ହୋଇଥିଲା ପାଟିତୁଣ୍ଡ : ସୀମା ପାର ହୋଇ ଘଟିଲା ହତ୍ୟାକାଣ୍ଡ

ରାଉରକେଲା ୮।୨: ଚା’ ଦୋକାନୀଙ୍କୁ ହତ୍ୟା ଘଟଣାରେ ୫ ସାମିଲ । ୫ ଜଣଙ୍କ ମଧ୍ୟରୁ ୪ ଜଣଙ୍କୁ ଗିରଫ କରାଯାଇଥିବା ବେଳେ ନାବାଳକଙ୍କୁ ସ୍ବଧାର ଗୃହକୁ ପଠାଇ ଦିଆଯାଇଛି । ରାଉରକେଲା ଘଟିଥିଲା ଏଭଳି ହତ୍ୟାକାଣ୍ଡ ।

ସୂଚନାଯୋଗ୍ୟ ଯେ, ଗତ ୬ ତାରିଖ ଷ୍ଟେସନ ନିକଟ ହୋଟେଲ ଅମର ପ୍ୟାଲେସ ନିକଟ ଶୌଚାଳୟ ଭିତରେ ସମୟ ପ୍ରାୟ ୯ଟା ୧୫ମିନିଟରେ ଚା’ ଦୋକାନୀ ଅବିନାଶ ଯାଦବଙ୍କୁ ୩ ଜଣ ଛୁରୀ ଭୁସି ଘଟଣାସ୍ଥଳରୁ ଚମ୍ପଟ ମାରିଥିଲେ । ଗୁରୁତର ଅବସ୍ଥାରେ ଅବିନାଶଙ୍କୁ ହସ୍ପିଟାଲ ନିଆଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ଘଟଣାସ୍ଥଳରେ ପ୍ଲାଣ୍ଟ ସାଇଟ୍ ପୋଲିସ ସହ ରାଉରକେଲା ଏସ୍ପି ପହଞ୍ଚି ତନାଘନା ଆରମ୍ଭ କରିଥିଲେ । ଆଉ ରବିବାର ହତ୍ୟା ଅଭିଯୋଗରେ ୩ ଜଣଙ୍କ ସହ ୩ ଅଭିଯୁକ୍ତଙ୍କୁ ଫେରାର କରାଇବା ଅଭିଯୋଗରେ ଦୁଇ ଜଣ ମୋଟ୍ ୫ ଜଣଙ୍କୁ ନିଜ ହେପାଜତକୁ ନେଇଥିଲା ପୋଲିସ । ୫ ଜଣଙ୍କ ମଧ୍ୟରେ ଜଣେ ନାବାଳକ ସାମିଲ । ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଉଥିବା ବେଳେ ନାବାଳକକୁ ସ୍ଵଧାର ଗୃହକୁ ପଠାଇ ଦିଆଯାଇଛି ।

ଗୋଟିଏ ବୋଲେରୋ, ଗୋଟିଏ କାର୍ ସହ ୫ଟି ମୋବାଇଲ ଜବତ ହୋଇଛି । ଚା’ ଦୋକାନୀ ଅବିନାଶ ଯାଦବଙ୍କୁ ହତ୍ୟା କରିବାର କାରଣ ପୂର୍ବ ଶତ୍ରୁତା । ଗତ ଦୁର୍ଗାପୂଜାରୁ ଥିଲା ବିବାଦ । ଅନେକ ଥର ହୋଇଥିଲା ପାଟିତୁଣ୍ଡ । ଆଉ ପାଟିତୁଣ୍ଡ ସୀମା ପାର ହୋଇ ଘଟିଲା ହତ୍ୟାକାଣ୍ଡ ।