ମୁମ୍ବାଇ: ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ମୁମ୍ବାଇ ଏବଂ ଏହାର ନିକଟବର୍ତ୍ତୀ ଅଞ୍ଚଳଗୁଡ଼ିକୁ ହାଇ ଆଲର୍ଟ ଜାରି କରାଯାଇଛି।  ମୁମ୍ବାଇର ଚାରିପାଖରେ ଥିବା ସମସ୍ତ ବେଳାଭୂମି ଉପରେ କଡ଼ା ନଜର ରଖାଯାଇଛି। ସମୁଦ୍ରରେ ସତର୍କତା ବୃଦ୍ଧି କରିବା ଏବଂ ସାର୍ବଜନୀନ ସ୍ଥାନରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ମହାରାଷ୍ଟ୍ର ଗୃହ ବିଭାଗ ମୁମ୍ବାଇ ପୋଲିସକୁ ନିର୍ଦ୍ଦେଶ ଦେଇଛି। ସହରର ଉପକୂଳବର୍ତ୍ତୀ ଏରିଆଗୁଡ଼ିକ ଉପରେ ନଜର ରଖିବା ଏବଂ ସମୁଦ୍ରକୂଳରୁ ଆସୁଥିବା ଯେକୌଣସି ପ୍ରକାରର ବିପଦକୁ ରୋକିବା ପାଇଁ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି।

ସେପଟେ ଭାରତ କାଳେ ପ୍ରତିଶୋଧରେ ଆକ୍ରମଣ କରିଦେବ ଏଥିପାଇଁ ପାକିସ୍ତାନ ଆରବ ସାଗର ଅଞ୍ଚଳରେ ଏକ ନୂଆ କ୍ଷେପଣାସ୍ତ୍ର ପରୀକ୍ଷଣ କରିବାର ସମ୍ଭାବନା ରହିଥିବା ଖବର ମିଲିଛି। ଏହି କ୍ଷେପଣାସ୍ତ୍ରର ରେଞ୍ଜ ୪୮୦ କିଲୋମିଟର ରହିଛି। ଗୁରୁବାର କିମ୍ବା ଶୁକ୍ରବାର ପାକିସ୍ତାନ ଏହି କ୍ଷେପଣାସ୍ତ୍ର ପରୀକ୍ଷଣ କରିପାରେ ବୋଲି ସୂଚନା ମିଳିଛି। 

ଏପଟେ ଭାରତ ପାକିସ୍ତାନ ବିରୁଦ୍ଧରେ ଗୋଟିଏ ପରେ ଗୋଟିଏ କୂଟନୈତିକ କାର୍ଯ୍ୟାନୁଷ୍ଠାନ ଗ୍ରହଣ କରି ଚାଲିଛି। ଗୁରୁବାର ସର୍ବଦଳୀୟ ବୈଠକ ବି ବସିଛି। ତେଣୁ ଭାରତ ଭୟରେ ପାକିସ୍ତାନ ତା’ର ବାୟୁସେନାକୁ ସତର୍କ କରାଇ ଦେଇଛି, ଏବଂ ଆରବ ସାଗରରେ ନୋ-ଫ୍ଲାଏ ଜୋନ୍ ଘୋଷଣା କରି ସାରିଛି। ଯଦି ବିମାନ ତା'ର ବାୟୁସୀମା ଅତିକ୍ରମ କରେ ତେବେ ସିଧା ଗୁଳି ଚଳାଇବାର ଚେତାବନୀ ଜାରି କରିଛି ପାକିସ୍ତାନ। 

କେବଳ ସେତିକି ନୁହେଁ ସୀମା ନିକଟରେ ପାକିସ୍ତାନୀ ବାୟୁସେନା ବିମାନଗୁଡ଼ିକର ଅସାଧାରଣ କାର୍ଯ୍ୟକଳାପ ଦେଖିବାକୁ ମିଳିଥିଲା। ଭାରତୀୟ ସୀମା ନିକଟରେ AWACS ବିମାନ ଉଡ଼ାଇଥିଲା ପାକିସ୍ତାନ। ମାମଲା ଉତ୍ତେଜନପୂର୍ଣ୍ଣ ରହିଥିବା ବେଳେ ନାବିକ ଏବଂ ମତ୍ସ୍ୟଜୀବୀମାନଙ୍କୁ ଏହି ଅଞ୍ଚଳରୁ ଦୂରରେ ରହିବାକୁ ପରାମର୍ଶ ଦିଆଯାଇଛି।

ପଢନ୍ତୁ- ଭାରତ ଆମ ସହ ଜଳ ଯୁଦ୍ଧ ଲଢ଼ୁଛି, ନଦୀର ପ୍ରତ୍ୟେକ ବୁନ୍ଦା ଆମର: ପାକିସ୍ତାନ

ସେପଟେ ଆଜି(ଏପ୍ରିଲ ୨୪) ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିହାରରେ ଦେଶବାସୀଙ୍କୁ ସମ୍ବୋଧନ କରି ଆତଙ୍କବାଦୀଙ୍କୁ ତାଙ୍କ କଳ୍ପନାରୁ ବାହାରେ ଦଣ୍ଡ ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି। ମୋଦୀ ଇଂରାଜୀରେ ଚେତାବନୀ ଦେଇ କହିଥିଲେ ଭାରତ ଏହାର ଆତ୍ମା ଉପରେ ଆକ୍ରମଣ କରିବାକୁ ଚେଷ୍ଟା କରୁଥିବା ଲୋକଙ୍କୁ ଭାରତ ଛାଡ଼ିବ ନାହିଁ। ମୋଦୀ କହିଥିଲେ "ଆଜି, ବିହାର ମାଟିରେ, ମୁଁ ସମଗ୍ର ବିଶ୍ୱକୁ କହୁଛି, ଭାରତ ପ୍ରତ୍ୟେକ ଆତଙ୍କବାଦୀ ଏବଂ ସେମାନଙ୍କ ସମର୍ଥକଙ୍କୁ ଚିହ୍ନଟ କରିବ, ଖୋଜି ବାହାର କରିବ ଏବଂ ଦଣ୍ଡ ଦେବ। ଆମେ ସେମାନଙ୍କୁ ପୃଥିବୀର ଶେଷ ପର୍ଯ୍ୟନ୍ତ ପିଛା କରିବୁ। ଆତଙ୍କବାଦ ଦ୍ୱାରା ଭାରତର ଆତ୍ମା କେବେ ଭାଙ୍ଗିବ ନାହିଁ।" 

ଅନ୍ୟପଟେ ଗୁରୁବାର ଭାରତ ପାକିସ୍ତାନ ନାଗରିକଙ୍କ ପାଇଁ ଭିସା ଅନୁମତି ପ୍ରତ୍ୟାହାର କରି ନେଇଛି। ଏପ୍ରିଲ ୨୭ ତାରିଖ ସୁଦ୍ଧା ସମସ୍ତ ପାକିସ୍ତାନୀ ନାଗରିକଙ୍କୁ ଭାରତ ଛାଡ଼ିବାକୁ ନିର୍ଦ୍ଦେଶ ଦେଇଛି। ତା ସହିତ ପାକିସ୍ତାନରେ ରହୁଥିବା ଭାରତୀୟଙ୍କୁ ତୁରନ୍ତ ଫେରିଆସିବାକୁ ମଧ୍ୟ ପରାମର୍ଶ ଜାରି କରାଯାଇଛି।