ମୁମ୍ୱାଇ ୨୭/୦୫: ଦକ୍ଷିଣ ପଶ୍ଚିମ ମୌସୁମୀ ସୋମବାର ଦେଶର ଆର୍ଥିକ ରାଜଧାନୀ ମୁମ୍ବାଇରେ ପହଞ୍ଚିଛି । ଏଥିସହିତ ବିଗତ ୭୫ ବର୍ଷ ମଧ୍ୟରେ ମୁମ୍ବାଇକୁ ସବୁଠୁ ସଅଳ ପ୍ରବେଶ କରିଛି ମୌସୁମୀ । ଭାରତୀୟ ପାଣିପାଗ ବିଭାଗ (ଆଇଏମ୍ଡି)ଅନୁସାରେ, ସାଧାରଣତଃ ଜୁନ୍ ୧୧ ତାରିଖ ବେଳକୁ ମୌସୁମୀ ମୁମ୍ବାଇରେ ପହଞ୍ଚିଥାଏ । କିନ୍ତୁ ଚଳିତଥର ୧୬ ଦିନ ଆଗୁଆ ପହଞ୍ଚିଛି । ସେପଟେ ମୌସୁମୀ ପ୍ରଭାବରୁ ଭୋର୍ରୁ ମୁମ୍ବାଇ ସମେତ ପୂରା ମହାରାଷ୍ଟ୍ରର ବିଭିନ୍ନ ସ୍ଥାନରେ ବର୍ଷା ଜାରି ରହିଛି ।
ମୁମ୍ବାଇରେ ମୌସୁମୀର ପ୍ରଥମ ଦିନରେ ବର୍ଷା ୧୦୭ ବର୍ଷର ରେକର୍ଡ ଭାଙ୍ଗିଛି । ଆଇଏମ୍ଡିର ତଥ୍ୟ ଅନୁସାରେ, ଆଜି ସକାଳ ୮.୩୦ରୁ ୧୧ଟା ମଧ୍ୟରେ କୋଲାବାରେ ୧୦୫.୨ ଏମ୍ଏମ୍ , ସାନ୍ତାକ୍ରୁଜ୍ରେ ୫୫ ଏମ୍ଏମ୍, ବାନ୍ଦ୍ରାରେ ୬୮.୫ ଏମ୍ଏମ୍, ଜୁହୁ ବିମାନବନ୍ଦରରେ ୬୩.୫ ଏମ୍ଏମ୍, ଚେମ୍ବୁରରେ ୩୮.୫ ଏମ୍ଏମ୍, ଭିଖ୍ରୋଲିରେ ୩୭.୫ ଏମ୍ଏମ୍ ବର୍ଷା ରେକର୍ଡ କରାଯାଇଥିଲା । ସେଥିଯୋଗୁ ଏହି ସବୁ ଅଞ୍ଚଳରେ ଜନଜୀବନ ଏକପ୍ରକାର ଠପ୍ ହୋଇପଡ଼ିଛି ।
ବର୍ଷା ସହିତ ମୁମ୍ବାଇରେ ୭୦-୮୦ କିମି ବେଗରେ ପବନ ବି ବହିଥିଲା । ଫଳରେ ଅନେକ ଅଞ୍ଚଳରେ ଗଛ ଭାଙ୍ଗି ରାସ୍ତା ଅବରୋଧ ହୋଇଥିଲା । ତଳିଆ ଅଞ୍ଚଳରେ ବିଭିନ୍ନ ସ୍ଥାନରେ ପାଣି ଜମା ହୋଇଯିବାରୁ ଯାତାୟତ ଲାଗି ସମସ୍ୟା ସୃଷ୍ଟି ହୋଇଥିଲା । ଏପରିକି କିଛି ସ୍ଥାନରେ ବର୍ଷା ପରେ ୭-୮ କିମି ଧରି ଲମ୍ବା ଜାମ୍ ଦେଖିବାକୁ ବି ମିଳିଥିଲା । ପ୍ରବଳ ବର୍ଷା ଯୋଗୁ ନିକଟରେ ଶୁଭାରମ୍ଭ ହୋଇଥିବା ୱର୍ଲି ଅଣ୍ଡରଗ୍ରାଉଣ୍ଡ ମେଟ୍ରୋ ଷ୍ଟେସନରେ ବି ପାଣି ଭର୍ତ୍ତି ହୋଇଯାଇଥିଲା । ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ୍ ମେ ୧ରେ ହିଁ ତାକୁ ଉଦ୍ଘାଟନ କରିଥିଲେ ।
ସେହିପରି ହାର୍ବର, ସେଣ୍ଟ୍ରାଲ ଲାଇନ୍ରେ ଲୋକାଲ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଥିଲା । ତେଣୁ ହଜାର ହଜାର ଯାତ୍ରୀ ଷ୍ଟେସନ୍ରେ ଫସି ରହିଥିଲେ । ବର୍ଷା ପରେ ବି ଆକାଶରେ ଘନବାଦଲ ଦେଖାଯିବା ଯୋଗୁ ସହରରେ ଦୃଶ୍ୟତା କମ୍ ରହିଥିଲା । ଏହା ଫଳରେ ୮ଟି ବିମାନର ଉଡ଼ାଣ ପ୍ରଭାବିତ ହୋଇଥିବା ସୂଚନା ମିଳିଛି । କିଛି ବିମାନକୁ ଡାଇଭର୍ଟ କରାଯାଇଥିଲା । ଏପରିକି ଦୃଶ୍ୟତା କମ୍ ହେବାରୁ ରାସ୍ତାରେ ଲୋକେ ଗାଡିର ଲାଇଟ୍ ଅନ୍ କରି ଡ୍ରାଇଭ୍ କରିଥିଲେ ।
ପାଣିପାଗ ବିଭାଗ ଆଜି ମୁମ୍ବାଇ, ଥାନେ, ରାଇଗଡ ଓ ରତ୍ନଗିରି ଜିଲ୍ଲାରେ ବର୍ଷା ପାଇଁ ପ୍ରଥମେ ଅରେଞ୍ଜ ଆଲର୍ଟ ଜାରି କରିଥିବାବେଳେ ପରେ ତାକୁ ରେଡ୍ ଆଲର୍ଟକୁ ଅପ୍ଗ୍ରେଡ୍ କରାଯାଇଥିଲା । ସେହିପରି ବର୍ଷାକୁ ଦେଖି ବୃହନ୍ମୁମ୍ବାଇ ମ୍ୟୁନିସପାଲ କର୍ପୋରେସନ୍(ବିଏମ୍ସି) ଲୋକଙ୍କୁ ନିହାତି ଆବଶ୍ୟକ ନଥିଲେ ବାହାରକୁ ନ ବାହାରିବାକୁ ନିବେଦନ କରିଛି । ମୁମ୍ବାଇ ବ୍ୟତୀତ ଆଇଏମ୍ଡି ପକ୍ଷରୁ କର୍ଣ୍ଣାଟକ, କେରଳ ଓ ତାମିଲନାଡୁର କିଛି ଅଞ୍ଚଳ ଲାଗି ମଧ୍ୟ ଆଲର୍ଟ ଜାରି ହୋଇଛି । ଇତିମଧ୍ୟରେ କେରଳରେ ଭାରି ବର୍ଷା ଜାରି ରହିଛି ।
ତ୍ରିଶୁରରେ ଚଳନ୍ତା ଟ୍ରେନ୍ ଉପରେ ଏକ ଗଛ ଭାଙ୍ଗି ପଡ଼ିଥିଲା । କୋଝିକୋଡ୍ରେ ସ୍କୁଟର ଚଳାଇବା ସମୟରେ ଜଣେ ବ୍ୟକ୍ତିଙ୍କ ଉପରେ ଗଛ ଖସି ପଡ଼ିବାରୁ ତାଙ୍କର ମୃତ୍ୟୁ ହୋଇଛି । ପ୍ରବଳ ବର୍ଷାକୁ ଦୃଷ୍ଟିରେ ରଖି ରାଜ୍ୟର ୯ଟି ଜିଲ୍ଲାରେ ସ୍କୁଲ-କଲେଜ ବନ୍ଦ ରହିଛି । ଏହାପୂର୍ବରୁ ରବିବାର ପୁନେରେ ବାଦଲଫଟା ବର୍ଷା ହୋଇଥିଲା । ସେଥିଯୋଗୁ ନଦୀ-ନାଳରେ ଅଚାନକ ବନ୍ୟା ଆସିଥିଲା ।
ପୁନେ-ସୋଲାପୁର ରାଜପଥରେ ପାଟସ ଅଞ୍ଚଳରେ ବାଦଲଫଟା ବର୍ଷା ଯୋଗୁ ପୁନେର ବାରାମତୀ ଓ ଇନ୍ଦାପୁରରେ ବନ୍ୟା ସ୍ଥିତି ସୃଷ୍ଟି ହୋଇଥିଲା । ରାସ୍ତା ସବୁ ପାଣିରେ ବୁଡ଼ି ଯାଇଥିଲା । ପ୍ରାୟ ୨୦୦ ଘରେ ପାଣି ଭର୍ତ୍ତି ହୋଇଥିଲା । କିଛି ଗାଡ଼ି ବି ଭାସି ଯାଇଥିଲା । ଏନଡିଆରଏଫ୍ର ୨ଟି ଟିମ୍କୁ ସେଠାରେ ମୁତୟନ କରାଯାଇଛି ।
