ନୂଆଦିଲ୍ଲୀ ୧୫/୦୪: ଆଇପିଏଲ ୨୦୨୫ । ଦୈନିକ ନୂଆ ନୂଆ ଡେବ୍ୟୁଟାଣ୍ଟ । କିଏ ଜବରଦସ୍ତ ବ୍ୟାଟର ତ ଆଉ କିଏ ବୋଲର ସହ ସ୍ପେଲର । ଏହାରି ଭିତରେ ଚେନ୍ନାଇ ବି ଜଣେ ଯୁବ ପ୍ରତିଭାଙ୍କୁ ଦେଇଛି ଚାନ୍ସ । ଆନ୍ଧ୍ର ପ୍ରଦେଶର ଏହି ୨୦ ବର୍ଷୀୟ ବ୍ୟାଟସମ୍ୟାନ ଚେନ୍ନାଇ ସୁପର କିଙ୍ଗ୍ସ ପାଇଁ ଲକ୍ଷ୍ନୌ ସୁପରଜିଆଣ୍ଟସ ବିପକ୍ଷରେ ଡେବ୍ୟୁ କରିଥିଲେ। ସିଏସକେ ଅଧିନାୟକ ମହେନ୍ଦ୍ର ସିଂହ ଧୋନି ରବିଚନ୍ଦ୍ରନ ଅଶ୍ୱିନଙ୍କ ସ୍ଥାନରେ ଶେଖ ରସିଦଙ୍କୁ ଦଳରେ ସାମିଲ କରିଛନ୍ତି ।
ଶେଖ ରସିଦ ତାଙ୍କର ଦ୍ରୁତ ବ୍ୟାଟିଂ ପାଇଁ ଜଣାଶୁଣା । ଏହା ବ୍ୟତୀତ ସେ ଲେଗ୍ ବ୍ରେକ୍ ବୋଲିଂ ମଧ୍ୟ କରନ୍ତି । ସେ ୟଶ ଧୁଲଙ୍କ ଅଧିନାୟକତ୍ୱରେ ଇଂଲଣ୍ଡକୁ ପରାସ୍ତ କରି ୧୯ ବର୍ଷରୁ କମ୍ ବିଶ୍ୱକପ୍ ଜିତିଥିବା ଭାରତୀୟ ଦଳର ଅଂଶ ଥିଲେ । ସେ ଟିମ୍ ଇଣ୍ଡିଆର ଉପ-ଅଧିନାୟକ ଥିଲେ । ସେମିଫାଇନାଲ ଏବଂ ଫାଇନାଲରେ ଚମତ୍କାର ବ୍ୟାଟିଂ କରିଥିଲେ । ଏହା ବ୍ୟତୀତ ସେ ଘରୋଇ କ୍ରିକେଟରେ ଚମତ୍କାର ଇନିଂସ ଖେଳିଥିଲେ।
୧୯ ବର୍ଷରୁ କମ୍ ବିଶ୍ୱକପରେ ଭଲ ପ୍ରଦର୍ଶନ:
୨୦୨୨ରେ, ଟିମ୍ ଇଣ୍ଡିଆ ୧୯ ବର୍ଷରୁ କମ୍ ବିଶ୍ୱକପର ଫାଇନାଲରେ ଇଂଲଣ୍ଡକୁ ପରାସ୍ତ କରି ପଞ୍ଚମ ଥର ପାଇଁ ଟାଇଟଲ ଜିତିଥିଲା । ଏହି ବିଶ୍ୱକପରେ ଉପ-ଅଧିନାୟକ ଶେଖ ରସିଦ ଅନେକ ସ୍ମରଣୀୟ ଇନିଂସ ଖେଳିଥିଲେ । ସେମିଫାଇନାଲରେ ୩୭ ରନରେ ଦୁଇଟି ୱିକେଟ ପଡ଼ିବା ପରେ ସେ ୯୪ ରନର ଏକ ଜବରଦସ୍ତ ଇନିଂସ ଖେଳିଥିଲେ। ଏହା ପରେ, ସେ ଫାଇନାଲରେ ୫୦ ରନର ଏକ ଲଢ଼ୁଆ ଇନିଂସ ଖେଳିଥିଲେ । ଆନ୍ଧ୍ରପ୍ରଦେଶର ଗୁଣ୍ଟୁରର ବାସିନ୍ଦା ଶେଖ ରସିଦ ଟୁର୍ଣ୍ଣାମେଣ୍ଟରେ ୫୦ ହାରରେ ୨୦୧ ରନ କରିଥିଲେ।
ଘରୋଇ କ୍ରିକେଟରେ ଦ୍ୱିଶତକ ହାସଲ :
୨୦ ବର୍ଷୀୟ ଶେଖ ରସିଦ । ଏଲିଟ୍ ଗ୍ରୁପ୍ ବିରେ ଆନ୍ଧ୍ର ପ୍ରଦେଶ ପାଇଁ ୨୦୩ ରନର ଏକ ଦୃଢ଼ ଇନିଂସ ଖେଳି ତାଙ୍କ କ୍ୟାରିୟରର ପ୍ରଥମ ଦ୍ୱିଶତକ ହାସଲ କରିଥିଲେ। ଏହି ଇନିଂସରେ ସେ ୩୭୮ ବଲ୍ ର ସମ୍ମୁଖୀନ ହୋଇଥିଲେ ଏବଂ ୨୮ ଚୌକା ମାରିଥିଲେ । ଶେଖ ରସିଦ ୨୦୨୨ ମସିହାରେ ଆନ୍ଧ୍ରପ୍ରଦେଶ ପାଇଁ ପ୍ରଥମ ଶ୍ରେଣୀ କ୍ରିକେଟରେ ଡେବ୍ୟୁ କରିଥିଲେ।
ପ୍ରଥମ ଶ୍ରେଣୀ କ୍ରିକେଟ ବ୍ୟତୀତ, ଶେଖ ରସିଦ ଲିଷ୍ଟ ଏ ଏବଂ ଟି୨୦ ଫର୍ମାଟରେ ନିଜର ପ୍ରତିଭା ଦେଖାଇଛନ୍ତି। ଲିଷ୍ଟ ଏରେ, ଶେଖ ରସିଦ ୮ଟି ମ୍ୟାଚ୍ ଖେଳି ୬୨ ରନ୍ କରିଛନ୍ତି। ଏହା ବ୍ୟତୀତ ସେ ଟି-୨୦ କ୍ରିକେଟରେ ୧୦ଟି ମ୍ୟାଚ୍ ଖେଳି ୨୯୬ ରନ୍ କରିଛନ୍ତି। ଏଥିରେ ତାଙ୍କର ସର୍ବାଧିକ ସ୍କୋର ହେଉଛି ୧୦୦ ରନ ଅପରାଜିତ।
