ଭୁବନେଶ୍ଵର: ଆଜିଠୁ ଘର ଘର ବୁଲି ଆୟୁଷ୍ମାନ ସ୍ବାସ୍ଥ୍ୟ କାର୍ଡ ବଣ୍ଟନ ପ୍ରକ୍ରିୟା ଆରମ୍ଭ। ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଭୁବନେଶ୍ବର ଡୁମୁଡୁମାରେ ଘରକୁ ଘର ବୁଲି ଆୟୁଷ୍ମାନ କାର୍ଡ ବଣ୍ଟନ କରିଛନ୍ତି। କଟକ ସଦର ଵମ୍ଫକୁଦ ପ୍ରାଥମିକ ଚିକିତ୍ସାଳୟରେ ସାଂସଦ ଭର୍ତ୍ତୃହରି ମହାତାବ କାର୍ଡ ବାଣ୍ଟିଥିବା ବେଳେ ରାଜ୍ୟର ବିଭିନ୍ନ ସ୍ଥାନରେ ମନ୍ତ୍ରୀ, ବିଧାୟକ ଓ ସାଂସଦମାନେ କାର୍ଡ ବଣ୍ଟନରେ ସାମିଲ ହୋଇଛନ୍ତି। ତିନି ମାସରେ ଘର ଘର ବୁଲି ଆଶା କର୍ମୀ କାର୍ଡ ବଣ୍ଟନ ପ୍ରକ୍ରିୟା ସାରିବାକୁ ଲକ୍ଷ୍ୟ ରଖାଯାଇଛି।ଯେଉଁମାନେ କାର୍ଡ ପାଇନଥିବେ କିଛି ସ୍ବାସ୍ଥ୍ୟ ସମସ୍ୟା ହେଲେ ପୁରୁଣା କାର୍ଡ ଓ ଆଧାର ଦେଖାଇ ଦେଶର ୨୯ ହଜାର ଅନୁବନ୍ଧିତ ଡାକ୍ତଖାନାରେ ସ୍ବାସ୍ଥ୍ୟ ସେବା ପାଇପାରିବେ। 

ଆୟୁଷ୍ମାନ କାର୍ଡ ଧରି ଗ୍ରାଉଣ୍ଡରେ ମନ୍ତ୍ରୀ, ବିଧାୟକ ସାଂସଦ।ଘର ଘର ବୁଲି ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ ବାଣ୍ଟିଲେ ସ୍ବାସ୍ଥ୍ୟ କାର୍ଡ।ଆଜିଠାରୁ ରାଜ୍ୟରେ ଘରକୁ ଘର ବୁଲି ଆୟୁଷ୍ମାନ ଭାରତ ଗୋପବନ୍ଧୁ ଜନ ଆରୋଗ୍ୟ ଯୋଜନା ସ୍ବାସ୍ଥ୍ୟ କାର୍ଡ ବଣ୍ଟନ ଆରମ୍ଭ ହୋଇଛି।ସ୍ବାସ୍ଥ୍ୟମନ୍ତ୍ରୀ ଭୁବନେଶ୍ବର ଡୁମୁଡୁମାରେ ଘର ଘର ବୁଲି ଆୟୁଷ୍ମାନ କାର୍ଡ ବଣ୍ଟନର ଶୁଭାରମ୍ଭ କରିଛନ୍ତି।ବିଭିନ୍ନ ସ୍ଥାନରେ ମନ୍ତ୍ରୀ, ବିଧାୟକ, ସାଂସଦ ମାନେ କାର୍ଡ ବଣ୍ଟନରେ ସାମିଲ ହୋଇଛନ୍ତି।

Also read: ଜୁନ୍ ୧୪ ଯାଏଁ ସମୁଦ୍ରରେ ମାଛଧରା ମନା, ୬୧ ଦିନ ପାଇଁ କଟକଣା ଲଗାଇଲେ ରାଜ୍ୟ ସରକାର

ସ୍ବାସ୍ଥ୍ୟମନ୍ତ୍ରୀ କହିଛନ୍ତି ଯୋଜନାରେ ସାଢେ ତିନି କୋଟି ସ୍ବାସ୍ଥ୍ୟ କାର୍ଡ ବଣ୍ଟାଯିବ।୪୮ ହଜାର ଆଶାକର୍ମୀଙ୍କ ଉପରେ ଏହି ଗୁରୁ ଦାୟିତ୍ବ ରହିଛି। ତିନି ମାସରେ କାର୍ଡ ବଣ୍ଟନ ପ୍ରକ୍ରିୟା ସାରିବାକୁ ଲକ୍ଷ୍ୟ ରହିଛି। କାର୍ଡ ପାଇନଥିଲେ ଓ ସ୍ବାସ୍ଥ୍ୟ ସେବା ଆବଶ୍ୟକ ହେଲେ ହିତାଧୀକାରୀ ପୁରୁଣା କାର୍ଡ ଓ ଆଧାର ଦେଖାଇ ଦେଶର ୨୯ ହଜାର ଅନୁବନ୍ଧିତ ଡାକ୍ତଖାନାରେ ସ୍ବାସ୍ଥ୍ୟ ସେବା ପାଇପାରିବେ।ରାଜ୍ୟରେ ୭୦ ବର୍ଷରୁ ଅଧିକ ୨୮ ଲକ୍ଷ  ବରିଷ୍ଠ ନାଗରିକ ବୟୋ ବନ୍ଦନା ଯୋଜନାରେ ସାମିଲ ହୋଇଛନ୍ତି।ଯେଉଁମାନେ ଏଥିରେ   ସାମିଲ ହୋଇନାହାନ୍ତି ଜନ ସେବା କେନ୍ଦ୍ର ଯାଇ ଆବେଦନ କରିବାକୁ ଅପିଲ କରିଛନ୍ତି ସ୍ବାସ୍ଥ୍ୟମନ୍ତ୍ରୀ।

ସେପଟେ କଟକ ଜିଲ୍ଲାର ବିଭିନ୍ନ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଆୟୁଷ୍ମାନ କାର୍ଡ ବଣ୍ଟା ଯାଇଛି।ବମ୍ଫକୁଦ ଚିକିତ୍ସାଳୟରେ ସାଂସଦ ଭର୍ତ୍ତୃହରି ମହତାବ କାର୍ଡ ଵଣ୍ଟନ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ପ୍ରଥମ ପର୍ଯ୍ୟାୟରେ   ଓ୍ବାର୍ଡର ୧୦ଜଣ ଲେଖାଏଁ ହିତାଧିକାରୀଙ୍କୁ କାର୍ଡ ଦିଆଯାଇଛି। ଜିଲ୍ଲାରେ ୧୮ ଲକ୍ଷ କାର୍ଡ ବଣ୍ଟାଯିବାକୁ ଥିବା ବେଳେ ଆଜି ସାଲେପୁର ବ୍ଳକର ରାମେଶ୍ବର, ତେନ୍ତଳ, ପଦ୍ମପୁର, ରାଇସୁଙ୍ଗୁଡ଼ା, କୁଣ୍ଡିପଡ଼ିଆ ସ୍ବାସ୍ଥ୍ୟ ଉପକେନ୍ଦ୍ରରେ କାର୍ଡ ବଣ୍ଟା ଯାଇଛି। ମାହାଙ୍ଗା ବ୍ଲକ୍ର ଏରକଣା,ଭଦ୍ରେଶ୍ବର,ଜୟପୁର, ନୃତାଙ୍ଗ, ପଣସପୁର,ବାସୁଦେବପୁର,  ନିଶିନ୍ତକୋଇଲି ବ୍ଲକର ନଗସପୁରରେ ବିଧାୟକ ସାରଦା ପ୍ରଧାନ ଘର ଘର ଯାଇ କାର୍ଡ ବାଣ୍ଟିଛନ୍ତି। 

ସେହିପରି ବାଙ୍କୀ ଡମପଡା ବ୍ଲକର ତାଳବସ୍ତ ଓ ତୁଳସୀପୁର ସ୍ବାସ୍ଥ୍ୟ କେନ୍ଦ୍ର ଓ ବାଙ୍କୀ ବ୍ଲକର ବ୍ରହ୍ମପୁରା, ଵୈଦେଶ୍ଵର, କଳାପଥର ଓ ବରପୁଟରେ କାର୍ଡ ବଣ୍ଟନ କରାଯାଇଛି। ତାଳବସ୍ତ ସ୍ବାସ୍ଥ୍ୟ କେନ୍ଦ୍ରରେ ବାଙ୍କୀ ବିଧାୟକ ଦେବୀ ରଞ୍ଜନ ତ୍ରିପାଠୀ କାର୍ଡ ବଣ୍ଟନ କରିଛନ୍ତି । ବୟୋ ବନ୍ଦନା ଯୋଜନାରେ ବୟସ ସୀମା ୭୦ଵର୍ଷ ବଦଳରେ ୬୫ ଵର୍ଷ କରିଵା ପାଇଁ ପ୍ରସ୍ତାଵ ସରକାରଙ୍କ ବିଚାରାଧୀନ ଥିବା କହିଛନ୍ତି ସାଂସଦ ଭର୍ତ୍ତୃହରି ମହତାବ। କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନା ରାଜ୍ୟରେ ଲାଗୁ ହୋଇନଥିଲା। ନୂଆ ବିଜେପି ସରକାର ଆସିବା ପରେ ଏହି ଯୋଜନା ଲାଗୁ କରିଛନ୍ତି।