ନୂଆଦିଲ୍ଲୀ : ସଂଘର୍ଷ, ପରିଶ୍ରମ , ସଫଳତା। ଇଏତ ଜୀବନର ଏକ ଅଂଶ। କିନ୍ତୁ ହଁ ଏମିତି ହୁଏ କିଏ କମ୍ ପରିଶ୍ରମରେ ସଫଳତା ପାଏ ଆଉ କିଏ ସଫଳତା ପାଇବାକୁ ଖୁବ୍ ସଂଘର୍ଷ କରେ। ସେ ଯାହା ବି ହେଉ ସଂଘର୍ଷ ଯେତେବେଳେ ସଫଳତାରେ ପରିଣତ ହୁଏ, ତାର ସ୍ୱାଦ ଥାଏ ନିଆରା ନୁହେଁ। ଏମିତି ଏକ ସଫଳତାର କାହାଣୀ ହେଉଛି ୟାମିନୀ ରଙ୍ଗନଙ୍କର। ଆମେରିକାରେ ସର୍ବାଧିକ ଦରମା ପାଉଥିବା ଭାରତୀୟ ବଂଶୋଦ୍ଭବ ସିଇଓଙ୍କ ମଧ୍ୟରୁ ସେ ଜଣେ । ସେ ଏବେ ୨୫.୬୬ ବିଲିୟନ ଡଲାର ଅର୍ଥାତ ପ୍ରାୟ ୨ଲକ୍ଷ କୋଟି ଟଙ୍କା ମୂଲ୍ୟର ଏକ ପ୍ରମୁଖ ସଫ୍ଟୱେର୍ କମ୍ପାନୀ ହବ୍ ସ୍ପଟ୍ର ମୁଖ୍ୟ। ତାଙ୍କ କାହାଣୀ କେବଳ ସଫଳତା ନୁହେଁ, ବରଂ ପୁରୁଷ-ପ୍ରଧାନ ଟେକ୍ ଜଗତରେ ଆଣିଛନ୍ତି ବ୍ୟତିକ୍ରମ । ଆଉ ମଜଭୁଦ କରିଛନ୍ତି ମହିଳାଙ୍କ ସ୍ଥିତି।
ତାମିଲନାଡୁର କୋଏମ୍ବଟୁରରେ ୟାମିନୀଙ୍କ ଜନ୍ମ। ସେ ୨୧ବର୍ଷ ବୟସରେ ତାଙ୍କ ସ୍ୱପ୍ନ ପୂରା କରିବା ପାଇଁ ଆମେରିକା ଚାଲି ଯାଇଥିଲେ। ସାଙ୍ଗରେ ଅଳ୍ପ କିଛି ଟଙ୍କା ନେଇ ଆସିଥିଲେ। ପାଖରେ କୌଣସି ଚାକିରି ନଥିଲା। ଏକ ନୂଆ ପରିବେଶରେ ଆର୍ଥିକ ଚାପର ସମ୍ମୁଖୀନ ହୋଇଥିଲେ। ଏମିତି କି ପେଟ ପୋଷିବାକୁ ତାଙ୍କ ପାଖରେ ଏତେ ଟଙ୍କା ନଥିଲା। କାହିଁକିନା ଅଧିକାଂଶ ଟଙ୍କା ତାଙ୍କର ଭଡ଼ାରେ ଦେବାରେ ଖର୍ଚ୍ଚ ହୋଇଯାଉଥିଲା। ତେଣୁ ୟାମିନୀ ଚାକିରି କରିବାକୁ ବାଧ୍ୟ ହେଲେ। ସେ ଆଟଲାଣ୍ଟାର ଏକ ଫୁଟବଲ୍ ଷ୍ଟାଡିୟମରେ ଖାଦ୍ୟ ପରିବେଷଣକାରୀ ଭାବରେ କାମ କଲେ। ତାଙ୍କୁ ବହୁକଷ୍ଟର ସମ୍ନା କରିବାକୁ ପଡ଼ିଥିଲା। ତା ସତ୍ତ୍ୱେ, ସେ ତାଙ୍କ ବାପା , ମାଆଙ୍କ ଠାରୁ ଆର୍ଥିକ ସାହାଯ୍ୟ ମାଗି ନଥିଲେ। କାରଣ ସେ ନିଜକୁ ପ୍ରମାଣ କରିବାକୁ ଚାହୁଁଥିଲେ ଯେ, ସେ ବିଦେଶରେ ଆତ୍ମନିର୍ଭରଶୀଳ ଏବଂ ସ୍ୱାଧୀନ ହୋଇପାରିବେ।
ଆମେରିକା ଯିବା ପୂର୍ବରୁ, ୟାମିନୀ କୋଏମ୍ବାଟୁରର ଭାରତିଆର ବିଶ୍ୱବିଦ୍ୟାଳୟରୁ କମ୍ପ୍ୟୁଟର ଇଞ୍ଜିନିୟରିଂରେ ସ୍ନାତକ ଡିଗ୍ରୀ ହାସଲ କରିଥିଲେ। ସ୍ଥାନାନ୍ତରିତ ହେବା ପରେ, ସେ ବର୍କଲିର କାଲିଫର୍ନିଆ ବିଶ୍ୱବିଦ୍ୟାଳୟର ପ୍ରତିଷ୍ଠିତ ହାସ୍ ସ୍କୁଲ୍ ଅଫ୍ ବିଜନେସ୍ ରୁ MBA କରିଥିଲେ, ଯାହା ଟେକ୍ନୋଲୋଜି ଶିଳ୍ପରେ ତାଙ୍କ କ୍ୟାରିଅର ପାଇଁ ଏକ ଦୃଢ଼ ମୂଳଦୁଆ ସ୍ଥାପନ କରିଥିଲା। ତାପରେ ୟାମିନୀ ଲୁସେଣ୍ଟ ଟେକ୍ନୋଲୋଜିସ୍, SAP, ୱାର୍କଡେ ଏବଂ ଡ୍ରପବକ୍ସ ସମେତ ଶୀର୍ଷ ପ୍ରଯୁକ୍ତିବିଦ୍ୟା କମ୍ପାନୀ ପାଇଁ କାମ କରିଥିଲେ। ପ୍ରତ୍ୟେକ କମ୍ପାନୀରେ, ସେ ଗ୍ରାହକଙ୍କ ସଫଳତା, ଡିଜିଟାଲ୍ ପରିବର୍ତ୍ତନ ଏବଂ ଉତ୍ପାଦ ରଣନୀତି ଉପରେ ଧ୍ୟାନ ଦେବା ଭଳି ଅନେକ ପଦରେ ଥିଲେ। ଆମେରିକାରେ ନିଜକୁ ପ୍ରତିଷ୍ଠିତ କରିବାକୁ ଚେଷ୍ଟା କରିଥିଲେ ୟାମିନୀ। ସେଥିପାଇଁ 2020 ରେ ମୁଖ୍ୟ ଗ୍ରାହକ ଅଧିକାରୀ ଭାବରେ HubSpot ରେ ଯୋଗ ଦେଇଥିଲେ। ମାତ୍ର ଗୋଟିଏ ବର୍ଷ ମଧ୍ୟରେ, ତାଙ୍କୁ CEO ଭାବରେ ପଦୋନ୍ନତି ଦିଆଯାଇଥିଲା। ସେ COVID-19 ମହାମାରୀ ସମୟରେ ଦାୟିତ୍ୱ ଗ୍ରହଣ କରିଥିଲେ ଏବଂ କମ୍ପାନୀକୁ ଏକ ଭିନ୍ନ ସ୍ଥରକୁ ନେବାରେ ସାହାଯ୍ୟ କରିଥିଲେ। ଏବେ ଜାରି ରହିଛି ୟାମିନୀଙ୍କ ଯାତ୍ରା। ଏବେ ୟାମିନୀଙ୍କ ମୋଟ୍ ସମ୍ପତ୍ତି ପ୍ରାୟ 484 କୋଟି ଟଙ୍କା। ତାଙ୍କର ଉନ୍ନତି ତାଙ୍କୁ ଯୁକ୍ତରାଷ୍ଟ୍ରର ସବୁଠାରୁ ପ୍ରଭାବଶାଳୀ ଏବଂ ଉଚ୍ଚ ଦରମା ପାଉଥିବା ଭାରତୀୟ ବଂଶୋଦ୍ଭବ ମହିଳା ସିଇଓଙ୍କ ମଧ୍ୟରେ ସ୍ଥାନିତ କରିଛି।
ୟାମିନୀଙ୍କ ଯାତ୍ରା ନିଶ୍ଚିତ ଭାବରେ କଠିନ ପରିଶ୍ରମ, ଆତ୍ମବିଶ୍ୱାସ ଏବଂ ଅଧ୍ୟବସାୟର ପ୍ରମାଣ। ସେ ଏବେ ପ୍ରତି ଭାରତୀୟଙ୍କ ପାଇଁ ସାଜିଛନ୍ତି ପ୍ରେରଣା।
