ମାହାଙ୍ଗା: ୭ ଦିନ ଭିତରେ ଦାବି ପୂରଣ କର ନହେଲେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିବୁ। ଏଭଳି ଦାବିପତ୍ର ସହ ମାହାଙ୍ଗା ବିଡିଓ ସନ୍ତୋଷ ଜେନାଙ୍କୁ ଭେଟିଛନ୍ତି ବ୍ଲକରେ କାମ କରୁଥିବା ୧୬୨ ଜଣ ଏମବିକେ ଓ ସିଆରପି କର୍ମଚାରୀ ।
ସୂଚନା ଅନୁସାରେ, ଦୀର୍ଘ ଦୁଇ ବର୍ଷ ହେବ ମାହାଙ୍ଗା ବ୍ଲକର ୧୪ ଟି ପଞ୍ଚାୟତର ପ୍ରାୟ ୧୬୨ ଜଣଙ୍କୁ ଏମବିକେ ଓ ସିଆରପି ଭାବରେ ବିଭିନ୍ନ ପଞ୍ଚାୟତରେ ନିଯୁକ୍ତି ଦିଆଯାଇଥିଲା। ନିଯୁକ୍ତି ପରେ ଦୁଇ ମାସର ଦରମା ମଧ୍ୟ ପ୍ରଦାନ କରାଯାଇଥିଲା। ସରକାରଙ୍କ ତରଫରୁ ନିଯୁକ୍ତି ପତ୍ର ଓ ସାଲାରୀ ସ୍ଲିପ୍ ମଧ୍ୟ ଦୁଇ ମାସର ମିଳିଥିଲା। କିଛି ପଞ୍ଚାୟତର ସିଆରପିମାନେ ୬ ମାସର ଦରମା ମଧ୍ୟ ପାଇଛନ୍ତି।
ହେଲେ କିନ୍ତୁ ଦୀର୍ଘ ୨୨ ମାସ ହେବ ସେମାନଙ୍କ ଦରମା ବନ୍ଦ ରହିଛି। ସବୁ କାମ କରୁଥିଲେବି ସେମାନଙ୍କୁ ଦରମା ମିଳୁନାହିଁ। ଏବାବଦରେ ଉପମୁଖ୍ୟମନ୍ତ୍ରୀଙ୍କ ଠାରୁ ଆରମ୍ଭ କରି ପିଡି ଓ କଟକ ଜିଲ୍ଲାପାଳଙ୍କୁ ଭେଟି ଦାବି ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ।
ଏଣୁ ମାହାଙ୍ଗା ବ୍ଲକରେ ସମସ୍ତ ସିରିଆପି ଓ ଏମବିକେମାନେ ମାହାଙ୍ଗା ବିଡିଓଙ୍କୁ ଭେଟିବା ସହ ୭ ଦିନ ଭିତରେ ସେମାନଙ୍କୁ ଦରମା ଦେବାକୁ ଏକ ଦାବି ପତ୍ର ପ୍ରଦାନ କରିଛନ୍ତି। ଆଉ ଯଦି ଦରମା ନଦିଆଯାଏ ତେବେ ସେମାନେ ଆଗାମୀ ଦିନରେ ସମସ୍ତ ଏମବିକେ ଓ ସିଆରପିମାନେ ମାହାଙ୍ଗା ବ୍ଲକ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିବା ନେଇ ଚେତାବନୀ ଦେଇଛନ୍ତି।
ଏହି ବାବଦରେ ବିଡିଓ ସନ୍ତୋଷ କୁମାର ଜେନା କହିଛନ୍ତି ଦୁଇ ବର୍ଷ ତଳେ ଏମାନଙ୍କୁ ନିଯୁକ୍ତି ମିଳିଥିଲା। କିନ୍ତୁ ଏହି ନିଯୁକ୍ତି ବେଆଇନ ଢଙ୍ଗରେ କରାଯାଇଛି। ସେସବୁ ଯାଞ୍ଚ କରାଯାଉଛି। ଜିଲ୍ଲାପାଳଙ୍କୁ ସମସ୍ତ ଡକ୍ୟୁମେଣ୍ଟ ପ୍ରଦାନ କରାଯାଇଛି। ଏବିଷୟରେ ଜିଲ୍ଲାପାଳଙ୍କୁ ଜଣାଯିବ।
