ନୂଆଦିଲ୍ଲୀ: ଭାରତର ଅପରେସନ ସିନ୍ଦୂର। ରାତି ପାହିବା ପୂର୍ବରୁ ଆତଙ୍କୀ ଦେଶର ନିଦ ହଜାଇଦେଇଥିଲା ଏହି ଅପରେସନ। ରାତି ଅନ୍ଧାକାରକୁ ଭେଦି ଆତଙ୍କୀ ଆଡ୍ଡାକୁ ଉଡ଼ାଇ ଦେଇଥିଲେ ଭାରତୀୟ ସେନା। ୨୫ ମିନିଟ୍ର ଅପରେସନରେ ନିପାତ ହୋଇଥିଲେ ଶତାଧିକ ଆତଙ୍କୀ। ମୃତକଙ୍କ ମଧ୍ୟରେ ଥିଲେ ୫ ଟପ୍ ଲିଡର୍ ଆତଙ୍କବାଦୀ। ସେହି ଆତଙ୍କୀଙ୍କ ପୁରା ଲିଷ୍ଟ ଏବେ ସାମ୍ନାକୁ ଆସିଛି । ଏମାନଙ୍କ ମଧ୍ୟରେ ଅଛନ୍ତି ଲସ୍କର ଓ ଜୈସ ସଂଗଠନର ଆତଙ୍କବାଦୀ। ଯେଉଁମାନେ ଭାରତ ପାଇଁ ଥିଲେ ମୋଷ୍ଟ ଓ୍ୱାଣ୍ଟେଡ୍।
ମେ ୭ରେ ହୋଇଥିବା ଏୟାରଷ୍ଟ୍ରାଇକରେ ନିପାତ ୫ କୁଖ୍ୟାତ ଆତଙ୍କୀଙ୍କ ତାଲିକା ମଧ୍ୟରେ LeT ଆତଙ୍କୀ ମୁଦାସର ଖାଦିଆନ ଖାନ୍, jeMର ହାଫିଜ ମହମ୍ମଦ ଜମିଲ, ମହମ୍ମଦ ୟୁସୁଫ ଅଜହର, LeT ଖଲିଦ୍ ଓରଫ ଆକାଶ ନିହତ, jeMର ମହମ୍ମଦ ହାସନ୍ ଖାନଙ୍କ ମୃତ୍ୟୁ ହୋଇଛି।
ମୁଦାସର ଖାଦିଆନ ଖାନ୍- ଏହି ଲସ୍କର-ଇ-ତୋଇବା ଆତଙ୍କବାଦୀ। ମୁରିଡକେରେ ମାର୍କାଜର ଇନଚାର୍ଜରେ ଥିଲା। ତାର ଅନ୍ୟ ନାଁ ଥିଲା ଅବୁ ଜିନ୍ଦାଲ। ଅପରେସନ ରାତିରେ ସେଠାରେ ଉପସ୍ଥିତ ଥିଲା। ପାକିସ୍ତାନରୁ ମିଳିଥିବା ଗୁପ୍ତ ସୂଚନା ଅନୁଯାୟୀ, ଆବୁ ଜୁନ୍ଦଲଙ୍କ ଅନ୍ତିମ ସଂସ୍କାରରେ ପାକିସ୍ତାନୀ ସେନା ପକ୍ଷରୁ ଗାର୍ଡ ଅଫ୍ ଅନର ଦିଆଯାଇଥିଲା।
ଜିନ୍ଦାଲଙ୍କ ଅନ୍ତିମ ସଂସ୍କାରରେ, ପାକିସ୍ତାନ ସେନା ମୁଖ୍ୟ ପୁଷ୍ପମାଲ୍ୟ ଅର୍ପଣ କରିଥିଲେ। ତାର ଅନ୍ତିମ ସଂସ୍କାର ଏକ ସରକାରୀ ସ୍କୁଲରେ ଜମାତ-ଉଦ୍-ଦାୱାର ହାଫିଜ୍ ଅବଦୁଲ ରୌଫଙ୍କ ନେତୃତ୍ୱରେ କରାଯାଇଥିଲା। ପାକ୍ ସେନାର ଜଣେ କାର୍ଯ୍ୟରତ ଲେଫ୍ଟନାଣ୍ଟ ଜେନେରାଲ ଏବଂ ପଞ୍ଜାବ ପୋଲିସର ଆଇଜି ନମାଜ ଉତ୍ସବରେ ଯୋଗ ଦେଇଥିଲେ।
୨. ହାଫିଜ୍ ମହମ୍ମଦ ଜମିଲ୍- ଜୈଶ୍-ଏ-ମହମ୍ମଦ ସହିତ ଜଡିତ ଜମିଲ୍ ମୌଲାନା ମାସୁଦ୍ ଅଜହରର ବଡ଼ ଭାଇ ଥିଲେ। ଯେଉଁଦିନ ଅପରେସନ୍ ହୋଇଥିଲା, ଜମିଲ୍ ବାହାୱଲପୁରରେ ତାର ଘରେ ଶୋଇଥିଲା। ଜମିଲ ମର୍କଜ ସୁଭାନାଲ୍ଲାହର ଦାୟିତ୍ୱରେ ଥିଲା। ଜମିଲ ଯୁବକମାନଙ୍କୁ ମୌଳବାଦୀ କରିବା ଏବଂ ଜୈଶ-ଏ-ମହମ୍ମଦ ପାଇଁ ପାଣ୍ଠି ସଂଗ୍ରହ କରିବାରେ ସକ୍ରିୟ ଭାବରେ ଜଡିତ ଥିଲା।
୩. ମହମ୍ମଦ ୟୁସୁଫ୍ ଅଜହର- ଜୈଶ ସଂଗଠନର ଏହି ଆତଙ୍କବାଦୀକୁ ଉସ୍ତାଦ ଏବଂ ମହମ୍ମଦ ସଲିମ୍ ନାମରେ ମଧ୍ୟ ଜଣାଶୁଣା ଥିଲା। ସେ ମାସୁଦ ଅଜହରର ଶାଳକ ଥିଲା। ଅଜହର ମଦ୍ରାସାରେ ଅସ୍ତ୍ରଶସ୍ତ୍ର ତାଲିମ ପରିଚାଳନା କରୁଥିଲା। ଜମ୍ମୁରେ ହୋଇଥିବା ଅନେକ ଆତଙ୍କବାଦୀ ଆକ୍ରମଣରେ ଅଜହର ସାମିଲ ଥିଲା। ୧୯୯୯ ଇଣ୍ଡିଆନ ଏୟାର ଲାଇନ୍ସ ଅପହରଣ ମାମଲାରେ ତାକୁ ମୋଷ୍ଟ ୱାଣ୍ଟେଡ୍ ବୋଲି ବିବେଚନା କରାଯାଉଥିଲା।
୪. ଖଲିଦ ଆବୁ ଆକାଶ: ଲସ୍କର-ଏ-ତୈବାର ଏହି ଆତଙ୍କବାଦୀ ଆଫଗାନିସ୍ତାନରୁ ଅସ୍ତ୍ରଶସ୍ତ୍ର ଯୋଗାଣ କରୁଥିଲା। ଆକ୍ରମଣ ଦିନ ସେ ତାର ଘରେ ଶୋଇଥିଲା। ଖଲିଦ ଉପରେ ଜମ୍ମୁରେ ଆତଙ୍କ ସୃଷ୍ଟି କରିବାର ଅଭିଯୋଗ ଥିଲା। ଖଲିଦଙ୍କ ଅନ୍ତିମ ସଂସ୍କାର ଫୈସଲାବାଦରେ ଅନୁଷ୍ଠିତ ହୋଇଥିଲା, ଯେଉଁଠାରେ ପାକିସ୍ତାନ ସେନାର ବରିଷ୍ଠ ଅଧିକାରୀ ଏବଂ ଫୈସଲାବାଦର ଡେପୁଟି କମିଶନର ଯୋଗ ଦେଇଥିଲେ।
୫. ମହମ୍ମଦ ହାସନ ଖାନ- ଜୈଶର ଏହି ଆତଙ୍କବାଦୀ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ଜୈଶ-ଏ-ମହମ୍ମଦର ଅପରେସନାଲ କମାଣ୍ଡର ମୁଫତି ଅଜଗର ଖାନ କାଶ୍ମୀରୀର ପୁଅ ଥିଲା। ଏହା ପୂର୍ବରୁ ଜମ୍ମୁ ଏବଂ କାଶ୍ମୀରରେ ଆତଙ୍କବାଦୀ ଆକ୍ରମଣର ସମନ୍ୱୟ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା।
