ନୂଆଦିଲ୍ଲୀ: ଓଟାଭାରେ ଶପଥ ଗ୍ରହଣ ସହ ମାର୍କ କାର୍ନି କାନାଡାର ୨୪ତମ ପ୍ରଧାନମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଛନ୍ତି । ସେଣ୍ଟ୍ରାଲ୍ ବ୍ୟାଙ୍କର ପୂର୍ବତନ ଗଭର୍ଣ୍ଣର ଓ ଇନଭେଷ୍ଟମେଣ୍ଟ ଏକ୍ସପର୍ଟ କାର୍ନି ଏଭଳି ଏକ ସମୟରେ କ୍ଷମତାରେ ବସିବାକୁ ଯାଉଛନ୍ତି, ଯେତେବେଳେ ଆମେରିକା ସହ କାନାଡାର ଟ୍ରେଡ୍ ୱାର୍ ଚରମରେ ପହଞ୍ଚିଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କେବଳ କାନାଡାର ସାମଗ୍ରୀ ଉପରେ ଉଚ୍ଚ ଶୁଳ୍କ ଲଗାଉନାହାନ୍ତି ବରଂ ଇକୋନମିକ୍ ଫୋର୍ସ ଜରିଆରେ କାନାଡାକୁ ଆମେରିକାରେ ବିଳୟ କରାଇବାକୁ ଚାହୁଁଛନ୍ତି ।
ମାର୍କ କାର୍ନିଙ୍କ ପ୍ରଧାନମନ୍ତ୍ରୀ ଯାଏ ଯାତ୍ରା ଅନେକ ଦୃଷ୍ଟିରୁ ବିରଳ ଅଟେ । ହାଉସ୍ ଅଫ୍ କମନ୍ସ ଓ ସିନେଟରେ କୌଣସି ଆସନ ନଜିତି ପ୍ରଧାନମନ୍ତ୍ରୀ ହେବାରେ ପ୍ରଥମ । ଏହାସହ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ଭାବେ ନିଯୁକ୍ତ ହେବାରେ ବି ପ୍ରଥମ । ଲିବେରାଲ୍ ପାର୍ଟି ଭିତରେ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ବିଦାୟ ନେଇ ଚର୍ଚ୍ଚା ଜୋର ହେବା ପରେ ପାର୍ଟିର ସଦସ୍ୟ ବହୁମତରେ କାର୍ନିଙ୍କୁ ନେତା ଚୟନ କରିଛନ୍ତି । ନେତା ନିର୍ବାଚିତ ହେବାର ପାଞ୍ଚ ଦିନ ପରେ ସେ ପ୍ରଧାନମନ୍ତ୍ରୀ ଭାବେ ଶପଥ ନେଇଛନ୍ତି । ତେବେ ଏହି ସରକାର ଅଧିକ ଦିନ ଯାଏ ଚାଲିବ ନାହିଁ, କାରଣ ଆଗାମୀ କିଛି ସପ୍ତାହରେ ନିର୍ବାଚନ ତାରିଖ ହେବା ନିଶ୍ଚିତ ।
Welcoming Mark Carney, Canada’s 24th Prime Minister. pic.twitter.com/SOVEN6eYlg
— Prime Minister of Canada (@CanadianPM) March 14, 2025
କାର୍ନି ନିଜ ମନ୍ତ୍ରିମଣ୍ଡଳକୁ ଟ୍ରୁଡୋଙ୍କ ତୁଳନାରେ ଛୋଟ ରଖିଛନ୍ତି ଓ ଏଥିରେ ମୋଟ ୨୪ ମନ୍ତ୍ରୀଙ୍କୁ ସାମିଲ କରାଯାଇଛି । ସେ ଫ୍ରାନସ୍ୱା-ଫିଲିପ ସାମ୍ପେନଙ୍କୁ ଅର୍ଥମନ୍ତ୍ରୀ ନିଯୁକ୍ତ କରିଛନ୍ତି । ସେହିପରି ଡୋମିନିକ୍ ଲେବ୍ଲାଙ୍କକୁ ଅନ୍ତରାଷ୍ଟ୍ରୀୟ ବାଣିଜ୍ୟ ମନ୍ତ୍ରଣାଳୟ ଦାୟିତ୍ୱ ଦେଇଛନ୍ତି । ମେଲାନୀ ଜୋଲିଙ୍କୁ ବିଦେଶ ମଣନ୍ତ୍ରାଳୟ ଦିଆଯାଇଛି । ଡେଭିଡ ମ୍ୟାକଗିନଟିଙ୍କୁ ପବ୍ଲିକ୍ ସେଫ୍ଟି ବିଭାଗ ମିଳିଛି ।
