ବେଙ୍ଗାଲୁର ୧୧/୪: ଅସହ୍ୟ ହେଲା ସ୍ତ୍ରୀଙ୍କ ନିର୍ଯାତନା । ଜୀବନ ହାରିବାର ନିଷ୍ପତ୍ତି ନେଇଗଲେ ସ୍ବାମୀ । ମାଆ... ମୁଁ ସବୁଦିନ ପାଇଁ ଶୋଇବାକୁ ଯାଉଛି । ଏମିତି କହି ଝୁଲିପଡିଲେ ଯୁବକ । ଉତ୍ତରପ୍ରଦେଶ ବରେଲିରୁ ଆସିଛି ଏପରି ସମ୍ବେଦନଶୀଳ ଘଟଣା । ମୃତକ ୨୪ ବର୍ଷୀୟ ଯୁବକ ରାଜ୍ ଆର୍ଯ୍ୟ । ବୁଧବାର ଝୁଲନ୍ତା ଅବସ୍ଥାରେ ତାଙ୍କର ମୃତଦେହ ମିଳିଛି । ପତ୍ନୀ ସିମରନଙ୍କ ସମେତ ୭ ଜଣଙ୍କ ନାଁରେ ରୁଜୁ ହୋଇଛି ମାମଲା ।
ପ୍ରାୟ ୧ ବର୍ଷ ପରେ ଶାହାଜାହାନପୁରର ସିମ୍ରନଙ୍କ ସହ ରାଜଙ୍କର ପ୍ରେମ ବିବାହ ହୋଇଥିଲା । ଦେଢ ମାସ ପୂର୍ବରୁ ଉଭୟଙ୍କର ଏକ କନ୍ୟା ସନ୍ତାନ ମଧ୍ୟ ଜନ୍ମ ହୋଇଥିଲା । ତେବେ ରାଜ୍ଙ୍କ ପରିବାର ଲୋକଙ୍କ ଅଭିଯୋଗ ହେଉଛି ଉଭୟଙ୍କ ବୈବାହକ ଜୀବନରେ ସବୁବେଳେ ଅଶାନ୍ତି ଲାଗି ରହୁଥିଲା । ରାଜ ଓ ସିମ୍ରନ ଏକାଠି ଏକ ପ୍ରାଇଭେଟ ସେକ୍ଟରରେ କାମ କରୁଥିଲେ । ହେଲେ ବାହାଘର ପରେ ପରେ ଉଭୟଙ୍କର ଚାକିରି ଚାଲିଯାଇଥିଲା । ଆର୍ଥିକ ସମସ୍ୟା ଉଭୟଙ୍କ ମଧ୍ୟରେ ଦୂରତା ବଢାଇଥିଲା । ଆଉ ପ୍ରତିଥର ଝଗଡା ପରେ ବାପଘରକୁ ପଳାଉଥିଲେ ସିମ୍ରନ ।
ଘଟଣାର ପ୍ରାୟ ୧୦ ଦିନ ପୂର୍ବରୁ ସିମ୍ରନଙ୍କ ପରିବାର ଲୋକ ଆସି ଝଗଡା କରିବା ସହ ଝିଅ ଓ ନାତୁଣୀକୁ ଧରି ପଳାଇଥିଲେ । ତେବେ ପତ୍ନୀ ଓ ଝିଅକୁ ଫେରାଇ ଆଣିବାକୁ ଶ୍ବଶୁର ଘରକୁ ଯାଇଥିଲେ ରାଜ୍ । ହେଲେ ସେଠାରେ ତାଙ୍କୁ ଗାଳିମନ୍ଦ ସହ ମାର୍ପିଟ୍ କରାଯାଇଥିଲା । ଏମିତିକି ୫ ଲକ୍ଷ ଦେଇ ତଲାକ ନେଇଯିବାକୁ ଧମକ ଦେଇଥିଲେ ପତ୍ନୀ । ନଚେତ ଜେଲ୍ ପଠେଇବାର ଧମକ ବି ଦେଇଥିଲେ । କେବଳ ସେତିକି ନୁହେଁ ସିମ୍ରନ ବରେଲି ମହିଳା ଥାନାରେ ରାଜ୍ ଓ ତାଙ୍କ ପରିବାର ଲୋକଙ୍କ ଉପରେ ଯୌତୁକ ନିର୍ଯାତନା ଓ ମାର୍ପିଟ୍ର ଅଭିଯୋଗ କରିଥିଲେ । ଏହା ପରେ ଥାନା ପକ୍ଷରୁ ଉଭୟ ପକ୍ଷଙ୍କୁ ଡାକରା ଆସିଥିଲା । ହେଲେ ସମାଧାନ ହୋଇପାରିନଥିଲା ।
ତେବେ ଇନଷ୍ଟାଗ୍ରାମରେ ସିମ୍ରନ୍ଙ୍କ ପୋଷ୍ଟ ଦେଖି ଭାଙ୍ଗି ପଡିଥିଲେ ରାଜ୍ । ସିମ୍ରନ୍ ପ୍ରଥମେ ପୋଷ୍ଟ କରିଥିଲେ (He will be in jail by 10:30 am) ସକାଳ ସାଢେ ୧୦ଟା ସୁଦ୍ଧା ତମେ ଜେଲ୍ରେ ଥିବ । ତା ପରେ ସେକେଣ୍ଡ ପୋଷ୍ଟ କରିଥିଲେ (Now go to jail )ଏବେ ତମେ ଜେଲ୍ ଯାଅ । ବାସ୍ ସେହିଦିନ ସଂଧ୍ୟାରେ ଘରେ ଜୀବନ ହାରିଦେଇଥିଲେ ରାଜ୍ । ରାଜ୍ଙ୍କ ମାଆ କହିଛନ୍ତି ଜୀବନ ହାରିବା ପୂର୍ବରୁ ରାଜ୍ କେବଳ ଗୋଟିଏ କଥା କହିଥିଲେ ମାଆ ମୁଁ ସବୁଦିନ ପାଇଁ ଶୋଇବାକୁ ଯାଉଛନ୍ତି । ଏହି କଥାର କିଛି ସମୟ ପରେ ଫ୍ୟାନରେ ଝୁଲନ୍ତା ଅବସ୍ଥାର ରାଜ୍ଙ୍କ ମୃତଦେହ ମିଳିଥିଲା । ପୋଲିସ ମୃତଦେହ ଜବତ କରି ପୋଷ୍ଟମର୍ଟମ ପାଇଁ ପଠାଇଛି । ପତ୍ନୀ ସିମରନଙ୍କ ସମେତ ୭ ଜଣଙ୍କ ନାଁରେ ମାମଲା ରୁଜୁ କରି ଛାନ୍ଭିନ୍ ଚଲାଇଛି ପୋଲିସ । ଗତ ବର୍ଷ ପତ୍ନୀଙ୍କ ନିର୍ଯାତନାରେ ଅତିଷ୍ଠ ହୋଇ
ଏଆଇ ଇଞ୍ଜିନିୟର ଅତୁଲ ସୁଭାଶିଷଙ୍କ ଆତ୍ମହତ୍ୟା କରିଥିଲେ । ଯାହା ସାରା ଦେଶରେ ହଇଚଇ ସୃଷ୍ଟି କରିଥିଲା । କେବଳ ମହିଳା ନୁହଁନ୍ତି ପୁରୁଷ ବି କେମିତି ନିର୍ଯାତନାର ଶିକାର ହେଉଛନ୍ତି ତାର ପ୍ରମାଣ ଥିଲା ଏ ଘଟଣା ।
