ପ୍ରେମ ପାଇଁ ରଚିଥିଲେ ମିଛ ନାଟକ, ସରକାରଙ୍କୁ କହି ଆମେରିକାରୁ ଆସିଲେ ଓଡ଼ିଶା

ବାଲେଶ୍ୱର ୨୬/୧୧: ନାଟକର ନାଁ 'ସେଜଲ' । ପ୍ରେମ ପାଇଁ ସାତ ଦରିଆ ପାର୍ କଲେ । ମିଛ ନାଟକ ରଚି ଧାଇଁ ଆସିଲେ ପ୍ରେମିକ ପାଖକୁ । ଓଡିଶା ଆସିବା ଯାତ୍ରା ନଥିଲା ଏତେ ସହଜ । ଓଡ଼ିଶା ଫେରିଆସିବାକୁ ହାତଯୋଡ଼ି ମୁଖ୍ୟମନ୍ତ୍ରୀଙ୍କୁ ନିବେଦନ କରିଥିଲେ । ସାବତ ମାଆ ଆମେରିକାରେ ଅତ୍ୟାଚାର କରୁଥିବାରୁ ଫେରାଇ ନେବାକୁ କହୁଥିଲେ । ପରେ ଭାରତ ସରକାରଙ୍କ ବୈଦେଶିକ ମନ୍ତ୍ରାଳୟ ଓ ଓଡ଼ିଶା ସରକାରଙ୍କ ମିଳିତ ସହଯୋଗରେ ତାଙ୍କୁ ଓଡ଼ିଶାକୁ ଫେରାଇ ଅଣାଯାଇଥିଲା । ହେଲେ ଓଡ଼ିଶା ମାଟିରେ ପାଦ ରଖୁ ରଖୁ ଦେଉ ବଡ଼ ଖୁଲାସା କରିଛନ୍ତି ୨୧ ବର୍ଷୀୟା ସେଜଲ୍ ।

ଭୁବନେଶ୍ବର ବିମାନ ବନ୍ଦରରେ ଖୋଲି ଦେଇଛନ୍ତି ଓଡ଼ିଶା ଫେରିବା ପଛର ଗୁମର । ଭିଡିଓରେ କାନ୍ଦି କାନ୍ଦି କହିଥିବା ପ୍ରତ୍ୟେକଟି କଥା ମିଛ ବୋଲି ସେ କହିଛନ୍ତି । ପାଳିତା ମାଆ ତାଙ୍କ ପ୍ରତି କୌଣସି ଅତ୍ୟାଚାର କରିନଥିଲା, ବରଂ ଖୁବ ଭଲରେ ରଖିଥିଲା। ହେଲେ ବାଲେଶ୍ବରରେ ରହୁଥିବା ପ୍ରେମିକ ପାଇଁ ସେ ଆମେରିକାରୁ ଫେରିବା ପାଇଁ ଚାହୁଁଥିଲେ। ଆଉ ସେଥିପାଇଁ ମିଛ ଭିଡିଓ କରିଥିଲେ ବୋଲି କହିଛନ୍ତି ।

ସୂଚନା ଥାଉକି, ଭୁବନେଶ୍ୱରର ନହରକଣ୍ଟାରେ ରହି ଚତୁର୍ଥ-ପଞ୍ଚମ ଶ୍ରେଣୀରେ ପଢ଼ୁଥିବା ବେଳେ ଅମରଙ୍କ ସହ ପରିଚୟ ହୋଇଥିଲା । ଅମର ତାଙ୍କ ବନ୍ଧୁ ଥିଲେ । ଆମେରିକା ଯିବା ପରେ ୨୦୨୪ରେ ଅମରଙ୍କ ସହ ପୁନଶ୍ଚ ସୋସିଆଲ୍ ମିଡିଆରେ ପରିଚୟ ହୋଇଥିଲା । ଆମେରିକାର ଲାଇଫ୍ ଷ୍ଟାଇଲ୍ ତାଙ୍କୁ ଭଲ ଲାଗୁନି । ସେ ଓଡ଼ିଶା ଫେରିବାକୁ ଚାହୁଁଥିଲେ । ଆମେରିକା ଚାଲିଯିବା ପରେ ୨୦୨୪ରେ ଦୁହେଁ ପରସ୍ପରକୁ ସୋସିଆଲ ମିଡ଼ିଆରେ ଭେଟିଥିଲେ।

ଆଉ ସେବେଠୁ ଅମରଙ୍କୁ ବାହା ହୋଇ ଓଡ଼ିଶାରେ ରହିବାକୁ ଚାହୁଁଥିଲେ ସେଜଲ । ହେଲେ ଦୁହିଁଙ୍କ ପ୍ରେମ ସେଜଲଙ୍କ ପାଳିତା ମାଆଙ୍କୁ ପସନ୍ଦ ଆସି ନଥିଲା। ଫଳରେ ବାଧ୍ୟ ହୋଇ ଓଡ଼ିଶା ଫେରିବାକୁ ଏପରି ପ୍ଲାନ କରିଥିଲେ ସେଜଲ। ଆଉ ଅମରଙ୍କୁ ନିଜ ସ୍କୁଲ ସାଙ୍ଗ ବୋଲି କହି ସରକାରଙ୍କୁ ଫେରାଇ ନେବାକୁ ନିବେଦନ କରିଥିଲେ । ତେବେ ପୁରୁଷ ବନ୍ଧୁ ବାଲେଶ୍ୱରର ଅମର ଦାସଙ୍କ ସହ ତାଙ୍କର ଭେଟ ହୋଇନି । ପ୍ରେମ ପାଇଁ ସୁଦୂର ଆମେରିକାରୁ ଚାଲିଆସିଥିବା ସେଜଲ୍ଙ୍କ ପ୍ରେମ ସଫଳ ହେବ କି ନାହିଁ, ଅମରଙ୍କ ସହ ତାଙ୍କର ବିବାହ କେମିତି ହେବ ସେନେଇ ବିଭିନ୍ନ ପ୍ରଶ୍ନ ଉଠିଛି ।