ଢାକାରେ ଭୟଙ୍କର ଅଗ୍ନିକାଣ୍ଡ; ପୋଡ଼ି​‌ ହୋଇ ୧୬ ଜଣଙ୍କ ମୃତ୍ୟୁ, ମୃତକଙ୍କ ସଂଖ୍ୟା ବଢ଼ିବା ନେଇ ଆଶଙ୍କା

ନୂଆଦିଲ୍ଲୀ: ବାଂଲାଦେଶର ରାଜଧାନୀ ଢାକାର ମିରପୁରର ଶିଆଲବାରି ଅଞ୍ଚଳରେ ବଡ଼ ଅଘଟଣ। ଏଠାରେର ଥିବା ଏକ ରାସାୟନିକ ଗୋଦାମ ଏବଂ ଗୋଟିଏ କପଡ଼ା କାରଖାନାରେ ଭୟଙ୍କର ଅଗ୍ନିକାଣ୍ଡ ଘଟିଛି । ଏଥିରେ ପ୍ରାୟ ୧୬ ଜଣକ ମୃତ୍ୟୁ ହୋଇଥିବାବେଳେ ଏକାଧିକ ଲୋକ ଆହତ ହୋଇଛନ୍ତି।

ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ଘଟଣା ହଠାତ୍ ଘଟିଥିଲା। ଆଉ ଚାହୁଁ ଚାହୁଁ ନିଆଁ ସମ୍ପୂର୍ଣ୍ଣ ଗୋଦାମକୁ ବ୍ୟପିଯାଇଥିଲା। ତେବେ ଘଟଣା ସମ୍ପର୍କରେ ସୂଚନା ପାଇ ଅଗ୍ନିଶମ ବାହିନୀର ଅନେକ ଗାଡ଼ି ଘଟଣାସ୍ଥଳରେ ପହଞ୍ଚିବା ସହ ଅନେକ ଚେଷ୍ଟା ପରେ ନିଆଁକୁ ଆୟତ୍ତ କରିଥିଲେ।

ସେପଟେ ଦୁର୍ଘଟଣାରେ ଆହତ ହୋଇଥିବା ଏକାଧିକ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଅଧିକାରୀଙ୍କ ସୂଚନା ଅନୁଯାୟୀ, ମୃତ୍ୟୁ ସଂଖ୍ୟା ଆହୁରି ବଢ଼ିପାରେ। କାରଣ ଏହି ଦୁର୍ଘଟଣାରେ ଅନେକ ଲୋକ ଗୁରୁତର ଭାବେ ଆହତ ହୋଇଛନ୍ତି। ଅଗ୍ନିକାଣ୍ଡର ପ୍ରକୃତ କାରଣ ଜଣାପଡ଼ିନଥିବା ବେଳେ ଏହା ବର୍ତ୍ତମାନ ତଦନ୍ତାଧୀନ ଅଛି।

ଅଗ୍ନିଶମ ସେବା ଏବଂ ନାଗରିକ ପ୍ରତିରକ୍ଷା ଅଧିକାରୀ ତଲହା ବିନ୍ ଜାସିମ କହିଛନ୍ତି ଯେ, ରୂପନଗର ଅଞ୍ଚଳରେ ଥିବା ବାଂଲାଦେଶ ବ୍ୟବସାୟ ଏବଂ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ (BUBT) ନିକଟରେ ଏହି ଅଗ୍ନିକାଣ୍ଡ ଘଟିଛି। ରାସାୟନିକ ଗୋଦାମରୁ ଆରମ୍ଭ ହୋଇଥିବା ନିଆଁ ଧୀରେ ଧୀରେ କପଡ଼ା କାରଖାନାକୁ ବ୍ୟାପି ଯାଇଥିଲା।

ଅଗ୍ନିଶମ ସେବା ଏବଂ ନାଗରିକ ପ୍ରତିରକ୍ଷାର ଅପରେସନ ନିର୍ଦ୍ଦେଶକ ଲେଫ୍ଟନାଣ୍ଟ କର୍ଣ୍ଣେଲ ମହମ୍ମଦ ତାଜୁଲ ଇସଲାମ ଚୌଧୁରୀ କହିଛନ୍ତି, କପଡ଼ା କାରଖାନାର ଦ୍ୱିତୀୟ ଏବଂ ତୃତୀୟ ମହଲାରୁ ମୃତକଙ୍କ ମୃତଦେହ ଉଦ୍ଧାର କରାଯାଇଛି। ଅଧିକାରୀଙ୍କ ଅନୁଯାୟୀ, ଅଗ୍ନିକାଣ୍ଡରୁ ବିଷାକ୍ତ ଧୂଆଁ ବାହାରିବା ଯୋଗୁଁ ଅନେକ ଲୋକଙ୍କର ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଥାଇପାରେ ବୋଲି ଅନୁମାନ କରାଯାଉଛି। ତେବେ ତଦନ୍ତ ପରେ ଅଗ୍ନିକାଣ୍ଡର ପ୍ରକୃତ କାରଣ ଜଣାପଡ଼ିବ।