ଲକ୍ଷ୍ନୌ ୧୨/୪: ଶୁକ୍ରବାର ଇଣ୍ଡିଆନ୍ ପ୍ରିମିୟର ଲିଗରେ ଖେଳାଯିବ ୨୬ତମ ମୁକାବିଲା । ସଂଧ୍ୟାରେ ଲକ୍ଷ୍ନୌ ସୁପରଜାଏଣ୍ଟ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ହେବ ଲଢ଼େଇ । ଏକନ୍ନା ଷ୍ଟାଡ଼ିୟମରେ ସୁପରଜାଏଣ୍ଟ୍ସ ବିଜୟ ଧାରା ଜାରି ରଖିବା ପାଇଁ ପ୍ରସ୍ତୁତ ରହିଛି । ସେହିପରି ୫ଟିରୁ ୪ଟି ମ୍ୟାଚ୍ ହାରି ସାରିଥିବା ଦିଲ୍ଲୀ କ୍ୟାପିଟାଲ୍ସ ପାଇଁ ବିଜୟ ଜରୁରି ହୋଇଯାଇଛି । ଆଜିରେ ଶକ୍ତି ଖଟାଇବାକୁ ଯୋଜନା କରିଛି । ଫଳରେ ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି ।
ସୁପରଜାଏଣ୍ଟ୍ସ ବିପକ୍ଷରେ କ୍ୟାପିଟାଲ୍ସ ଏପର୍ଯ୍ୟନ୍ତ ଗୋଟିଏ ହେଲେ ମ୍ୟାଚ୍ ଜିତିନାହିଁ । ଉଭୟ ଦଳ ମଧ୍ୟରେ ୩ଟି ମ୍ୟାଚ୍ ଖେଳାଯାଇଛି । କ୍ୟାପିଟାଲ୍ସ ଦଳ ପ୍ରଥମ ବିଜୟ ସନ୍ଧାନରେ ରହିଛି । ଏକାଧିକ ଖେଳାଳି ଆହତ ହେବା ଯୋଗୁଁ କ୍ୟାପିଟାଲ୍ସ ଦଳ ପ୍ରଭାବିତ ହୋଇଛି । କେବଳ ସେତିକି ନୁହେଁ, ବ୍ୟାଟିଂ ବିଭାଗ ମଧ୍ୟ ଫର୍ମ ଫେରି ପାଇବାକୁ ସଂଘର୍ଷ କରୁଛି । ସୁପରଜାଏଣ୍ଟ୍ସ ଦଳର ଯୁବ ପେସ୍ ବୋଲର ମୟଙ୍କ ଯାଦବ ମଧ୍ୟ ଆହତ ଅଛନ୍ତି । ମାତ୍ର ଏହା ଦଳର ପ୍ରଦର୍ଶନକୁ ପ୍ରଭାବିତ କରିବ ନାହିଁ । ଦଳରେ ଏକାଧିକ ଦକ୍ଷ ପେସ୍ ବୋଲର ରହିଛନ୍ତି । ନବୀନ ଉଲ୍-ହକ୍ ଓ ୟଶ ଠାକୁର ପେସ୍ ବୋଲିଂ ବିଭାଗ ସମ୍ଭାଳିବେ । ତୃତୀୟ ପେସ୍ ବୋଲର ଭାବେ ମାର୍କସ ଷ୍ଟଇନିସ୍ ସହାୟତା କରିବେ । ଗୁଜରାଟ ଟାଇଟନ୍ସ ବିପକ୍ଷରେ ୟଶ ଠାକୁର ୫ଟି ୱିକେଟ୍ ନେଇଥିଲେ । ଏମାନଙ୍କ ବ୍ୟତୀତ ସମର ଜୋଶେଫ, ମହସିନ ଖାନ, ଅର୍ସଦ ଖାନ, ୟୁଦ୍ଧବୀର ସିଂହ ଓ ମାଟ୍ ହେନରୀଙ୍କ ଭଳି ପେସ୍ ବୋଲର ଦଳରେ ରହିଛନ୍ତି ।
ସେପଟେ ସୁପରଜାଏଣ୍ଟ୍ସକୁ ହରାଇବାକୁ ହେଲେ କ୍ୟାପିଟାଲ୍ସ ଦଳକୁ ସବୁ ବିଭାଗରେ ଉନ୍ନତ ପ୍ରଦର୍ଶନ କରିବାକୁ ହେବ । କେବଳ ଟ୍ରିଷ୍ଟନ ଷ୍ଟବ୍ସ ଓ ରିଷଭ ପନ୍ତଙ୍କୁ ଛାଡ଼ିଦେଲେ ଅନ୍ୟ କୌଣସି ବ୍ୟାଟର ଏପର୍ଯ୍ୟନ୍ତ ସଫଳ ହୋଇପାରି ନାହାନ୍ତି । ବିଶେଷ କରି ଡେଭିଡ୍ ୱାର୍ଣ୍ଣରଙ୍କ ବ୍ୟାଟ୍ରୁ ଏକ ବଡ଼ ଇନିଂସ ଆଶା କରାଯାଉଛି । ବୋଲିଂ ବିଭାଗ ମଧ୍ୟ ଲୟ ହରାଇଛି । ଅବଶ୍ୟ ଆସନ୍ତା କାଲି ମୁକେଶ କୁମାର ଓ କୁଲଦୀପ ଯାଦବ ଖେଳିବା ସମ୍ଭାବନା ରହିଛି । ଉଭୟ ଫିଟ୍ ଘୋଷିତ ହୋଇଛନ୍ତି । ଏକାନ୍ନା ଷ୍ଟଡ଼ିୟମ୍ର ପିଚ୍ ସ୍ପିନରଙ୍କୁ ସହାୟତା କରିବ । ପିଚ୍ ସାମାନ୍ୟ ମନ୍ଥର ରହିଥିବାରୁ ବିଶାଳ ସ୍କୋର ହେବାର ସମ୍ଭାବନା ନାହିଁ । ତଥାପି ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
