ଆରଜେଡିରେ ବିଦ୍ରୋହ,! ତେଜସ୍ୱୀଙ୍କ କୋର୍ ଟିମ୍ ଉପରେ ପ୍ରଶ୍ନ କଲେ ପରାଜିତ ପ୍ରାର୍ଥୀ

ପାଟନା, ୨୮/୧୧: ବିହାର ବିଧାନସଭା ନିର୍ବାଚନରେ ରାଷ୍ଟ୍ରୀୟ ଜନତା ଦଳ ବା ଆରଜେଡିର ଶୋଚନୀୟ ପରାଜୟ ହୋଇଛି । ଦଳ କଂଗ୍ରେସର ମହାଗଠବନ୍ଧନରେ ନିର୍ବାଚନ ଲଢିଥିଲା । କିନ୍ତୁ ଭୋଟର ମହାଗଠବନ୍ଧନକୁ ପ୍ରତ୍ୟାଖାନ କରିଥିଲେ । ୨୦୧୫ ଏବଂ ୨୦୨୦ରେ ଦଳ ସବୁଠୁ ଅଧିକ ଆସନରେ ବିଜୟୀ ହୋଇଥିଲା । ଏଥର କିନ୍ତୁ ମଇଦାନରେ ସେମିତି ସ୍ଥିତି ନଥିଲା । ନିର୍ବାଚନ ପରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ଘରେ ଫାଟ ଜଳଜଳ ଦେଖାଯାଇଥିଲା । ପରିବାରର ଲୋକେ ପରସ୍ପର ଉପରେ ଦୋଷାରୋପ କରିଥିଲେ ।

ପରାଜୟ ପରେ ଦଳ ଲଗାତାର ଭାବେ କାରଣ ଖୋଜୁଛି । ବାରମ୍ବାର ସମୀକ୍ଷା ବୈଠକ ହେଉଛି । ତେବେ ବୈଠକରେ ଆରଜେଡିର ଅନେକ ଅବ୍ୟବସ୍ଥା ସାମ୍ନାକୁ ଆସିଛି । ନିକଟରେ କିଛି ପରାଜିତ ପ୍ରର୍ଥୀ ମହାଗଠବନ୍ଧନ ଏବଂ ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ଥିବା ତେଜସ୍ୱୀ ଯାଦବଙ୍କ କୋର୍ ଟିମ୍ ଉପରେ ବର୍ଷିଛନ୍ତି । ମହାଗଠବନ୍ଧନରେ ସାମିଲ ଥିବା କିଛି ଦଳଙ୍କୁ ମଧ୍ୟ ସେମାନେ ଟାର୍ଗେଟ୍ କରିଛନ୍ତି ।

ସେମାନେ ଅଭିଯୋଗ କରିଛନ୍ତି ଯେ, ଆରଜେଡି ପ୍ରାର୍ଥୀଙ୍କୁ କଂଗ୍ରେସ ଏବଂ ବାମଦଳଠୁ ଆଶାନୁରୂପ ସହଯୋଗ ମିଳିନଥିଲା । ଦଳ ମଧ୍ୟରେ ସମନ୍ବୟର ଅଭାବ ପରିଲକ୍ଷିତ ହୋଇଥିଲା । ତେଜସ୍ୱୀଙ୍କ କୋର୍ ଟିମର କିଛି ନେତା ସଠିକ ଢଙ୍ଗରେ ନିର୍ବାଚନ ପରିଚାଳନା କରିପାରିନଥିଲେ । ଯାହାର ପ୍ରଭାବ ମତଦାନ ଉପରେ ପଡିଥିଲା ଏବଂ ଦଳକୁ ପରାଜୟର ସାମ୍ନା କରିବାକୁ ହୋଇଥିଲା ।

ସୂଚନାଯୋଗ୍ୟ, ନିର୍ବାଚନ ପରାଜୟ ପରେ ପ୍ରତିଦିନ ଆରଜେଡିର ସମୀକ୍ଷା ବୈଠକ ହେଉଛି । ଏଥିରେ ହାରୁ ପ୍ରାର୍ଥୀମାନେ କେଉଁଥିପାଇଁ ପରାସ୍ତ ହେଲେ ତାହାର ବିବରଣୀ ପ୍ରଦାନ କରୁଛନ୍ତି । ଏହି ପ୍ରକ୍ରିୟା ଡିସେମ୍ବର ଯାଏଁ ଚାଲିବ ବୋଲି ସୂଚନା ମିଳିଛି ।