ଜେଲ୍ ଯିବା ପାଇଁ ଜାଣିଶୁଣି ନିୟମ ଭାଙ୍ଗୁଛନ୍ତି ଜାପାନର ବୟସ୍କ ନାଗରିକ, ୮୧ ବର୍ଷୀୟା ମହିଳା କହିଲେ କାରଣ

Published By : Prameya-News7 Bureau | February 03, 2025 IST

File

ନୂଆଦିଲ୍ଲୀ: ଜାପାନରେ ବୟସ୍କଙ୍କ ପାଇଁ ନିଃସଙ୍ଗ ସବୁଠୁ ବଡ଼ ସାମାଜିକ ସମସ୍ୟା ରୂପେ ସାମନାକୁ ଆସିବାରେ ଲାଗିଛି । ଜଣେ ୮୧ ବର୍ଷୀୟା ମହିଳା ଏପରି କିଛି ଖୁଲାସା କରିଛନ୍ତି ଯାହାକୁ ନନେଇ ଚର୍ଚ୍ଚା ବଢିଛି । ମହିଳାଙ୍କ କହିବା ଅନୁସାରେ ନିଜର ଖାଇବା, ପିଇବା ଏବଂ ରହିବା ସମସ୍ୟାକୁ ଦୂର କରିବା ପାଇଁ ଜାଣିଶୁଣି ଜେଲ୍ ଯିବା ଲାଗି ଆଇନ ଉଲ୍ଲଂଘନ କରୁଛନ୍ତି ।

ରାଜଧାନୀ ଟୋକିଓର ଜେଲରେ ବନ୍ଦୀ ଓକିୟୋ କହିଛନ୍ତି ଯେ ଜେଲକୁ ଆସିବା ପରେ ତାଙ୍କ ଜୀବନରେ ସ୍ଥିରତା ଆସିଛି । ସେ କହିଛନ୍ତି ଯେ ମୁଁ ପ୍ରଥମ ଥର ପାଇଁ ୬୦ ବର୍ଷ ବୟସରେ ଖାଦ୍ୟ ଚୋରି କରିବା ମାମଲାରେ ଜେଲରେ ଭର୍ତ୍ତି କରାଯାଇଥିଲା । ତାହା ପରଠୁ ମୋତେ ଜେଲରେ ଭଲ ଖାଇବା, ପିଇବା ସହ ରହିବା ପାଇଁ ଛାତ ମିଳିଥିଲା । ଏହାପରେ ମୁଁ ନିୟମିତ ଭାବେ ଏହା କରିବାକୁ ବିଚାର କଲି । ଜାପାନ ସରକାର ବୟସ୍କ ନାଗରିକଙ୍କ ପାଇଁ ପେନ୍‌ସେନ୍ ଦିଅନ୍ତି, କିନ୍ତୁ ସେଥିରେ ଚଳିବା କଷ୍ଠସାଧ୍ୟ ହୋଇଥାଏ ।

ସିଏନ୍‌ଏନ୍ ରିପୋର୍ଟ ଅନୁସାରେ ଟୋକିଓରେ ଏହି ଜେଲରେ ୫୦୦ରୁ ଅଧିକ ମହିଳା କଏଦୀ ବନ୍ଦୀ ଅଛନ୍ତି । ଏଥିରୁ ଏକ ଚତୁର୍ଥାଂଶ କଏଦୀ ବୟସ୍କ ମହିଳା । ଓକିୟୋ କହିଛନ୍ତି ଯେ ଜେଲ୍ ଭିତର ମାହୋଲ ବହୁତ ଭଲ । ଏଠାରେ ଲୋକେ ପରସ୍ପରକୁ ସହଯୋଗ କରନ୍ତି । ଯଦି ଆର୍ଥିକ ରୂପେ ମଜଭୁତଥାନ୍ତି ତେବେ ଜେଲ୍ ଆସିବା ପାଇଁ ବିଚାର କରିନଥାନ୍ତି । ମୋ ପରିବାର ମୋଠାରୁ ଅଲଗା ରହୁଛନ୍ତି, ଏହି କାରଣରୁ ମୋତେ ଏଠାକୁ ଆସିବାକୁ ପଡ଼ିଲା ।

ଓକିୟୋ କହିଛନ୍ତି ଯେ ଜେଲକୁ ଆସିବା ପୂର୍ବରୁ ସେ ନିଜର ୪୩ ବର୍ଷୀୟ ପୁଅ ସହ ରହୁଥିଲେ । କିନ୍ତୁ ପରେ ପୁଅ ସହ ତାଙ୍କର ଝଗଡ଼ା ହୋଇଗଲା । ଘର ଛାଡ଼ି ଆସିବା ପରେ ସ୍ଥିତି ଅତି ଖରାପ ହେବାରେ ଲାଗିଥିଲା । ମୋର ଜୀବନ ଏଇଠି ଶେଷ ହୋଇଗଲା ବୋଲି ମୁଁ ଭାବିଥିଲି । ଏହାପରେ ମୁଁ ଜେଲରେ ଆସି ରହିବା ପାଇଁ ବିଚାର କଲି ।

ଗତ କିଛି ବର୍ଷରେ ଏପରି ଅନେକ ମାମଲା ଦେଖିବାକୁ ମିଳିଛି, ଯେଉଁଥିରେ ଜାପାନର ବୟସ୍କ ନାଗରିକ ଖାଦ୍ୟ, ଘର ଏବଂ ନିଃସଙ୍ଗତା ଦୂର କରିବା ପାଇଁ ଜେଲରେ ରହିବା ରାସ୍ତା ବାଛୁଛନ୍ତି । ଜାପାନରେ ବଢୁଥିବା ବୟସ୍କ ନାଗରିକ ସଂଖ୍ୟା ଏଠାରେ ସବୁଠୁ ବଡ଼ ସମସ୍ୟା ହୋଇଛି । ନିଃସଙ୍ଗତା ଦୂର କରିବା ପାଇଁ ଛୋଟ ଛୋଟ ଅପରାଧ କରି ଜେଲ ଯିବାକୁ ପସନ୍ଦ କରନ୍ତି ।  

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.