ମହାକୁମ୍ଭ ଦଳଚକଟା ଘଟଣା ସେତେ ବଡ଼ କଥା ନୁହେଁ; ହେମା ମାଳିନୀ

Published By : Prameya-News7 Bureau | February 04, 2025 IST

indiatoday

ନୂଆଦିଲ୍ଲୀ: ଉତ୍ତରପ୍ରଦେଶ ମହାକୁମ୍ଭ ମେଳାରେ ହୋଇଥିବା ଦଳାଚକଟା ଘଟଣା ସେତେ ବଡ଼ ଘଟଣା ନୁହେଁ ବୋଲି କହିଛନ୍ତି ବିଜେପି ମଥୁରା ସାଂସଦ ହେମା ମାଳିନୀ। ଏହି ଘଟଣାକୁ ନେଇ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ସଂସଦରେ ଟିପ୍ପଣୀ କରିଥିଲେ। ଯାହାର ଜବାବ ଦେଇ ଏପରି କହିଛନ୍ତି ହେମା।

ମହାକୁମ୍ଭ ମେଳାରେ ହୋଇଥିବା ଦଳାଚକଟା ଘଟଣାକୁ ଅଖିଳେଶ ଯାଦବ ଅତି ରଞ୍ଜିତ କରୁଛନ୍ତି। ତାଙ୍କ କାମ ହେଲା ଭୁଲ୍ କହିବା ବୋଲି ହେମା ମାଳିନୀ କହିଛନ୍ତି। ସେ କହିଛନ୍ତି “ଅଖିଳେଶଙ୍କ କାମ କେବଳ ମିଛ କହିବା ଆମେ ବି କୁମ୍ଭ ଯାଇଥିଲୁ। ଏହି ସମୟରେ ଦୁର୍ଘଟଣା ଘଟିଥିଲା। କିନ୍ତୁ ଏହାକୁ ଯେତେ ଅତିରଞ୍ଜିତ କରାଯାଉଛି ଏହା ସେତେ ବଡ଼ ନୁହେଁ।”

ମିଡିଆକୁ ଉତ୍ତର ଦେଇ ହେମା ସମସ୍ତଙ୍କୁ ଆଶ୍ୱାସନ ଦେଇଛନ୍ତି। ଏବଂ କହିଛନ୍ତି ମହାକୁମ୍ଭ ମେଳା ଭଳି ଏକ ବଡ଼ ଧାର୍ମିକ କାର୍ଯ୍ୟକ୍ରମକୁ ଉତ୍ତର ପ୍ରଦେଶ ସରକାର ଉତ୍ତମ ଭାବେ ପରିଚାଳନା କରୁଛନ୍ତି। ୟୁପି ସରକାରଙ୍କୁ ପ୍ରଶଂସା କରି ସେ କହିଛନ୍ତି "ଏହା ବହୁତ ଭଲ ଭାବରେ ପରିଚାଳିତ ହେଉଛି, ଏବଂ ସବୁକିଛି ବହୁତ ଭଲ ଭାବରେ କରାଯାଉଛି। ଏତେ ଲୋକ ଆସୁଛନ୍ତି, ଏହାକୁ ପରିଚାଳନା କରିବା ବହୁତ କଷ୍ଟକର କିନ୍ତୁ ଆମେ ଆମର ସର୍ବୋତ୍ତମ ଚେଷ୍ଟା କରୁଛୁ।"

ଜାନୁଆରୀ ୨୦ ତାରିଖରେ ମୌନୀ ଅମାବାସ୍ୟା ଅବସରରେ ବୁଡ଼ ପକାଇବାକୁ କୋଟି କୋଟି ଶ୍ରଦ୍ଧାଳୁ କୁମ୍ଭ ମେଳାକୁ ଆସିଥିବା ବେଳେ ଦଳାଚକଟା ହୋଇଥିଲା। ଏଥିରେ ୩୦ ଜଣଙ୍କର ମୃତ୍ୟୁ ହୋଇଥିଲା ଓ ୬୦ରୁ ଅଧିକ ଆହତ ହୋଇଥିଲେ। 

ମଙ୍ଗଳବାର ରାଷ୍ଟ୍ରପତିଙ୍କ ଅଭିଭାଷଣର ଧନ୍ୟବାଦ ପ୍ରସ୍ତାବ ଆଲୋଚନା ବେଳେ ଏହି ଘଟଣାକୁ ନେଇ ପ୍ରଶ୍ନ ଉଠାଇଥିଲେ ଅଖିଳେଶ ଯାଦବ। ୟୁପି ସରକାର ପ୍ରକୃତ ମୃତ୍ୟୁ ସଂଖ୍ୟା ଲୁଚାଉଛନ୍ତି ବୋଲି ସେ ଅଭିଯୋଗ କରିଥିଲେ।

ଅଖିଳେଶ କହିଛନ୍ତି “ସରକାର ନିରନ୍ତର ବଜେଟ୍ ତଥ୍ୟ ପ୍ରଦାନ କରୁଛନ୍ତି। ଦୟାକରି ମହାକୁମ୍ଭରେ ମୃତ୍ୟୁ ହୋଇଥିବା ଲୋକଙ୍କ ସଂଖ୍ୟା ମଧ୍ୟ ଦିଅନ୍ତୁ। ମହାକୁମ୍ଭର ବ୍ୟବସ୍ଥା ବିଷୟରେ ସ୍ପଷ୍ଟୀକରଣ ଦେବା ପାଇଁ ଏକ ସର୍ବଦଳୀୟ ବୈଠକ ଡକାଯାଉ ବୋଲି ମୁଁ ଦାବି କରୁଛି। ମହାକୁମ୍ଭ ବିପର୍ଯ୍ୟୟ ପରିଚାଳନା ଏବଂ ହଜିଯାଇଥିବା କେନ୍ଦ୍ରର ଦାୟିତ୍ୱ ସେନାକୁ ଦିଆଯିବା ଉଚିତ ଥିଲା ବୋଲି ଅଖିଳେଶ କହିଛନ୍ତି।” କେବଳ ସେତିକି ନୁହେଁ, ଏ ଅବ୍ୟବସ୍ଥା ଯୋଗୁ ମହାକୁମ୍ଭ ଆୟୋଜନ କରୁଥିବା ଅଧିକାରୀ ଓ ମୃତ୍ୟୁ ସଂଖ୍ୟା ଲୁଚାଇଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଅଖିଳେଶ ଦାବି କରିଛନ୍ତି। 

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.