ନୀତୀଶ କୁମାର ନିଃସର୍ତ୍ତ କ୍ଷମା ମାଗିବା ଦରକାର, ହିଜାବ କଣ୍ଟ୍ରୋଭର୍ସି ଉପରେ କହିଲେ ଜାଭେଦ ଅଖତର

ପାଟନା: ଜଣେ ମୁସଲିମ ମହିଳା ଡାକ୍ତରଙ୍କ ହିଜାବ ଟାଣି ବିବାଦରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର । ଏବେ ତାଙ୍କୁ ତୀବ୍ର ସମାଲୋଚନାର ଶିକାର ହେବାକୁ ପଡ଼ିଛି । ମନୋରଞ୍ଜନ ଦୁନିଆର ବ୍ୟକ୍ତି ନୀତୀଶ କ୍ଷମା ମାଗନ୍ତୁ ବୋଲି ଦାବି କରିଛନ୍ତି । ଜାୟରା ୱାସିମ, ରାଖୀ ସାୱନ୍ତ ଏବଂ ସାନା ଖାନଙ୍କ ପରେ ଜାଭେଦ ଅଖତର ମଧ୍ୟ ତାଙ୍କର ଅସନ୍ତୋଷ ପ୍ରକାଶ କରିଛନ୍ତି। ସେ ନୀତିଶ କୁମାରଙ୍କୁ କ୍ଷମା ମାଗିବାକୁ ଦାବି କରି ସୋସିଆଲ ମିଡିଆରେ ଏକ ପୋଷ୍ଟ ସେୟାର କରିଛନ୍ତି।

ଜାଭେଦ ଅଖତର ପୋଷ୍ଟ ସେୟାର କରି ଲେଖିଛନ୍ତି, ‘ମୁଁ ପରଦାର ପାରମ୍ପରିକ ଧାରଣାକୁ କେତେ ବିରୋଧ କରେ, ଯେଉଁମାନେ ମୋତେ ଚିହ୍ନିଛନ୍ତି ସେମାନଙ୍କୁ ଜଣା । କିନ୍ତୁ ଏହାର ଅର୍ଥ ନୁହେଁ ଯେ, ଜଣେ ମୁସଲିମ ମହିଳା ଡାକ୍ତରଙ୍କ ପ୍ରତି ନୀତୀଶ କୁମାର ଯାହା କଲେ ତାହା ଠିକ୍ । ମୁଁ ଏହାକୁ କଡ଼ା ଶବ୍ଦରେ ନିନ୍ଦା କରୁଛି। ନୀତୀଶ କୁମାର ତାଙ୍କୁ ନିଃସର୍ତ୍ତ କ୍ଷମା ମାଗିବା ଉଚିତ।’ ଜାଭେଦ ଅଖତରଙ୍କ ପୂର୍ବରୁ ଅନେକ ବଲିଉଡ ସେଲିବ୍ରିଟି ନୀତୀଶ କୁମାରଙ୍କ ବିରୋଧରେ ଅସନ୍ତୋଷ ଝାଡ଼ିଛନ୍ତି ।

ଜାୟରା ୱାସିମ ସୋସିଆଲ ମିଡିଆରେ ନିଜର ଅସନ୍ତୋଷ ପ୍ରକାଶ କରିଛନ୍ତି। ସେ ଲେଖିଛନ୍ତି, ‘ଜଣେ ମହିଳାଙ୍କ ମର୍ଯ୍ୟାଦା ପିଲା ଖେଳ ନୁହେଁ । ଜଣେ ମୁସଲିମ ମହିଳା ଭାବରେ, ଅନ୍ୟ ଜଣେ ମହିଳାଙ୍କ ହିଜାବ ଖୋଲାଯିବାର ଦେଖିବା ଅତ୍ୟନ୍ତ ଦୁଃଖଦ । କ୍ଷମତା କାହାକୁ ନିଜର ସୀମା ପାର କରିବାକୁ ଅନୁମତି ଦିଏ ନାହିଁ। ନୀତିଶ କୁମାର ସେହି ମହିଳାଙ୍କୁ କ୍ଷମା ମାଗିବା ଉଚିତ।’

ସାନା ଖାନ ଏକ ଭିଡିଓ ସେୟାର କରିଛନ୍ତି ଯେଉଁଥିରେ ସେ ନୀତିଶ କୁମାରଙ୍କ ନାମ ନନେଇ ଅସନ୍ତୋଷ ପ୍ରକାଶ କରିଛନ୍ତି । ସେ କହିଛନ୍ତି, ‘କିଛି ଦିନ ପୂର୍ବରୁ, ଆମର ଜଣେ ହିଜାବୀ ଭଉଣୀଙ୍କ ହିଜାବ ତାଙ୍କ ମୁହଁ ଘୋଡ଼ାଇଥିଲା। ଆମର ସମ୍ମାନଜନକ ରାଜନେତା ତାଙ୍କୁ ଏକ ପ୍ରମାଣପତ୍ର ଦେଉଥିଲେ । ମୁଁ ଜାଣିନାହିଁ ତାଙ୍କ ଭିତରେ ଏପରି କଣ ସୃଷ୍ଟି ହେଲା ଯେ, ସେ ମହିଳାଙ୍କ ମୁହଁ ଦେଖିବାକୁ ବ୍ୟଗ୍ର ହୋଇପଡ଼ିଲେ । ତା'ପରେ ସେ ନିକାବ କାଢିଦେଲେ। ଆଶ୍ଚର୍ଯ୍ୟର କଥା ହେଉଛି, ତାଙ୍କ ପଛରେ ଥିବା ଲୋକମାନେ ଗଧ ପରି ହସୁଥିଲେ। ଭିଡିଓ ଦେଖି ମୋର ଇଚ୍ଛା ହେଉଥିଲା, ସେମାନଙ୍କୁ ଚାପୁଡ଼ା ମାରିବାକୁ ।’

ରାଖୀ ସାୱନ୍ତ ସୋସିଆଲ ମିଡିଆରେ ଏକ ଭିଡିଓ ମଧ୍ୟ ସେୟାର କରିଛନ୍ତି । ଯେଉଁଥିରେ ସେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ କ୍ଷମା ମାଗିବାକୁ କହିଛନ୍ତି। ଭିଡିଓରେ ସେ କହିଛନ୍ତି, ‘ନୀତୀଶ ଜୀ ଆପଣ ଜାଣିବା ଉଚିତ ଯେ, ମୁସଲମାନ ମହିଳାମାନେ ହିଜାବ ପିନ୍ଧନ୍ତି । କିନ୍ତୁ ଆପଣ ଏହାକୁ ଖୋଲି ଦେଇଛନ୍ତି। ଯଦି ମୁଁ ସମସ୍ତଙ୍କ ସାମ୍ନାରେ ଆପଣଙ୍କ ଧୋତି ଖୋଲିଦିଏ ତେବେ ଆପଣଙ୍କୁ କିପରି ଲାଗିବ ?’