ଚାକିରି ଛାଡିଲେ ଓ୍ୱାଶିଂଟନ୍ ପୋଷ୍ଟ CEO : କର୍ମଚାରୀଙ୍କୁ ଛଟେଇ କଲା ପରେ ନିଜେ ବିଦା ହେଲେ

ମୁମ୍ବାଇ,୦୮|୦୨ : ଚର୍ଚ୍ଚାରେ ଓ୍ୱାଶିଂଟନ ପୋଷ୍ଟ୍ । ଗଣ ଛଟେଇକୁ ନେଇ ଚର୍ଚ୍ଚାରେ ରହିବା ପରେ ଏବେ ଓ୍ୱାଶିଂଟନ ପୋଷ୍ଟକୁ ନେଇ ଆସିଛି ବଡ ଖବର । ଏହାର ସିଇଓ ଓ୍ୱିଲ୍ ଲେଓ୍ୱିସ୍ ଏବେ ଚାକିରିରୁ ବିଦା ହୋଇଛନ୍ତି । ସେ ନିଜର ପଦବୀରୁ ଇସ୍ତଫା ଦେଇଥିବା ଜଣାପଡିଛି ।

ରିପୋର୍ଟ ଅନୁସାରେ, ଗତ କିଛି ଦିନ ତଳେ ଆମେରିକାର ପ୍ରସିଦ୍ଧ ଓ୍ୱାଶିଂଟନ ପୋଷ୍ଟ ଶହ ଶହ କର୍ମଚାରୀଙ୍କୁ ଛଟେଇ କରିଥିଲା । ଏଥିରେ କଂଗ୍ରେସ ସାଂସଦ ଶଶି ଥରୁରଙ୍କ ପୁଅ ଇଶାନ ଥରୁର ମଧ୍ୟ ରହିଥିଲେ । ତାଙ୍କ ସମେତ ଅନେକ ବଡ ବଡ ସାମ୍ବାଦିକଙ୍କୁ ଚାକିରି ହରାଇବାକୁ ପଡିଥିଲା । ଏହାସହ କମ୍ପାନୀ ନିଜର କିଛି କାର୍ଯ୍ୟାଳୟକୁ ମଧ୍ୟ ବନ୍ଦ କରିଥିଲା । ଯାହାକୁ ନେଇ ଅନେକ ସମାଲୋଚନା ମଧ୍ୟ କରିଥିଲେ ।

ଏବେ କମ୍ପାନୀର ସିଇଓ ଲେଓ୍ୱିସ୍ ନିଜ ପଦରୁ ଇସ୍ତଫା ଦେଇଛନ୍ତି । ଇସ୍ତଫା ଦେବା ନେଇ ସେ ନିଜେ ସୂଚନା ଦେଇଛନ୍ତି । ଏହାସହ କହିଛନ୍ତି ଯେ, ଏହା ହିଁ ପ୍ରକୃଷ୍ଟ ସମୟ । ଏପରି ଭାବେ ସେ ଦୁଇ ପୃଷ୍ଠାର ଏକ ଇସ୍ତଫା ପତ୍ର କମ୍ପାନୀକୁ ମେଲ୍ କରିଛନ୍ତି । ତାଙ୍କ ଜାଗାରେ ଅସ୍ଥାୟୀ ଭାବେ ଜେଫ୍ ଡି ଓୋନୋଫ୍ରିୟୋଙ୍କୁ ଦାୟିତ୍ୱ ପ୍ରଦାନ କରାଯାଇଛି ।

ଇସ୍ତଫା ଦେଇଥିଲେ ବି ଲେଓ୍ୱିସ୍ ନିଜ ମେଲରେ ମାଲିକ ଜେଫ୍ ବେଜୋସଙ୍କୁ ପ୍ରଶଂସା କରିଛନ୍ତି । ତାଙ୍କଠୁ ଭଲ ମାଲିକ କେହି ମିଳିବେ ନାହିଁ ବୋଲି ଲେଓ୍ୱିସ୍ ଦର୍ଶାଇଛନ୍ତି । ତେବେ ଓ୍ୱାଶିଂଟନ୍ ପୋଷ୍ଟ ପୂର୍ବରୁ ସେ ଦି ଓ୍ୱାଲ୍ ଷ୍ଟ୍ରିଟ୍ ଜର୍ଣ୍ଣାଲରେ କାର୍ଯ୍ୟ କରୁଥିଲେ ।

ତେବେ ଓ୍ୱିଲ୍ ଚାକିରି ଛାଡିବା ପରେ କମ୍ପାନୀର ଅନ୍ୟ କର୍ମଚାରୀ ପ୍ରତିକ୍ରିୟା ରଖିଛନ୍ତି । ଓ୍ୱିଲଙ୍କ ଜାଗା ନେବା ସହଜ ନୁହେଁ । ସେ ଖବରକାଗଜ ସଂସ୍ଥା ଛାଡିବା ଏକ କ୍ଷତି ବୋଲି କର୍ମଚାରୀ ସଙ୍ଘ କହିଛି ।