ଶୁଭମନ ଗିଲ୍ ବାୟ-ବାୟ ! ଦିନିକିଆ ଦଳର ଅଧିନାୟକ ହୋଇ ପାରନ୍ତି; ବିଶ୍ଵକପ୍ ପୂର୍ବରୁ ବଡ଼ ଖୁଲାସା

ନୂଆଦିଲ୍ଲୀ: ଟି-୨୦ ବିଶ୍ଵକପ୍ ଦଳରୁ ବାଦ୍ ପଡ଼ିଥିବା ଶୁଭମନ ଗିଲଙ୍କ ପାଇଁ ଆଗାମୀ ସମୟରେ ଆହୁରି ମୁସ୍କିଲ ବଢିପାରେ। ଚଳିତ ବର୍ଷ ତାଙ୍କୁ ଟେଷ୍ଟ ଓ ଦିନିକିଆ ଦଳର ଅଧିନାୟକ ଦାୟିତ୍ଵ ଦିଆଯାଇଥିଲା। ଏହା ବ୍ୟତୀତ ଟି-୨୦ ଦଳର ଉପଅଧିନାୟକ ଭାବେ ମଧ୍ୟ ନିଯୁକ୍ତି ଦିଆଯାଇଥିଲା। କିନ୍ତୁ ଡିସେମ୍ବର ୨୦ରେ ଯେବେ ଟି-୨୦ ବିଶ୍ଵକପ୍ ୨୦୨୬ ପାଇଁ ଭାରତୀୟ ଦଳ ଚୟନ କରାଗଲା, ସେଥିରେ ଗିଲଙ୍କ ନାଁ ହିଁ ନ ଥିଲା। ସଦ୍ୟତମ ଖବର ଅନୁଯାୟୀ, ଶୁଭମନ ଗିଲଙ୍କଠୁ ଦିନିକିଆ ଦଳର ଅଧିନାୟକ ପଦ କଢା ଯାଇ ଶ୍ରେୟସ ଆୟରଙ୍କୁ ନୂଆ ଅଧିନାୟକ କରାଯାଇପାରେ।

ରିପୋର୍ଟରେ ଦାବି କରାଯାଇଛି ଯେ ଶ୍ରେୟସ ଆୟରଙ୍କୁ ଭାରତୀୟ ଦିନିକିଆ ଦଳର ନୂତନ ଅଧିନାୟକ ନିଯୁକ୍ତ କରାଯାଇପାରେ। ଶ୍ରେୟସ ବର୍ତ୍ତମାନ ଦିନିକିଆ ଦଳର ଉପ-ଅଧିନାୟକ ଅଛନ୍ତି। ଆୟରଙ୍କ ପାଖରେ ଅଧିନାୟକତ୍ଵର ବେଶ ଅଭିଜ୍ଞତା ଅଛି। ସେ ଘରୋଇ କ୍ରିକେଟ୍ ଏବଂ ଆଇପିଏଲ ଉଭୟରେ ଦଳର ନେତୃତ୍ଵ ନେଇ ସାବ୍ୟସ୍ତ କରି ସାରିଛନ୍ତି। ଶ୍ରେୟସଙ୍କ ଦିନିକିଆ ଉପ-ଅଧିନାୟକ ଭାବରେ ନିଯୁକ୍ତି ସଂପର୍କରେ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି।

ଚଳିତ ବର୍ଷ ଅକ୍ଟୋବରରେ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜ ପୂର୍ବରୁ ଶୁଭମନ ଗିଲଙ୍କୁ ଦିନିକିଆ ଦଳର ଅଧିନାୟକ ନିଯୁକ୍ତ କରାଯାଇଥିଲା। ତାଙ୍କ ସହିତ ଶ୍ରେୟସ ଆୟର ଉପ-ଅଧିନାୟକ ଭାବରେ ଦାୟିତ୍ଵ ଗ୍ରହଣ କରିଥିଲେ। ଯଦି ଏହି ରିପୋର୍ଟଗୁଡ଼ିକ ସଠିକ୍ ହୁଏ, ତେବେ ଶ୍ରେୟସ ଆୟର ଭାରତୀୟ ଦିନିକିଆ ଦଳର ଅଧିନାୟକ ହେବାରେ ୨୯ତମ କ୍ରିକେଟର ହେବେ।

ଶୁଭମନ ଗିଲଙ୍କ ଅଧିନାୟକତ୍ୱରେ, ଭାରତ ଏପର୍ଯ୍ୟନ୍ତ ତିନୋଟି ଦିନିକିଆ ମ୍ୟାଚ୍ ଖେଳିଛି, ଯେଉଁଥିରେ ଦଳ କେବଳ ଗୋଟିଏ ମ୍ୟାଚ୍ ଜିତିଛି। ଅଷ୍ଟ୍ରେଲିଆ ଗସ୍ତରେ ଟିମ୍ ଇଣ୍ଡିଆ ଦିନିକିଆ ସିରିଜରେ ୧-୨ରେ ପରାଜିତ ହୋଇଥିଲା। ୨୦୨୬ ଟି-୨୦ ବିଶ୍ଵକପ୍ ପୂର୍ବରୁ ଗିଲଙ୍କୁ ODI ଅଧିନାୟକତ୍ୱରୁ ହଟାଇ ଦିଆଯାଇପାରେ ବୋଲି ଅନୁମାନ କରାଯାଉଛି। ଏହା ପରେ ତାଙ୍କର ଟି-୨୦ ଓ ଦିନିକିଆ ଭବିଷ୍ୟତ ଅନିଶ୍ଚିତ ଦେଇ ଗତି କରୁଛି।

ଶୁଭମନ ଗିଲ୍ ଟି-୨୦ରୁ ବାହାର

ଗତ କିଛି ମାସ ଧରି ଟି-୨୦ ଦଳର ଉପ-ଅଧିନାୟକ ଥିବା ଶୁଭମନ ଗିଲ୍ଙ୍କର ଟି-୨୦ ଫର୍ମ ସଂପ୍ରତି ଦୟନୀୟ ରହିଛି। ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ୍ରେ ସେ ତିନୋଟି ମ୍ୟାଚ୍ରେ ମାତ୍ର ୩୨ ରନ୍ କରିଥିଲେ। ଆଘାତ ଯୋଗୁଁ ସେ ଚତୁର୍ଥ ଏବଂ ପଞ୍ଚମ ଟି-୨୦ ମ୍ୟାଚ୍ ଖେଳିପାରି ନଥିଲେ ବୋଲି ଖବର ଆସିଥିଲା। କିନ୍ତୁ ଅନ୍ୟ କିଛି ରିପୋର୍ଟରେ ଦାବି କରାଯାଇଛି ଯେ ମ୍ୟାନେଜମେଣ୍ଟ ପୂର୍ବରୁ ଗିଲ୍କୁ ହଟାଇବା ପାଇଁ ନିଷ୍ପତ୍ତି ନେଇ ସାରିଥିଲେ। ଏହି କାରଣରୁ ସେ ପଞ୍ଚମ ଟି-୨୦ ମ୍ୟାଚ୍ ଖେଳିପାରି ନଥିଲେ। ଆଉ ଏବେ ଟି-୨୦ ବିଶ୍ଵକପ୍ ଦଳରେ ତାଙ୍କୁ ସ୍ଥାନ ମିଳିନି।