ପ୍ରେମାନନ୍ଦଜୀ ମହାରାଜ ପୁଣି ଅସୁସ୍ଥ, ହସ୍ପିଟାଲରେ ଭର୍ତ୍ତି

ବୃନ୍ଦାବନ ୨୨।୧୦: ସନ୍ଥ ପ୍ରେମାନନ୍ଦଜୀ ମହାରାଜ ବୁଧବାର ପୁଣି ଥରେ ଅସୁସ୍ଥ ହୋଇପଡିଛନ୍ତି। ସେ ତାଙ୍କ ପେଟରେ ଅସୁବିଧା ଯୋଗୁ ପୁଣି ଡାକ୍ତରଙ୍କୁ ଦେଖାଇବାକୁ ହସ୍ପିଟାଲ ଯାଇଛନ୍ତି। ସେଠାରେ ଡାକ୍ତର ତାଙ୍କୁ ସିଟି ସ୍କାନ କରିବାକୁ ପରାମର୍ଶ ଦେଇଛନ୍ତି। ମିଳୁଥିବା ସୂଚନା ଅନୁସାରେ ସନ୍ଥଙ୍କ ଅନୁଗାମୀମାନେ ଏକ ଘରୋଇ ଲ୍ୟାବରେ ତାଙ୍କର ସିଟି ସ୍କାନ କରାଇଛନ୍ତି। ତେବେ ରିପୋର୍ଟରେ କଣ ଆସିଛି ତାହା ଜଣାପଡି ନାହିଁ। ସେହିପରି ପ୍ରେମାନନ୍ଦଜୀ ମହାରାଜଙ୍କ ସ୍ୱାସ୍ଥ୍ୟ ଏବେ କିପରି ଅଛି ତାହା ମଧ୍ୟ ସ୍ପଷ୍ଟ ହୋଇ ପାରିନି।

ଉଲ୍ଲେଖଯୋଗ୍ୟ ଯେ ପ୍ରେମାନନ୍ଦଜୀ ମହାରାଜଙ୍କ ସ୍ୱାସ୍ଥ୍ୟ ଗତ କିଛି ଦିନ ହେଲା ଠିକ୍ ନାହିଁ। ଏଣୁ ତାଙ୍କ ରାତ୍ରି କାଳୀନ ପଦଯାତ୍ରାକୁ ଅନିଶ୍ଚିତ କାଳ ପର୍ଯ୍ୟନ୍ତ ବନ୍ଦ କରାଯାଇଛି। ତେବେ ପରେ ତାଙ୍କ ସ୍ୱାସ୍ଥ୍ୟରେ କିଛିମାତ୍ରାରେ ସୁଧାର ଆସିବା ଯୋଗୁ ସନ୍ଥ ପ୍ରେମାନନ୍ଦ ରାତି ଅଢେଇଟାରେ ତାଙ୍କ ଆଶ୍ରମ ରାଧାକୃଷ୍ଣ କେଳି କୁଞ୍ଜରୁ ଭକ୍ତଙ୍କୁ ଦର୍ଶନ ଦେବା ପାଇଁ ପାଖାପାଖି ୫୦୦ ମିଟର ରାସ୍ତା ପରିକ୍ରମା ମାର୍ଗରେ ଚାଲୁଥିଲେ।

ଏହା ପରେ ପୁଣି ସନ୍ଥ ପ୍ରେମାନନ୍ଦଙ୍କ ସ୍ୱାସ୍ଥ୍ୟ ଖରାପ ହେବା କାରଣରୁ ମଙ୍ଗଳବାର ସକାଳେ ମଥୁରା ବିରଳା ମନ୍ଦିର ନିକଟସ୍ଥ ଶୈଳସୁଦ୍ଧା ପ୍ୟାଥୋଲ୍ୟାବରେ ସିଟି ସ୍କାନ କରାଯାଇଥିଲା। ତେବେ ପ୍ରେମାନନ୍ଦଜୀ ଅସୁସ୍ଥ ହେବା ପରେ ସାରା ଦେଶରେ ତାଙ୍କ ଅନୁଗାମୀମାନେ ତାଙ୍କ ସୁସ୍ଥତା ପାଇଁ ପ୍ରାର୍ଥନା କରୁଛନ୍ତି। ଏଥିରେ ପ୍ରାୟ ସବୁ ଧର୍ମର ଅନୁଗାମୀ ଅଛନ୍ତି। କେତେକ ମୁସଲମାନ ଅନୁଯାୟୀ ପ୍ରେମାନନ୍ଦଜୀ ମହାରାଜଙ୍କ ସୁସ୍ଥତା କାମନା କରି ଆଜମେର ଦରଘାରେ ଚାଦର ମଧ୍ୟ ଚଢେଇଛନ୍ତି।