କଟକ: ଭାରତ ସରକାର ଓ ନେହରୁ ଯୁବ କେନ୍ଦ୍ରର ୟୁଥ୍ ଏକ୍ସଚେଞ୍ଜ କାର୍ଯ୍ୟକ୍ରମ ଅନୁଯାୟୀ, ୧୩୭ ଜଣ କାଶ୍ମୀରୀ ଯୁବକ ଯୁବତୀ କଟକରେ ପହଞ୍ଚିଛନ୍ତି। ଓଡ଼ିଶା ଆସି ବିଶେଷ କରି ଓଡ଼ିଶାର ସଂସ୍କୃତି, ପରମ୍ପରା, ଖାଦ୍ୟ ଅଭ୍ୟାସ ଆଦି ସମ୍ପର୍କରେ ଜାଣିବା ଏହି ୟୁଥ୍ ଏକ୍ସଚେଞ୍ଜ କାର୍ଯ୍ୟକ୍ରମର ଉଦ୍ଦେଶ୍ୟ ଥିବାବେଳେ, ଆଗାମୀ ଦୁଇ ଦିନରେ ଏହି ଯୁବକ ଯୁବତୀମାନେ କଟକ ଓ ଭୁବନେଶ୍ୱରର ବିଭିନ୍ନ ଐତିହ୍ୟ ଓ ପର୍ଯ୍ୟଟନ ସ୍ଥଳୀ ବୁଲି ଦେଖିବାର କାର୍ଯ୍ୟକ୍ରମ ରହିଛି।
ଏହି ଯୁବକ ଯୁବତୀମାନଙ୍କ ମଧ୍ୟରୁ ଅଧିକାଂଶ ଜମ୍ମୁ କାଶ୍ମୀରର ଉପାନ୍ତ ଜିଲ୍ଲା ଓ ଉପାନ୍ତ ଅଞ୍ଚଳରୁ ଆସିଛନ୍ତି। କଟକ ନେତାଜୀ ବସ୍ ଟର୍ମିନାଲରେ ହୋଇଥିବା ସ୍ବତନ୍ତ୍ର ଶୀତତାପ ନିୟନ୍ତ୍ରିତ ଅତିଥି ଆଶ୍ରୟସ୍ଥଳୀରେ ଏମାନଙ୍କର ରହିବା ଓ ଖାଦ୍ୟ ପାନୀୟର ବ୍ୟବସ୍ଥା କରାଯାଇଛି। ଏହି ଅତିଥିମାନଙ୍କୁ ସ୍ବାଗତ ପାଇଁ ଏକ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ ମଧ୍ୟ କରାଯାଇଥିଲା। ଯେଉଁଥିରେ କଟକ ସାଂସଦ ଭର୍ତ୍ତୃହରି ମହତାବ, କଟକ ସଦର ବିଧାୟକ ପ୍ରକାଶ ସେଠୀ, ଜିଲ୍ଲାପାଳ ଦତ୍ତାତ୍ରେୟ ଭାଓସାହେବ ସିନ୍ଦେ ଓ ଡିସିପି ଜଗମୋହନ ମୀନା ପ୍ରମୁଖ ଯୋଗ ଦେଇଥିଲେ।
