ମଣ୍ଡି ୪।୬: ବଡ଼ ପରଦାରେ କମାଲ କରୁଥିବା କଙ୍ଗନା ରଣାଓତ ଚଳିତ ଲୋକସଭା ନିର୍ବାଚନରେ ରାଜନୀତିକୁ ଏଣ୍ଟ୍ରି କରିଛନ୍ତି। କଙ୍ଗନା ହିମାଚଳ ପ୍ରଦେଶ ମଣ୍ଡିରୁ ବିଜେପି ଟିକେଟ୍ରେ ନିର୍ବାଚନ ଲଢିଥିବା ବେଳେ ତାଙ୍କୁ ବଡ଼ ସଫଳତା ମିଳିଛି। ତେବେ ଏହା ପୂର୍ବରୁ କଙ୍ଗନା କହିଥିଲେ ଯେ ଯଦି ସେ ନିର୍ବାଚନ ଜିତନ୍ତି ତେବେ ବଲିଉଡ ଛାଡିଦେବେ। କଙ୍ଗନା ୬ଥର ପୂର୍ବ ମୁଖ୍ୟମନ୍ତ୍ରୀ ବୀରଭଦ୍ର ସିଂହ ଓ ମଣ୍ଡିର ସିଟିଂ ଏମପି ପ୍ରତିଭା ସିଂହଙ୍କ ପୁଅ ବିକ୍ରମାଦିତ୍ୟଙ୍କୁ ବିପୁଳ ଭୋଟରେ ହରାଇଛନ୍ତି।
କଙ୍ଗନା ରଣାଓତ ମଣ୍ଡିରୁ ବିଜୟ ନେଇ ଏକ ପୋଷ୍ଟ କରିଛନ୍ତି ଓ ନିର୍ବାଚନମଣ୍ଡଳିର ଭୋଟରଙ୍କୁ ଧନ୍ୟବାଦ ଜଣାଇଛନ୍ତି। ସେ ଲେଖିଛନ୍ତି ଯେ ମଣ୍ଡିବାସୀଙ୍କ ଏହି ଭଲପାଇବା ଓ ବିଶ୍ୱାସ ପାଇଁ କୃତଜ୍ଞତା ଜଣାଉଛି। ସେ ତାଙ୍କର ବିଜୟକୁ ଜନତାଙ୍କ ବିଜୟ ବୋଲି କହିଛନ୍ତି। ମୂଳତଃ ହିମାଚଳର ବାସିନ୍ଦା କଙ୍ଗନା ଦ୍ୱାଦଶ ଫେଲ ହେବା ପରେ ୧୭ ବର୍ଷ ବୟସରେ ଘର ଛାଡିଦେଇଥିଲେ। ଏହା ପରେ ସେ ଦିଲ୍ଲୀରେ ମଡେଲିଂ ଆରମ୍ଭ କରିଥିଲେ। ଅନେକ ସଂଘର୍ଷ ପରେ କଙ୍ଗନା ୨୦୦୬ରେ ଫିଲ୍ମ ଗ୍ୟାଙ୍ଗଷ୍ଟରରୁ ବଲିଉଡ ଯାତ୍ରା ଆରମ୍ଭ କରିଥିଲେ। ଅଭିନେତ୍ରୀଙ୍କ ଏହି ଫିଲ୍ମ ବ୍ଲକବଷ୍ଟର ସାବ୍ୟସ୍ତ ହୋଇଥିଲା। ଏହାପରେ ତାଙ୍କୁ ଇଣ୍ଡଷ୍ଟ୍ରିରେ ପରିଚୟ ମିଳିଥିବା ବେଳେ ବଲିଉଡର ଟପ୍ ଅଭିନେତ୍ରୀଙ୍କ ମଧ୍ୟରେ ନିଜ ପାଇଁ ସ୍ଥାନ ସୃଷ୍ଟି କରିଥିଲେ।
କଙ୍ଗନା ରଣାଓତଙ୍କୁ ୨୦୨୧ ମସିହାରେ ତତ୍କାଳୀନ ରାଷ୍ଟ୍ରପତି ରାମନାଥ କୋବିନ୍ଦ ପଦ୍ମଶ୍ରୀ ସମ୍ମାନରେ ସମ୍ମାନୀତ କରିଥିଲେ। କଙ୍ଗନା ହିନ୍ଦୀ ଫିଲ୍ମ ବ୍ୟତୀତ ଦକ୍ଷିଣ ଭାରତୀୟ ଫିଲ୍ମରେ ମଧ୍ୟ ଅଭିନୟ କରିଛନ୍ତି। ସେ କିଛି ତାମିଲ ଫିଲ୍ମ ମଧ୍ୟ କରିଛନ୍ତି। ତାଙ୍କୁ ୪ ଥର ଜାତୀୟ ଫିଲ୍ମ ପୁରସ୍କାର, ୫ ଫିଲ୍ମଫେୟାର ପୁରସ୍କାର ଓ ୩ ଅନ୍ତର୍ଜାତୀୟ ଭାରତୀୟ ଫିଲ୍ମ ଆକାଡେମୀ ପୁରସ୍କାର ମିଳିଛି।
