ମିଆଁମାରର କୁଖ୍ୟାତ ସାଇବରସ୍କାମ୍ କେନ୍ଦ୍ର କେକେ ପାର୍କରେ ସେନା ପକ୍ଷରୁ ଚଢାଉ, ୨୦୦୦ରୁ ଅଧିକ ଲୋକ ଅଟକ

ନୂଆଦିଲ୍ଲୀ: ଅନଲାଇନ ସ୍କାମ ରୋକିବା ଦିଗରେ ମିଆଁମାର ସେନାକୁ ବଡ଼ ସଫଳତା ମିଳିଛି । ଦେଶର ସରକାରୀ ଗଣମାଧ୍ୟମ ଅନୁଯାୟୀ, ମିଆଁମାରର ସେନା ଏକ ଅନଲାଇନ୍ ସ୍କାମିଂ ଅପରେସନକୁ ବନ୍ଦ କରି ୨୦୦୦ରୁ ଅଧିକ ଲୋକଙ୍କୁ ଅଟକ କରିଛି । ଥାଇଲାଣ୍ଡ ସୀମା ନିକଟରେ ହୋଇଥିବା ଏହି ଚଢାଉ ସମୟରେ, ଡଜନ ଡଜନ ଷ୍ଟାରଲିଙ୍କ ସାଟେଲାଇଟ୍ ଇଣ୍ଟରନେଟ୍ ଟର୍ମିନାଲକୁ ମଧ୍ୟ ଜବତ କରାଯାଇଥିଲା ।

ମିଆଁମାର ସାଇବରସ୍କାମ୍ ଅପରେସନ୍ ପାଇଁ କୁଖ୍ୟାତ । ସାରା ବିଶ୍ୱରେ ଲୋକଙ୍କଠାରୁ ଠକେଇ ପାଇଁ ଦାୟୀ । ଅନଲାଇନରେ ଲୋକଙ୍କ ବିଶ୍ୱାସ ଜିତିବା ପରେ ଠକେଇ କରିଥାନ୍ତି । ଗତ କିଛି ବର୍ଷଗୁଡ଼ିକରେ, ସାଇବରସ୍କାମ୍ ଚଲାଉଥିବା ରାକେଟର ମୁଖ୍ୟମାନେ ମିଛ ପ୍ରଲୋଭନ ଦେଖାଇ ଅନ୍ୟ ଦେଶରୁ ଶ୍ରମିକଙ୍କୁ ନିଯୁକ୍ତି ଦେବା ପାଇଁ କୁଖ୍ୟାତ ହୋଇଯାଇଛନ୍ତି । ଚାକିରି ପ୍ରତିଶ୍ରୁତି ଦେଇ ଲୋକଙ୍କୁ ଆଣି ବନ୍ଦୀ କରି ସେମାନଙ୍କୁ ଅପରାଧିକ କାର୍ଯ୍ୟକଳାପ କରିବାକୁ ବାଧ୍ୟ କରାଯାଇଥାଏ। ମିଆଁମା ଆଲିନ୍ ଖବରକାଗଜର ରିପୋର୍ଟ ଅନୁସାରେ, ସୋମବାର ସେନା କେକେ ପାର୍କରେ ଚଢାଉ କରିଥିଲା, ଯାହା ଏକ ଡକ୍ୟୁମେଣ୍ଟେଡ୍ ସାଇବର ଅପରାଧ କେନ୍ଦ୍ର ।

ଅନଲାଇନ୍ ଠକେଇ, ଅବୈଧ ଜୁଆ ଏବଂ ସୀମାପାର ସାଇବର ଅପରାଧକୁ ଦମନ କରିବା ପାଇଁ ସେପ୍ଟେମ୍ବର ଆରମ୍ଭରେ ଆରମ୍ଭ ହୋଇଥିବା ଅଭିଯାନର ଏକ ଅଂଶ ଭାବରେ ଏହି ପଦକ୍ଷେପ ନିଆଯାଇଛି । କେକେ ପାର୍କ ମିଆଁମାରର କାୟିନ୍ ରାଜ୍ୟର ଥାଇଲାଣ୍ଡ ସୀମାରେ ଥିବା ଏକ ପ୍ରମୁଖ ବାଣିଜ୍ୟିକ ସହର ମାୟାୱାଡିର ଉପକଣ୍ଠରେ ଅବସ୍ଥିତ । ରିପୋର୍ଟରେ କୁହାଯାଇଛି ଯେ ୨୬୦ରୁ ଅଧିକ କୋଠା ଅଣପଞ୍ଜୀକୃତ ଏବଂ ୩୦ ସେଟ୍ ଷ୍ଟାରଲିଙ୍କ ସାଟେଲାଇଟ୍ ଇଣ୍ଟରନେଟ୍ ଟର୍ମିନାଲ ସମେତ ଉପକରଣ ଜବତ କରାଯାଇଛି ବୋଲି ସେନା ସ୍ପଷ୍ଟ କରିଛି ।

ଷ୍ଟାରଲିଙ୍କ୍ ଏଲନ ମସ୍କଙ୍କ ସ୍ପେସଏକ୍ସ କମ୍ପାନିର ଏକ ଅଂଶ ଏବଂ ଏହି ଟର୍ମିନାଲଗୁଡ଼ିକ ଏହାର ସାଟେଲାଇଟଗୁଡ଼ିକୁ ସଂଯୋଗ କରେ । କିନ୍ତୁ ଏହି କମ୍ପାନି ମିଆଁମାରରେ କାର୍ଯ୍ୟ ପାଇଁ ଲାଇସେନ୍ସପ୍ରାପ୍ତ ନୁହେଁ । ଗତ କିଛି ବର୍ଷ ମଧ୍ୟରେ ଦକ୍ଷିଣ-ପୂର୍ବ ଏସୀୟ ରାଷ୍ଟ୍ରକୁ ଶହ ଶହ ଟର୍ମିନାଲ ଚୋରା ଚାଲାଣ ହୋଇଥିବା କୁହାଯାଉଛି । କେକେ ପାର୍କରେ ଚଢାଉ ସମୟରେ ୨,୧୯୮ ଜଣଙ୍କୁ ଅଟକ ରଖାଯାଇଥିଲା । ସାମରିକ ସରକାରଙ୍କ ମୁଖପାତ୍ର ମେଜର ଜେନେରାଲ ଜା ମିନ୍ ତୁନ୍ ଦାବି କରିଛନ୍ତି ଯେ କେକେ ପାର୍କରେ ମାମଲାରେ କରେନ୍ ନ୍ୟାସନାଲ୍ ୟୁନିଅନର ଶୀର୍ଷ ନେତାମାନେ ସାମିଲ ଥିଲେ । କରେନ ନ୍ୟାସନାଲ ୟୁନିଅନ ହେଉଛି ଏକ ଜାତିଗତ ସଂଗଠନ । ଏହାର ଏକ ସଶସ୍ତ୍ର ବାହିନୀ ରହିଛି, ଯିଏ ସେନା ଶାସନକୁ ବିରୋଧ କରେ ଏବଂ ଏହା ମିଆଁମାରର ଗୃହଯୁଦ୍ଧର ଅଂଶୀଦାର ।