ଜୟପୁର ୧୦।୦୪ : ୧୫ ଦିନ ହେଲା ଅନ୍ଧାରରେ ପଦ୍ମଶ୍ରୀ ସ୍ବର୍ଗତ କମଳା ପୂଜାରୀଙ୍କ ଘର । ଦୀପ ଆଲୋକରେ ବିତୁଛି ପରିବାର ଲୋକଙ୍କ ଜୀବନ। ବିଦ୍ୟୁତ ବିଲ୍ ପୈଠ କରିନଥିବାରୁ ତାଙ୍କ ଜୟପୁର ନିକଟସ୍ଥ ପାତ୍ରପୁଟର ଘରୁ ବିଦ୍ୟୁତ ସଂଯୋଗ ବିଛିନ୍ନ କରିଛି ଟାଟା ପାଓ୍ବାର।
କମଳା ପୂଜାରୀଙ୍କୁ ମାଗଣା ବିଦ୍ୟୁତ ସଂଯୋଗ ଯୋଗାଇ ଦେବା ନେଇ ପୂର୍ବ ସରକାର ପ୍ରତିଶ୍ରୁତି ଦେଇଥିଲେ। କିନ୍ତୁ ତାଙ୍କ ମୃତ୍ୟୁ ପରେ ବି ଏହା ପୂରଣ ହୋଇପାରିଲାନି। ଗତ ୪ ମାସରେ ତାଙ୍କ ପରିବାରର ପ୍ରାୟ ୧୦ ହଜାର ଟଙ୍କା ବିଦ୍ୟୁତ ବିଲ୍ ଆସିଛି। କିନ୍ତୁ ଏକକାଳୀନ ଏହି ଟଙ୍କା ପୈଠ କରିବାକୁ ସକ୍ଷମ ନଥିବା ଟାଟା ପାଓ୍ବାରକୁ ଜଣାଇଥିଲେ ପରିବାର ଲୋକ। ଏହା ବଦଳରେ କିସ୍ତିରେ ଏହି ବକେୟା ବିଦ୍ୟୁତ ବିଲ୍ ପୈଠ କରିବାକୁ କମଳାଙ୍କ ପରିବାର ଲୋକ ଟାଟା ପାଓ୍ବାରକୁ ଅନୁରୋଧ କରିଥିଲେ। ତଥାପି ଏଥି ପ୍ରତି କର୍ଣ୍ଣପାତ ନକରି ଟାଟା ପାଓ୍ବାର କତ୍ତୃପକ୍ଷ ବିଦ୍ୟୁତ ସଂଯୋଗ କାଟି ଦେଇଥିବା କହିଛନ୍ତି କମଳାଙ୍କ ପୁଅ। ଦେଶୀ ଧାନ ଗବେଷଣା ଓ ସଂରକ୍ଷଣ କ୍ଷେତ୍ରରେ କମଳାଙ୍କର ଉଲ୍ଲେଖନୀୟ ଯୋଗଦାନ ପାଇଁ କେନ୍ଦ୍ର ସରକାର ତାଙ୍କୁ ପଦ୍ମଶ୍ରୀ ଉପାଧିରେ ସମ୍ମାନୀତ କରିଥିଲେ। ଗତବର୍ଷ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା।
