ନୂଆଦିଲ୍ଲୀ: ପାର୍ଲେ ଗ୍ରୁପ୍ ଉପରେ ଆୟକର ବିଭାଗର ଚଢ଼ାଉ । ମୁମ୍ବାଇରେ ଥିବା କମ୍ପାନି ଠିକଣାରେ ରେଡ୍ ମାରିଛି ଆଇଟି ଟିମ୍ । ପାର୍ଲେ ଗ୍ରୁପର ପାର୍ଲେ-ଜି, ମୋନାକୋ ଏବଂ ଅନ୍ୟ ବ୍ରାଣ୍ଡ୍ର ବିସ୍କୁଟ ଫାର୍ମ ଉପରେ ଛାପାମାରିଛି ଆୟକର ବିଭାଗ । ଶୁକ୍ରବାର ସକାଳୁ ଏହି ରେଡ୍ ଜାରି ରହିଛି । ଆୟକର ବିଭାଗ ପକ୍ଷରୁ ଫରେନ୍ ଆସେଟ୍ ୟୁନିଟ୍ ଏବଂ ମୁମ୍ବାଇ ଇନକମ୍ ଟ୍ୟାକ୍ସ ଇନଭେଷ୍ଟିଗେସନ ଓ୍ବିଙ୍ଗ ସର୍ଚ୍ଚ ଅପରେସନ କରୁଛନ୍ତି । ତେବେ ଏହି ରେଡ୍ କାହିଁକି ହେଉଛି ? ଏହାର କାରଣ ଏଯାଏ ସାମ୍ନାକୁ ଆସିନାହିଁ । ରେଡ୍ ଶେଷ ହେବା ପରେ ଆୟକର ଚଢ଼ାଉର କାରଣ ଖୁଲାସା ହେବ । ବର୍ତ୍ତମାନ ସମୟରେ ଆଇଟି ଟିମ୍ ପାର୍ଲେ କାମ୍ପାନିର ଆୟବର୍ହିଭୂତ ସମ୍ପତ୍ତି ସନ୍ଧାନରେ ରହିଛି ।
ଆର୍ଥିକ୍ ବର୍ଷ-୨୪ରେ ପାର୍ଲେ-ଜି ପ୍ରଜେକ୍ଟ:
ପିଟିଆଇ ମୁତାବକ, ୨୦୨୨-୨୩ ଆର୍ଥିକ ବର୍ଷରେ ପାର୍ଲେ-ଜି ବିସ୍କୁଟ କମ୍ପାନିର ହୋଇଥିବା ଲାଭ ଅପେକ୍ଷା ଚଳିତ ଆର୍ଥିକ୍ ବର୍ଷରେ ଦୁଇଗୁଣା ଲାଭ ହୋଇଛି । ୨୦୨୩-୨୪ ଆର୍ଥିକ ବର୍ଷରେ କମ୍ପାନିର ୧୬୦୬.୯୫ କୋଟି ଟଙ୍କା ଲାଭ ହୋଇଛି । ୨୦୨୨-୨୩ରେ ଏହା ୭୪୩.୬୬ କୋଟି ଟଙ୍କା ଥିଲା । ଗତବର୍ଷ ପାର୍ଲେ ଗ୍ରୁପର ଆୟ ଦୁଇ ପ୍ରତିଶତ ବଢ଼ି ୧୪,୩୪୯.୪୦ କୋଟି ଟଙ୍କା ହୋଇଥିଲା । ହେଲେ ଏବର୍ଷ ରେଭିନ୍ୟୁ ୫.୩୧ ପ୍ରତିଶତ ଲମ୍ଫ ମାରିଛି । ଏହା ୧୫,୦୮୫ କୋଟିରେ ପହଞ୍ଚିଛି ।
କେବେ ଆରମ୍ଭ ହୋଇଥିଲା କମ୍ପାନି :
ପାର୍ଲେ ଗ୍ରୁପ୍ ଦେଶ ସ୍ବାଧୀନ ହେବା ପୂର୍ବରୁ ଅର୍ଥାତ୍ ୧୯୨୯ରେ ଆରମ୍ଭ ହୋଇଥିଲା । ୯୦ ଦଶକରେ ପାର୍ଲେ-ଜି ବିସ୍କୁଟ ସହିତ ଚା’କୁ ବେଶୀ ପସନ୍ଦ କରୁଥିଲେ ଲୋକେ । ଫଳରେ ଏହା ସେହି ସମୟରୁ ଲୋକପ୍ରିୟ ହୋଇଛି । ରିପୋର୍ଟ ଅନୁଯାୟୀ, କମ୍ପାନିର ନାଁ ପାର୍ଲେ, ମୁମ୍ବାଇର ବିଲେ-ପାର୍ଲେ ଅଞ୍ଚଳରୁ ନିଆଯାଇଛି । ୧୯୩୮ରେ ପ୍ରଥମ ଥର ପାଇଁ ପାର୍ଲେ-ଗ୍ଲୁକୋ ନାଁରେ ବିସ୍କୁଟ ଉତ୍ପାଦନ ହୋଇଥିଲା । ସ୍ବାଧୀନତା ପୂର୍ବରୁ ପାର୍ଲେ-ଜି ବିସ୍କୁଟକୁ ଗ୍ଲୁକୋ ବିସ୍କୁଟ କୁହାଯାଉଥିଲା । ମାତ୍ର ଦେଶ ସ୍ବାଧୀନ ହେବା ପରେ ଗ୍ଲୁକୋ ବିସ୍କୁଟର ଉତ୍ପାଦନ ବନ୍ଦ କରିଦିଆଯାଇଥିଲା । କାରଣ ସେହି ସମୟରେ ଦେଶରେ ଖାଦ୍ୟ ସଂକଟ ପଡ଼ିଥିଲା । ପରେ ସ୍ଥିତି ସାମାନ୍ୟ ହେବା ପରେ ଏହି ବିସ୍କୁଟର ଉତ୍ପାଦନ ପୁଣି ଥରେ ଆରମ୍ଭ ହୋଇଥିଲା ।
