ନୂଆଦିଲ୍ଲୀ ୨୭।୦୬; ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତି ହୋଇଛି। ଏହି ସମୟରେ ଇସ୍ରାଏଲ ଏବେ ଗାଜାକୁ ଟାର୍ଗେଟ କରିବା ଆରମ୍ଭ କରିଛି। ଏହି କାରଣରୁ ଏବେ ସେଠାରେ ଆତଙ୍କର ବାତାବରଣ ଦେଖିବାକୁ ମିଳୁଛି। ଇସ୍ରାଏଲ ଲଗାତାର ଗାଜା ଉପରେ ଆକ୍ରମଣ କରୁଛି। ଗତକାଲି ମଧ୍ୟ ଇସ୍ରାଏଲ କେନ୍ଦ୍ରୀୟ ଗାଜାର ଉପରେ ଆକ୍ରମଣ କରିଥିଲା। ଯେଉଁଥିରେ ୧୮ ଜଣଙ୍କର ମୃତ୍ୟୁ ହୋଇଥିଲା। ଏହି ଆକ୍ରମଣ ବିଷୟରେ ସୂଚନା ସ୍ଥାନୀୟ ହସ୍ପିଟାଲର ଅଧିକାରୀମାନେ ଦେଇଛନ୍ତି। ଆକ୍ରମଣ ପରେ ସେଠାରେ ହଇଚଇ ସୃଷ୍ଟି ହୋଇଥିଲା ଏବଂ ଲୋକମାନେ ନିଜକୁ ବଞ୍ଚାଇବା ପାଇଁ ଏଣେତେଣେ ଦୌଡ଼ିବାକୁ ଲାଗିଲେ।
ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ଆକ୍ରମଣ ସମୟରେ, ଲୋକଙ୍କ ଏକ ଭିଡ଼ ପାଲେଷ୍ଟାଇନୀ ପୋଲିସ ଠାରୁ ଅଟା ବସ୍ତା ନେଉଥିଲେ, ପ୍ରାୟ ଅଢ଼େଇ ମାସ ଧରି ସମସ୍ତ ଖାଦ୍ୟ ସହାୟତାକୁ ଅବରୋଧ କରିବା ପରେ ଇସ୍ରାଏଲ ମେ ମାସର ମଧ୍ୟଭାଗରୁ ଗାଜାକୁ ଅଳ୍ପ ପରିମାଣର ସାମଗ୍ରୀ ପଠାଇବାକୁ ଅନୁମତି ଦେଇଛି। ସଶସ୍ତ୍ର ଦଳ ସାହାଯ୍ୟ ସାମଗ୍ରୀ ବୋଝେଇ ଟ୍ରକ ଗୁଡ଼ିକୁ ଲୁଟ କରିବା ଦ୍ୱାରା ଜାତିସଂଘର ଖାଦ୍ୟ ବଣ୍ଟନ ବାଧାପ୍ରାପ୍ତ ହୋଇଛି।
ଏପର୍ଯ୍ୟନ୍ତ ୫୦ ହଜାରରୁ ଅଧିକ ମୃତ୍ୟୁ
ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଗାଜା ଏବଂ ଇସ୍ରାଏଲ ମଧ୍ୟରେ ହୋଇଥିବା ଏହି ଯୁଦ୍ଧରେ ଏପର୍ଯ୍ୟନ୍ତ ୫୦,୦୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି। ଯାହାଙ୍କ ମଧ୍ୟରୁ ଅଧିକାଂଶ ମହିଳା ଏବଂ ଶିଶୁ। ୧ ଲକ୍ଷରୁ ଅଧିକ ଲୋକ ଆହତ ହୋଇଛନ୍ତି। ଇସ୍ରାଏଲ ଦାବି କରିଛି ଯେ ସେ ହଜାର ହଜାର ଆତଙ୍କବାଦୀଙ୍କୁ ହତ୍ୟା କରିଛି।
