ନୂଆଦିଲ୍ଲୀ: ଯେଉଁ ସ୍ଥାନ ଦିନେ ପର୍ଯ୍ୟଟନ ହଟସ୍ପଟ ଥିଲା, ଆଜି ତାହା ଇସ୍ରାଏଲୀ ସେନାର ଟାର୍ଗେଟରେ। ସମଗ୍ର ଓ୍ୱେଷ୍ଟ ବ୍ୟାଙ୍କରେ ମୁତୟନ ଫୋର୍ସ। କୁମ୍ଭୀରଙ୍କୁ ଦେଖିଲା ମାତ୍ରେ ଗୁଳି କରି ମାରୁଛି IDF। ହତ୍ୟା ପଛରେ କଣ ରହିଛି କାରଣ? ଇସ୍ରାଏଲୀ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ପେଟଜେଲ୍ ନିକଟରେ ଥିବା ଏକ ଅବୈଧ ଫାର୍ମରେ ଥିବା ୨୬୨ କୁମ୍ଭୀରଙ୍କୁ ହତ୍ୟା କରାଯାଇଛି। ଏହି ଉପକୂଳରେ ଥିବା କୁମ୍ଭୀରମାନଙ୍କୁ ଗୁଳି କରାଯାଉଛି। ଫାର୍ମରେ ପ୍ରାୟ ୮୦୦ କୁମ୍ଭୀର ଅଛନ୍ତି।
ରିପୋର୍ଟ ଅନୁଯାୟୀ, ପ୍ରଥମେ ହ୍ରଦର ପାଣି ଶୁଖାଇଥିଲା ସେନା। ତା’ପରେ ଶହ ଶହ କୁମ୍ଭୀରଙ୍କୁ ଗୁଳି କରି ସେମାନଙ୍କ ମୃତ ଶରୀରକୁ ଟ୍ରକରେ ଭର୍ତ୍ତି କରିଥିଲା। ଏହି ଫାର୍ମ ଏକଦା ଲୋକପ୍ରିୟ ପର୍ଯ୍ୟଟନ ସ୍ଥଳ ଥିଲା। କୁମ୍ଭୀର ଚମଡ଼ା ମଧ୍ୟ ବ୍ୟବସାୟ କରୁଥିଲା। ୨୦୦୦ ମସିହା ବେଳକୁ ଏଠାକୁ ପ୍ରାୟ ୩ ହଜାର କୁମ୍ଭୀର ଅଣାଯାଇଥିଲା।
ଓ୍ୱେଷ୍ଟ ବ୍ୟାଙ୍କରେ ଥିବା ଇସ୍ରାଏଲୀ ସେନାର ପ୍ରଶାସନିକ ୟୁନିଟ୍ କହିଛି ଯେ ଏହି କୁମ୍ଭୀରଗୁଡ଼ିକ ଜନସାଧାରଣଙ୍କ ପାଇଁ ବିପଜ୍ଜନକ। କାରଣ ଫାର୍ମର ସଠିକ୍ ଯତ୍ନ ନିଆଯାଉନଥିଲା। ୨୦୧୩ ମସିହାରୁ ଇସ୍ରାଏଲରେ ନୀଳ କୁମ୍ଭୀରକୁ ଏକ ସଂରକ୍ଷିତ ପ୍ରଜାତି ଘୋଷଣା କରାଯାଇଛି। ଏହି ଫାର୍ମଟି ୧୯୯୦ରେ ନିର୍ମିତ ହୋଇଥିଲା। ୨୦୦୦-୨୦୦୫ର ଦ୍ୱିତୀୟ ଇନ୍ତିଫାଦା ସମୟରେ ପର୍ଯ୍ୟଟକଙ୍କ ପାଇଁ ବନ୍ଦ କରିଦିଆଯାଇଥିଲା।
ଗତ ସପ୍ତାହରେ ଯେତେବେଳେ ସୈନିକମାନେ କୁମ୍ଭୀରମାନଙ୍କୁ ମାରିବା ପାଇଁ ପହଞ୍ଚିଥିଲେ, ସେମାନେ ସେଠାରେ ମୃତ କୁମ୍ଭୀର ମଧ୍ୟ ପାଇଥିଲେ। ସିଭିଲ୍ ଆଡମିନଷ୍ଟ୍ରେସନ ଅନୁଯାୟୀ, ବିଶେଷଜ୍ଞମାନେ କହିଥିଲେ ଯେ କୁମ୍ଭୀରଗୁଡ଼ିକ ଦୟନୀୟ ଅବସ୍ଥାରେ ରହୁଥିଲେ। ଖାଦ୍ୟର ଅଭାବ ହେତୁ ସେମାନେ ପରସ୍ପରକୁ ଆକ୍ରମଣ କରି ଖାଉଥିଲେ। ଏପରିକି ସ୍ଥାନୀୟ ଲୋକ ତଥା ବସତି ପାଇଁ ବିପଦ ସାଜିପାରେ।ଫାର୍ମର ମାଲିକ ବିଟାନ୍ ଏହି ଅଞ୍ଚଳକୁ ସୁରକ୍ଷିତ ଭାବେ ରଖିବାକୁ ଅରାଜି ଥିଲେ। ଏହାପରେ ସୁରକ୍ଷା ଅଧିକାରୀମାନେ ନିକଟସ୍ଥ ବସତି ପ୍ରତି ଏକ ଗମ୍ଭୀର ବିପଦ ଭାବରେ ବର୍ଣ୍ଣନା କରିଥିଲେ।
ସୂଚନା ଅନୁଯାୟୀ, ୨୦୧୩ରେ ନୀଳ କୁମ୍ଭୀରକୁ ସଂରକ୍ଷିତ ପ୍ରଜାତି ଘୋଷଣା କରାଯିବା ପୂର୍ବରୁ, ବିଟାନ୍ ଟଙ୍କା ପାଇଁ ସେମାନଙ୍କୁ ହତ୍ୟା କରୁଥିଲେ। ଆଇନ ପରିବର୍ତ୍ତନ ହେବା ପରେ, ଶହ ଶହ କୁମ୍ଭୀର ତାଙ୍କ ପାଖରେ ରହିଗଲେ। ଅଧିକାରୀମାନଙ୍କ ଅଭିଯୋଗ- ଯେତେବେଳେ ବିଟାନ୍ ସେମାନଙ୍କଠାରୁ ଟଙ୍କା ରୋଜଗାର କରିବାର ଉପାୟ ପାଇଲେ ନାହିଁ, ସେ ସେମାନଙ୍କ ଯତ୍ନ ନେବା ବନ୍ଦ କରିଦେଲେ।
କିନ୍ତୁ ବିଟାନ୍ କୁହନ୍ତି ଯେ ସିଭିଲ୍ ପ୍ରଶାସନ ତାଙ୍କୁ ଅନ୍ୟ କୌଣସି ସମାଧାନ ଖୋଜିବାରେ ସାହାଯ୍ୟ କରିନଥିଲା। ମରକ୍କୋର ଏକ ପର୍ଯ୍ୟଟନ ପାର୍କକୁ କୁମ୍ଭୀର ପଠାଇବା ପାଇଁ ତାଙ୍କର ଏକ ଚୁକ୍ତି ହୋଇଥିଲା, କିନ୍ତୁ ଯୁଦ୍ଧ ଯୋଗୁଁ ଏହା ବନ୍ଦ ହୋଇଗଲା। ବର୍ତ୍ତମାନ ଅନ୍ୟ ଏକ ଦେଶ ସହିତ କଥାବାର୍ତ୍ତା ଚାଲିଥିଲା, କିନ୍ତୁ ଚୁକ୍ତି ହେବା ପୂର୍ବରୁ, ସେନା ଫାର୍ମରେ ପ୍ରବେଶ କରି କୁମ୍ଭୀରଗୁଡ଼ିକୁ ମାରି ଦେଇଛି।
