ପୈତୃକ ସମ୍ପତ୍ତି ପାଇଁ ସନ୍ତାନ ଭୁଲିଗଲେ ମାନବିକତା, ଦୀର୍ଘ ସମୟ ପଡ଼ିରହିଲା ମୃତଦେହ

କୁଜଙ୍ଗ ୦୫/୧୨: ସମ୍ପତ୍ତି ପାଇଁ ଭୁଲିଗଲେ ମାନବିକତା । ଭାଇ-ଭଉଣୀଙ୍କ ବିବାଦ ଭିତରେ ବଳି ପଡିଲା ମାଆ । ସ୍ଥିତି ଏମିତି ହେଲା ମାଆର ଶବଶତ୍କାର ବି ବିଳମ୍ୱ ହେଲା । ମାନବିକତା ଭୁଲିଯିବାରୁ ମା’ର ମୃତଦେହ ଶେଷକୃତ୍ୟ ହୋଇ ନ ପାରି ୧୦ଘଣ୍ଟାରୁ ଅଧିକ ସମୟ ଧରି ପଡ଼ିରହିଥିଲା । ଘଟଣା ସଂପର୍କରେ ଜଣାପଡ଼ିବା ପରେ ସ୍ଥାନୀୟ ପୋଲିସ ପହଞ୍ଚି ବୁଝାସୁଝା କରିଥିଲା । ଘଟଣା ଏବେ ଚର୍ଚ୍ଚାର ବିଷୟ ହୋଇଛି ।

ସୂଚନା ଥାଉକି, କୁଜଙ୍ଗ ବ୍ଲକ୍ ଅର୍ଥାତ୍ ପାରାଦୀପ ଲକ୍ ଥାନା ବିଶ୍ୱାଳୀ ଗ୍ରାମର ସ୍ୱର୍ଗତ କରୁଣାକର ତରାଇଙ୍କର ଚାରି ଝିଅ ଓ ଗୋଟିଏ ପୁଅ । ଚାରି ଝିଅ ଓ ପୁଅ ବିଭୂତି ତରାଇ ସମସ୍ତେ ବିବାହ କରିସାରିଛନ୍ତି । କରୁଣାକରଙ୍କ ମୃତ୍ୟୁ ପରେ ତାଙ୍କ ପତ୍ନୀ ମାଳତି ସମସ୍ତ ସମ୍ପତ୍ତି ଓ ଘରବାଡ଼ି ଜଣେ ଝିଅ ଯିଏ କୁଜଙ୍ଗ ଥାନା ଅନ୍ତର୍ଗତ ମଙ୍ଗରାଜପୁର ଗ୍ରାମରେ ବିବାହ କରିଛନ୍ତି ତାଙ୍କ ନାଁରେ କରିଦେଇଛନ୍ତି । ପରେ ସଂପୃକ୍ତ ଝିଅ ମା’ ମାଳତିଙ୍କୁ ନେଇ ଶାଶୂ ଘର ମଙ୍ଗରାଜପୁରରେ ରଖିଥିଲା ।

ପୁଅ ବିଭୂତି ଓ ତାଙ୍କ ପତ୍ନୀ ସେହି ପୈତୃକ ଘରଡିହରେ ଏକ ଚାଳ ଘର କରି ରହୁଛନ୍ତି । ବିଶ୍ୱାଳୀସ୍ଥିତ ପୈତୃକ ଘର ଡିହରେ ଝିଅ ତିନି ମହଲା ବିଶିଷ୍ଟ ଏକ କୋଠା ନିର୍ମାଣ କରିଛନ୍ତି । ଗୁରୁବାର ମଙ୍ଗରାଜପୁରସ୍ଥିତ ଝିଅ ଘରେ ମାଳତିଙ୍କର ଦେହାନ୍ତ ହୋଇଥିଲା । ମା’ର ମୃତଦେହ ସତ୍କାର ପାଇଁ ଝିଅ ବିଶ୍ୱାଳିସ୍ଥିତ ପୈତୃକ ଘରକୁ ନେଇ ପହଞ୍ଚିବା ପରେ ଯୁବ ନେତା ଜ୍ଞାନେନ୍ଦ୍ର ସାମଲ(ବିଗି)ଙ୍କ ନେତୃତ୍ୱରେ ଗ୍ରାମବାସୀ ଏକାଠି ହୋଇ ପ୍ରଥମେ ବିଭୂତିଙ୍କ ନାଁରେ ଘରବାରି ରେଜେଷ୍ଟ୍ରି କରିବା ପରେ ଯାଇ ମାଳତିଙ୍କ ମୃତଦେହ ସତ୍କାର କରାଯିବ ଜିଦ୍ ଧରିଥିଲେ । ଫଳରେ ଝିଅ ଅଡ଼ୁଆରେ ପଡ଼ିଥିଲେ ।

ମୃତଦେହ ପଡ଼ି ରହିବା ଖବର ପାଇ ପାରାଦୀପ ଲକ୍ ପୁଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରିଥିଲେ ବି ଗ୍ରାମବାସୀ ନଛୋଡ଼ ବନ୍ଧା ହୋଇ ମୃତଦେହ ସତ୍କାର କରାଇ ଦେଇ ନାହାନ୍ତି । ବିଭୂତିଙ୍କର କୌଣସି ସନ୍ତାନସନ୍ତତି ନଥିବାରୁ ମୃତ୍ୟୁ ପର୍ଯ୍ୟନ୍ତ ଭଉଣୀ ନିର୍ମାଣ କରିଥିବା କୋଠା ଘରେ ରହିବେ । ସେମାନଙ୍କ ମୃତ୍ୟୁ ପରେ ଭଉଣୀ ଦଖଲକୁ ନେବେ ବୋଲି ଲେଖାପଢ଼ା ହେଲେ ଯାଇ ସତ୍କାର କରାଯିବ ବୋଲି ଗ୍ରାମବାସୀ ପୁଲିସ ନିକଟରେ ଦାବି କରିଛନ୍ତି । ବିଳମ୍ବିତ ରାତି ପର୍ଯ୍ୟନ୍ତ ଶେଷକୃତ୍ୟ ସମ୍ପନ୍ନ ହୋଇ ନଥିବା ବେଳେ ଘଟଣାସ୍ଥଳରେ ପୁଲିସ ମୁତୟନ ହୋଇଛି​​​​​​​​​​​​​​