ନୂଆଦିଲ୍ଲୀ ୨୬/୦୬: ଲଣ୍ଡନ ହାଇକୋର୍ଟରେ ପହଞ୍ଚିଛି ଇଣ୍ଡିଆନ ପ୍ରିମିୟର ଲିଗ୍ ମାମଲା । ଫ୍ରାଞ୍ଚାଇଜ୍ ରାଜସ୍ଥାନ ରୟାଲ୍ସ ସହ ଜଡିତ ବିବାଦ ଏବେ ହାଇକୋର୍ଟରେ ପହଞ୍ଚିଛି । ଦଳର ମାଲିକ ମନୋଜ ବଡାଲେ ତାଙ୍କ ପୂର୍ବତନ ସାଥୀ ରାଜ କୁନ୍ଦ୍ରାଙ୍କ ଉପରେ ଆଣିଛନ୍ତି ସାଂଘାତିକ ଅଭିଯୋଗ । ତାଙ୍କୁ ବ୍ଲାକମେଲିଂ କରୁଥିବା ଅଭିଯୋଗ କରିଛନ୍ତି ସେ ।
ବଡାଲେ ରାଜ କୁନ୍ଦ୍ରାଙ୍କ ଉପରେ ୨୦୧୯ର ଗୋପନୀୟତା ଚୁକ୍ତିନାମା ଭଙ୍ଗ କରିବାର ବି ଅଭିଯୋଗ ଆଣିଛନ୍ତି । କହିବାକୁ ଗଲେ ମନୋଜ ବଡାଲେ ଲଣ୍ଡନସ୍ଥିତ କମ୍ପାନି ଏମର୍ଜିଂ ମିଡିଆ ଭେଞ୍ଚର୍ସର ମୁଖ୍ୟ ଓ ରାଜସ୍ଥାନ ରୟାଲ୍ସରେ ତାଙ୍କର ୬୫ ପ୍ରତିଶତ ଅଂଶଧନ ଅଛି । ଅର୍ଥାତ୍, ଏହି ଫ୍ରାଞ୍ଚାଇଜିରେ ତାଙ୍କର ସର୍ବାଧିକ ଅଂଶଧନ ଅଛି ।
କହି ରଖୁଛୁ ଯେ ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରାଙ୍କ ପୂର୍ବରୁ ରାଜସ୍ଥାନ ରୟାଲ୍ସରେ ୧୧.୭ ପ୍ରତିଶତ ଅଂଶଧନ ଥିଲା । କିନ୍ତୁ ୨୦୧୫ରେ ଆଇପିଏଲ୍ ବେଟିଂରେ ଦୋଷୀ ସାବ୍ୟସ୍ତ ହେବା ପରେ ତାଙ୍କୁ ତାଙ୍କର ଅଂଶଧନ ହରାଇବାକୁ ପଡିଥିଲା । ଏହି କାରଣରୁ ରାଜସ୍ଥାନ ରୟାଲ୍ସକୁ ମଧ୍ୟ ଦୁଇ ବର୍ଷ ପାଇଁ ନିଲମ୍ବିତ କରାଯାଇଥିଲା ।
ଗତ ମାସରେ, ରାଜ କୁନ୍ଦ୍ରା ମନୋଜ ବଡାଲେଙ୍କୁ ଏକ ଇମେଲ୍ ପଠାଇଥିଲେ । ଯେଉଁଥିରେ ସେ ଦାବି କରିଥିଲେ ଯେ ତାଙ୍କୁ ଭ୍ରମିତ କରାଯାଇଥିଲା । ତାଙ୍କର ୧୧.୭ ପ୍ରତିଶତ ଅଂଶଧନର ପ୍ରକୃତ ମୂଲ୍ୟରୁ ବଞ୍ଚିତ କରାଯାଇଥିଲା । ବଡାଲେଙ୍କୁ ପଠାଯାଇଥିବା ଇମେଲରେ କୁନ୍ଦ୍ରା ଭାରତୀୟ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଛନ୍ତି । ବିସିସିଆଇକୁ ରିପୋର୍ଟ କରିବାକୁ ଧମକ ଦେଇଛନ୍ତି ।
ତଥାପି, ରାଜ କୁନ୍ଦ୍ରା କହିଛନ୍ତି ଯେ ସେ ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜର ମୂଳ ଏବଂ ବର୍ତ୍ତମାନର ଅଂଶଧନକୁ ପ୍ରତିଫଳିତ କରି କ୍ଷତିପୂରଣ ପୁନଃସ୍ଥାପନ ସମ୍ବନ୍ଧୀୟ ଏକ ଚୁକ୍ତି ଉପରେ ଆଲୋଚନା କରିବାକୁ ପ୍ରସ୍ତୁତ । କୋର୍ଟର ଦଲିଲ ଅନୁଯାୟୀ ରାଜ କୁନ୍ଦ୍ରା ପୂର୍ବତନ ଆଇପିଏଲ କମିଶନର ଲଳିତ ମୋଦିଙ୍କୁ ମଧ୍ୟ ଏକ ବାର୍ତ୍ତା ପଠାଇଥିଲେ। ବାର୍ତ୍ତାରେ ଲେଖାଥିଲା, 'ବଡାଲେ ଜାଣି ନଥିଲେ ଯେ ମୋ ସହିତ ଠକେଇ ତାଙ୍କୁ କେତେ ମୂଲ୍ୟ ଦେବ ।'
ଏମର୍ଜିଂ ମିଡିଆ ଭେଞ୍ଚର୍ସ ମେ ୩୦ ତାରିଖରେ ରାଜ କୁନ୍ଦ୍ରାଙ୍କ ବିରୁଦ୍ଧରେ ଏକ ମଧ୍ୟବର୍ତ୍ତୀକାଳୀନ କୋର୍ଟ ଆଦେଶ ପାଇଥିଲା, ଯାହା ଦ୍ଵାରା କୁନ୍ଦ୍ରା କୌଣସି ଆପତ୍ତିଜନକ କିମ୍ବା ମାନହାନିଜନକ ବୟାନ ଦେଇପାରିବେ ନାହିଁ । ରାଜ କୁନ୍ଦ୍ରାଙ୍କ ଓକିଲ ସ୍ୱୀକାର କରିଛନ୍ତି ଯେ ଏହି ଆଦେଶ ବିଚାର ଶେଷ ହେବା ପର୍ୟ୍ୟନ୍ତ ଜାରି ରହିପାରେ, କିନ୍ତୁ ଏହା ସାବ୍ୟସ୍ତ ହୋଇନାହିଁ ଯେ ସେ କିଛି ଭୁଲ କରିଛନ୍ତି ।
