ନୂଆଦିଲ୍ଲୀ ୦୬/୦୫: ସ୍ୱପ୍ନ ହୋଇଛି ସତ । ମାତ୍ର ୩୯ ଟଙ୍କା ଲଗାଇ ସେ ଏବେ କୋଟିପତି । ଆଉ ଏହି ଖବର ଜଣାପଡିବା ମାତ୍ରେ ସବୁଠି ଚର୍ଚ୍ଚା । ଖାସ୍ କରି ଉତ୍ତର ପ୍ରଦେଶର କୌଶାମ୍ବୀ ଜିଲ୍ଲାର ଚୈଲ ତହସିଲ ପୂର୍ବା ଗାଁରୁ ନଜର ଆସିଛି ଏମିତି ଘଟଣା । ଏଠାକାର ମଙ୍ଗଲ ସରୋଜଙ୍କୁ ନେଇ ଗାଁରେ ଉତ୍ସବର ମାହୋଲ । 

ସୂଚନା ଥାଉକି,  ମଙ୍ଗଲ ସରୋଜ ବୃତ୍ତିରେ ଜଣେ ପ୍ଲାଇଉଡ୍ ଶ୍ରମିକ । ହାପୁରରେ ଜଣେ ଶ୍ରମିକ ଭାବରେ କାମ କରନ୍ତି। ସୋମବାର ତାଙ୍କ ମୋବାଇଲକୁ ଆସିଥିଲା ମେସେଜ । ଯେଉଁଥିରେ ଲେଖାଥିଲା ୪ କୋଟି ଟଙ୍କାର ପୁରସ୍କାର ରାଶି ଜିତିବା ବିଷୟରେ । ଆଉ SMS ପାଇବା ପରେ ଖୁସିରେ ଡେଇଁଥିଲେ ସରୋଜ । 

କହିବାକୁ ଗଲେ ମଙ୍ଗଲ ସରୋଜ ଏପ୍ରିଲ ୨୯ ତାରିଖରେ ପଞ୍ଜାବ ଓ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ଅନୁଷ୍ଠିତ ଆଇପିଏଲ ମ୍ୟାଚ୍ ପାଇଁ ଡ୍ରିମ୍ ୧୧ ଆପରେ ୩୯ ଟଙ୍କାର ଏଣ୍ଟ୍ରି ନେଇଥିଲେ। ଭାଗ୍ୟ ଏପରି ମୋଡ଼ ନେଇଲା ଯେ ତାଙ୍କ ଦ୍ୱାରା ଟିମ୍ ଚମତ୍କାର ପ୍ରଦର୍ଶନ କରିଥିଲା । ସେ ମୋଟ ୪ କୋଟି ଟଙ୍କା ଜିତିଥିଲେ । ମଙ୍ଗଲ କୁହନ୍ତି ଯେ ସେ କିଛି ସମୟ ଧରି ଡ୍ରିମ୍ ୧୧ରେ ନିଜର ଭାଗ୍ୟ ଚେଷ୍ଟା କରୁଥିଲେ । ଆଉ ଶେଷରେ  ତାଙ୍କର ସ୍ୱପ୍ନ ସତ ହୋଇଥିଲା ।

ମାତ୍ର ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠପଢ଼ିଛନ୍ତି ସରୋଜ ମଙ୍ଗଳ । ଅତି ଗରିବ ପରିବାରରେ ଜନ୍ମ । ୨୦୧୭ରେ ନୌବସ୍ତା ଗାଁରେ ବିବାହ ହୋଇଥିଲା । ତାଙ୍କର ତିନୋଟି ସନ୍ତାନ ବି ଅଛନ୍ତି । ଆର୍ଥିକ ଅନଟନରେ ଚଳୁଥିବା ମଙ୍ଗଳ ସରୋଜଙ୍କ ପରିବାରରେ ଏବେ ଖୁସିର ଲହରୀ । ମଙ୍ଗଳଙ୍କ ବାପା ସୁଖଲାଲ ସରୋଜ ଜମି ଲିଜ୍ ନେଇ ଚାଷ କରନ୍ତି । ଛଅ ପୁଅ ଏବଂ ଦୁଇ ଝିଅଙ୍କ ଏହି ପରିବାର ଦାରିଦ୍ର୍ୟର ଜୀବନଯାପନ କରିଛି । ଦୁଇଟି ଝିଅ ବିବାହିତ । ଏବେ ପୁଅ ମଙ୍ଗଳର ବିଜୟ ପରିବାରକୁ ଖୁସିରେ ଭରି ଦେଇଛି । ଗାଁରେ ଅଭିନନ୍ଦନର ସୁଅ ଛୁଟିଛି।