ନୂଆଦିଲ୍ଲୀ: ଭାରତ ମଙ୍ଗଳବାର ଇସଲାମିକ ସହଯୋଗ ସଂଗଠନ(ଓଆଇସି)କୁ ନିଜର ସଦ୍ୟତମ ବୟାନକୁ ନେଇ ତାଗିଦ୍ କରିଛି। ଓଆଇସି ଏପ୍ରିଲ ୨୨ରେ ପହଲଗାମ ଆତଙ୍କୀ ହମଲା ପରେ ବିବାଦୀୟ ବୟାନ ଦେଇଥିଲା। ଭାରତୀୟ ବୈଦେଶିକ ମନ୍ତ୍ରଣାଳୟ ଓଆଇସିର ବୟାନକୁ ଭିତ୍ତିହୀନ ଓ ରାଜନୈତିକ ଉଦ୍ଦେଶ୍ୟ ପ୍ରେରିତ ଦର୍ଶାଇଛି। ମନ୍ତ୍ରଣାଳୟ ସ୍ପଷ୍ଟ ଶବ୍ଦରେ କହିଛି ଯେ, ପାକିସ୍ତାନ ଏହି ସଂଗଠନର ବ୍ୟବହାର ଭାରତ ବିରୋଧରେ ମିଥ୍ୟା ପ୍ରଚାର ପାଇଁ କରୁଛି।

ବୈଦେଶିକ ମନ୍ତ୍ରଣାଳୟ ନିଜ ବୟାନରେ କହିଛି ଯେ, ଓଆଇସି ଏହି ବୟାନ ପାକିସ୍ତାନର ଇସାରାରେ ଜାରି କରିଛି। ଏଥିରେ ନା ଆତଙ୍କୀ ହମଲାର ସତ୍ୟକୁ ସ୍ଵୀକାର କରାଯାଇଛି ନା ସୀମାପାର କାର୍ଯ୍ୟକଳାପକୁ। ପାକିସ୍ତାନ ଲଗାତାର ଆତଙ୍କବାଦକୁ ପ୍ରୋତ୍ସାହିତ ଦେଇ ଆସିଛି ଏବଂ ଏବେ ଓଆଇସିକୁ ଭ୍ରମିତ କରୁଛି।

ଭାରତ ସ୍ପଷ୍ଟ କରିଛି ଯେ, ଓଆଇସିର ଏମିତି ଆଭିମୁଖ୍ୟ ଆଭ୍ୟନ୍ତରୀଣ ବ୍ୟାପାରକୁ ହସ୍ତକ୍ଷେପ କରୁଛି। ଏହାକୁ ଭାରତ କଦାପି ବରଦାସ୍ତ କରିବ ନାହିଁ। ଭାରତ ଏହିପରି ପକ୍ଷପାତି ଓ ସ୍ଵାର୍ଥୀ ବୟାନକୁ ସଂପୂର୍ଣ୍ଣ ଖାରଜ କରୁଛି। 

Also read: ଆସନ୍ତାକାଲି ଦେଶର ୨୫୯ଟି ସ୍ଥାନରେ ହେବ ମକ୍‌ଡ୍ରିଲ୍: ଓଡ଼ିଶାର ଏହି ଅଞ୍ଚଳରେ ହେବ ଯୁଦ୍ଧ ପ୍ରସ୍ତୁତି !

ଓଆଇସି ସୋମବାର ନ୍ୟୁୟର୍କରେ ଜାରି ଏକ ବୟାନରେ କହିଥିଲା ଯେ, ଦକ୍ଷିଣ ଏସିଆରେ ସୁରକ୍ଷା ସ୍ଥିତି ଚିନ୍ତାଜନକ। ଭାରତ ଦ୍ଵାରା ପାକିସ୍ତାନ ଉପରେ ଲଗାଯାଇଥିବା ଭିତ୍ତିହୀନ ଅଭିଯୋଗ କାରଣରୁ ଉତ୍ତେଜନା ବଢିଛି। ଭାରତର କାର୍ଯ୍ୟକଳାପ ଏହି କ୍ଷେତ୍ରରେ ପୂର୍ବରୁ ଥିବା ଅସ୍ଥିରତାକୁ ଆହୁରି ପ୍ରୋତ୍ସହନ ଦେବ। 

ଓଆଇସି ନିଜ ବୟାନରେ ଆତଙ୍କବାଦର ସମାଲୋଚନା କରିଛି, ମାତ୍ର ପହଲଗାମ ହମଲା ପାଇଁ ଦାୟୀ ଲୋକଙ୍କ ନାଁ ନେବାକୁ କୁଣ୍ଠା ପ୍ରକାଶ କରିଥିଲା। ଏଥିରେ ଭାରତକୁ ସ୍ପଷ୍ଟ ସଙ୍କେତ ମିଳିଛି ଯେ, ପାକିସ୍ତାନ ପ୍ରଭାବରେ ଓଆଇସି ଏମିତି ବୟାନ ଦେଇଛି। ଭାରତ ସ୍ପଷ୍ଟ ଶବ୍ଦରେ କହିଛି ଯେ, ଆତଙ୍କବାଦ ବିରୋଧୀ ନିଜର ଲଢେଇରେ ନା ନଇଁବ, ନା ଅଟକିବ, ନା କୌଣସି ବାହ୍ୟ ସଂଗଠନକୁ ନିଜର ଆଭ୍ୟନ୍ତରୀଣ ମାମଲାରେ ହସ୍ତକ୍ଷେପ କରିବାକୁ ଅନୁମତି ଦେବ।